ەلىمىزدە تۇڭعىش رەت قازاقستان رەسپۋبليكاسىنىڭ باسكەتبولدان ۇلتتىق ستۋدەنتتىك ليگاسى, «جاس وتان» جاستار قاناتى جانە قر ۇلتتىق باسكەتبول فەدەراتسياسىنىڭ قولداۋىمەن وتكەن چەمپيونات ەكى كەزەڭنەن تۇردى. العاشقى اينالىمدا وتكەن جىلدىڭ قازان ايىنان باستاپ ايماقتار بويىنشا «ورتالىق», «الماتى», «وڭتۇستىك», «سولتۇستىك», «شىعىس», «باتىس» ديۆيزيوندارى قۇرىلىپ, 30-دان استام ستۋدەنتتىك توپ ءوزارا سايىسقا ءتۇستى. ناتيجەسىندە, الماتى قالاسىنداعى فينالعا 16 ەرلەر جانە 8 قىزدار توبى ءوتتى.
چەمپيوناتتى وتكىزۋدەگى ماقسات – جاستار اراسىندا سالاۋاتتى ءومىر سالتىن ۇستانۋدى دارىپتەۋ, ەلىمىزدە باسكەتبول ويىنىن كەڭىنەن تاراتۋ جانە جوعارى وقۋ ورىندارىنىڭ كوماندالارىنا قولداۋ كورسەتۋ. اقتىق كەزەڭدە ۇزدىك ويىن كورسەتكەن توپ مامىر ايىندا ماسكەۋدە وتەتىن ISBC حالىقارالىق كۋبوگىنا قاتىسادى. ەلىمىزدىڭ ستۋدەنتتەرى باسكەتبولدان حالىقارالىق تۋرنيردە العاش رەت باق سىناماق. الەمنىڭ 12 ەلىنەن كەلگەن ەڭ ۇزدىك ويىنشىلارمەن جارىسقا تۇسەدى. تۋرنيرگە جاقىن جانە الىس شەتەلدەردەن رەسەي, يسپانيا, سەربيا, لاتۆيا جانە گرەتسيا قۇرامالارى قاتىسادى.
– چەمپيونات ستۋدەنتتەر اراسىندا ۇلكەن باسەكەلەستىك تۋدىردى. چەمپيوناتتىڭ قازاق باسكەتبولى تاريحىندا ستۋدەنتتەر اراسىندا العاش رەت وتكەنىن اتاپ ايتۋ كەرەك. جوعارى وقۋ ورىندارىنىڭ ستۋدەنتتەرى ءوز كوماندالارىنا كەرەمەت قولداۋ كورسەتتى. ستۋدەنتتەر ليگاسى باسكەتبول سپورت ءتۇرىنىڭ ەلىمىزدە, اسىرەسە جاستار اراسىندا كەڭىنەن تانىلۋىنا ىقپال ەتەدى, – دەپ اتاپ ءوتتى «جاس وتان» جاستار قاناتىنىڭ توراعاسى دانيار سۇندەتباەۆ.
قىزدار ۋنيۆەرسيتەتىنىڭ ستۋدەنتتەرىنەن قۇرالعان كوماندا العاشقى اينالىمدا م.ح. دۋلاتي اتىنداعى تاراز مەملەكەتتىك ۋنيۆەرسيتەتى, كەۋك, نارحوز ۋنيۆەرسيتەتىنىڭ توپتارىنان باسىم ءتۇسىپ جارتىلاي فينالعا جولداما الدى. ال, جارتىلاي فينالدا پاۆلودار مەملەكەتتىك پەداگوگيكالىق ۋنيۆەرسيتەتىنىڭ قۇراماسىنان ايلاسىن اسىرىپ, فينالدا ءال-فارابي اتىنداعى قازاق ۇلتتىق ۋنيۆەرسيتەتىنىڭ سپورتشىلارىن 57:51 ەسەبىمەن ويسىراتا جەڭدى. جەڭىمپازدار ارنايى كۋبوكپەن جانە 1 ميلليون تەڭگە كولەمىندەگى قارجىلاي سىيلىقپەن ماراپاتتالدى.
