ءىس-شاراعا دەپۋتاتتار, قوعام قايراتكەرلەرى, ەلىمىزدىڭ جانە شەتەلدىڭ ساراپشىلارى, عالىمدار قاتىستى. دوڭگەلەك ۇستەلدى اشقان استانا قالاسى ساياسي زەرتتەۋلەر اسسوتسياتسياسىنىڭ باسشىسى قارلىعاش نۇعىمانوۆا قازاقستاننىڭ بۇۇ قاۋىپسىزدىك كەڭەسىنە توراعالىق ەتۋى تاريحي ماڭىزى بار ەكەنىنە ايتا كەلە, ەلىمىزدىڭ باستامالارى الەمدىك بەيبىتشىلىك پەن قاۋىپسىزدىكتى ساقتاۋعا ءوز ۇلەسىن قوساتىنىن مالىمدەدى.
«قازاقستاننىڭ بۇۇ قاۋىپسىزدىك كەڭەسىندە كوتەرگەن ماسەلەلەرىن ودان ءارى دامىتا ءتۇسۋ ءبىزدىڭ مىندەتىمىز. ەلىمىزدىڭ باستامالارى كونتسەپتۋالدى ارەكەتكە نەگىزدەلگەن, بەيبىتشىلىك پەن قاۋىپسىزدىكتى نىعايتۋعا باعىتتالدى. بۇگىنگى جيىندا قازاقستاننىڭ باستامالارىن اناليتيكالىق زەرتتەۋگە نەگىزدەلگەن باعا بەرۋگە تالپىنامىز», دەدى ق.نۇعمانوۆا.
بۇدان كەيىن ءسوز العان قازاقستاننىڭ تۇڭعىش سىرتقى ىستەر ءمينيسترى تولەۋتاي سۇلەيمەنوۆ تە ەلىمىزدىڭ قاۋىپسىزدىك كەڭەسىنە توراعالىق ەتۋ تاريحي ءسات ەكەنىن اتاپ كورسەتتى. ونىڭ ايتۋىنشا, ەلىمىزگە ماڭىزدى مىندەت جۇكتەلگەن ۋاقىتتا الەمدە ساياسي قىسىم كۇشەيىپ تۇردى.
«قاۋىپسىزدىك كەڭەسىندەگى تۇراقتى مۇشەلەردىڭ اراسىندا كەلىسپەۋشىلىك تۋىپ, ءوزارا سەنىم ماسەلەسى تومەندەپ كەتۋى ەلىمىزدىڭ سىرتقى ساياساتتاعى ۇستانىمىنا ۇلكەن سىناق بولدى. وسىعان قاراماستان قازاقستان وزىنە قويىلعان مىندەتتى ابىرويمەن ورىنداپ شىقتى. توراعالىق كەزىندەگى نەگىزگى ماقساتتارىنا قول جەتكىزدى», دەدى ت.سۇلەيمەنوۆ.
قازاقستاننىڭ ىرگەلى ۇيىمداعى تاجىريبەسىن ساراپشىلار دا جوعارى باعالادى. ماسكەۋ لينگۆيستيكا ۋنيۆەرسيتەتىنىڭ دوتسەنتى يكبال ديۋررەنىڭ پايىمداۋىنشا, الەم ەلدەرى ەلىمىزدىڭ بىتىمگەرلىك قابىلەتىنە ۇمىتپەن قارايدى. سوزىنە دالەل رەتىندە ساراپشى قازاقستاننىڭ سيريا ماسەلەسىن شەشۋدەگى رولىنە ەرەكشە توقتالىپ ءوتتى.
سونىمەن قاتار جيىن بارىسىندا دوڭگەلەك ۇستەلگە قاتىسۋشىلار ەلىمىزدىڭ يادرولىق قارۋدى تاراتپاۋ, الەمدىك دەرجاۆالار اراسىنداعى ديالوگتى قالپىنا كەلتىرۋ, الەمدە بەيبىتشىلىك پەن قاۋىپسىزدىكتى نىعايتۋ ماسەلەلەرى جونىندە كوتەرگەن باستامالارىنىڭ ماڭىزى تۋرالى تالقىلادى.
اباي اسانكەلدى ۇلى,
«ەگەمەن قازاقستان»
