مادەني شارانىڭ اشىلۋ سالتاناتىندا جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ ءسوز الىپ, كونە تاراز جەرىنە كەلگەن وزبەك اعايىندارعا العىس ءبىلدىردى. ءوز سوزىندە وزبەك حالقىنىڭ تانىمال رەجيسسەرى شۋحروت ماحمۋدوۆ جانە «وزبەككينو» اگەنتتىگىنىڭ وكىلى شەرزوتجان كەلدىباەۆ قازاق پەن وزبەك حالىقتارى اراسىنداعى مادەني بايلانىستىڭ بۇگىندە دامي تۇسكەنىن ايتىپ, الداعى ۋاقىتتاردا دا ارىپتەستىكتى ارتتىرۋ كەرەكتىگىن جەتكىزدى. سونداي-اق, 1 مامىر – قازاقستان حالقىنىڭ بىرلىگى كۇنى مەرەكەسىنە وراي اۋليەاتا جەرىنە كەلگەن مەيماندار قازاق ەلىنىڭ قوناقجايلىلىق, دارحاندىق سياقتى ەرەكشە قاسيەتتەرىنە توقتالدى.
«وزبەككينو» ۇلتتىق اگەنتتىگى ءۇش كۇن بويى تاراز كورەرمەندەرىنە «ايقىز ەرتەگى», «ۇرپاق», «شاباندوز», «تانكا» سياقتى تۋىندىلارىن تارتۋ ەتتى. بۇل كۇندەرى قالا تۇرعىندارى مەن قوناقتارى وبلىستىق قازاق دراما تەاترىنا كەلىپ, وزبەك كينولارىنداعى ءومىر سۋرەتتەرىنە قانىقتى. اسىرەسە قاراقالپاق حالقىنىڭ قاراپايىم ءومىرىن سۋرەتتەگەن «تانكا» فيلمىندەگى اۋىل ادامدارىنىڭ بەينەلەرى شىنايىلىعىمەن كوپشىلىكتى باۋرادى. وزگە كينولارداعى ءازىل ارقىلى بەرىلگەن سيۋجەتتەر دە كورەرمەن كوڭىلىنەن شىقتى. كومەديالىق سارىنمەن ءومىر شىندىعىن استارلاپ جەتكىزگەن فيلمدەردى كورسەتۋ بۇدان بىلاي دا تاراز تورىندە ءداستۇرلى تۇردە ۇيىمداستىرىلىپ تۇراتىن بولدى.
بۇدان كەيىن «وزبەككينو» اگەنتتىگىنىڭ وكىلدەرى مەن بەلگىلى وزبەكستاندىق رەجيسسەرلەر جامبىل وبلىستىق كينوورتالىعىندا بولىپ, شەبەرلىك سىنىپتارىن وتكىزدى. سونداي-اق فيلم ءتۇسىرۋ بارىسىندا وزدەرىنىڭ جيناعان تاجىريبەلەرىمەن ءبولىستى.
حاميت ەسامان,
«ەگەمەن قازاقستان»
جامبىل وبلىسى
