جارىس جەڭىمپازدارى ماۋسىم ايىندا استانا قالاسىندا وتەتىن ۇلتتىق چەمپيوناتقا قاتىساتىن بولادى. سونداي-اق, وبلىستىق ءبىلىم باسقارماسىنىڭ ديپلومدارى مەن مەدالدار تاپسىرىلادى.
ەلباسىنىڭ «100 ناقتى قادام» ۇلت جوسپارىن جۇزەگە اسىرۋ شەڭبەرىندە جالپى ەڭبەك قوعامىن قۇرۋ جانە جۇمىسشى مارتەبەسىن ارتتىرۋ بويىنشا وبلىستىق ءبىلىم باسقارماسىنىڭ ۇيىمداستىرۋىمەن ءوتىپ جاتقان چەمپيوناتتىڭ اشىلۋ سالتاناتىنا ءماجىلىس دەپۋتاتى ءا.بەكتۇرعانوۆ باستاعان تومەنگى پالاتا دەپۋتاتتارى, وبلىس اكىمى ج.تۇيمەباەۆ, «نۇر وتان» پارتياسىنىڭ ورتالىق اپپاراتى مەن ءبىلىم جانە عىلىم مينيسترلىگىنىڭ وكىلدەرى جانە وزبەكستان رەسپۋبليكاسى مەن جامبىل, قىزىلوردا وبلىستارىنان دەلەگاتتار قاتىستى.
جاس ونەرتاپقىشتار قوناقتارعا ءوز ەڭبەكتەرىن تانىستىرىپ, جان-جاقتى ماعلۇمات بەردى. «مەملەكەت باسشىسى نۇرسۇلتان نازارباەۆ ەلىمىزدە ءبىلىم بەرۋدى دامىتۋ, سونىڭ ىشىندە تەحنيكالىق-كاسىپتىك مامانداردى دايارلاۋعا ۇلكەن ءمان بەرىپ وتىر. «قازاقستان–2050» ستراتەگياسىنىڭ نەگىزگى باسىم مىندەتى ەلدىڭ يندۋستريالىق-يننوۆاتسيالىق دامۋ سۇرانىستارىن ەسكەرە وتىرىپ, باسەكەگە قابىلەتتى كادرلاردى دايارلاۋ بولىپ تابىلادى. وبلىستاعى تەحنيكالىق جانە كاسىپتىك ءبىلىم سالاسىندا ەلباسىمىزدىڭ «بەس الەۋمەتتىك باستاماسى» اياسىندا اۋقىمدى شارالار قابىلدانىپ جانە 2017 جىلعى قىركۇيەكتەن باستاپ «بارشاعا تەگىن كاسىپتىك-تەحنيكالىق ءبىلىم» جوباسى جۇزەگە اسىرىلۋدا»,- دەدى وبلىس اكىمى ءبىلىم جارىسىنىڭ اشىلۋ سالتاناتىندا.
ايتا كەتەلىك, بىلتىرعى «WorldSkills Kazahstan -2017» ۇلتتىق چەمپيوناتىندا وبلىستان 9 قۇزىرەتتىلىك بويىنشا قاتىسقان ستۋدەنتتەردىڭ 1-ءى التىن مەدال, 5-ءى كۇمىس مەدال يەلەنسە, جەڭىل ونەركاسىپ جانە سەرۆيس كوللەدجىنىڭ ستۋدەنتى ۇلىبريتانيا, جاپونيا, قىتاي, تمد ەلدەرى قاتىسقان «WorldSkills Rossia - 2017» حالىقارالىق چەمپيوناتىندا ءىىى ورىندى جەڭىپ العان بولاتىن.
ەركىن دوسىمباي,
وڭتۇستىك قازاقستان وبلىسى
