ارت-گالەرەيانىڭ اشىلۋ راسىمىنە قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى بيبىگۇل اسىلوۆا, وتاندىق جوعارى وقۋ ورىندارىنىڭ رەكتورلارى مەن جاس عالىمدار قاتىستى.
ماقسات – وقۋ ورنىنىڭ كاسىبي قىلقالام شەبەرلەرىنىڭ ەڭبەكتەرىن كەڭىنەن دارىپتەۋ. ارت-گالەرەيادا قىزدار ۋنيۆەرسيتەتىنىڭ كاسىپتىك ءبىلىم كافەدراسىنىڭ پروفەسسور-وقىتۋشىلارى مەن ستۋدەنتتەرىنىڭ 20-دان استام كارتيناسى قويىلعان. «دارا» اتاۋىنا سايكەس, گالەرەياعا قويىلعان ونەر تۋىندىلارى ورتاق يدەياعا باعىنىپ, ءبىر تاقىرىپتى قاۋزايدى. ول – ەلىمىزدەگى تەك قىزدار ءبىلىم الاتىن بىردەن-ءبىر جوعارى وقۋ ورنىنىڭ وزىندىك ەرەكشەلىگى, قازاق حالقىنىڭ تۇرمىس-تىرشىلىگى, ەتنوتاقىرىپتار جانە تۋعان ەلدىڭ تابيعاتى. تەك بوياۋ, ستيل جانە جانرى ءارتۇرلى.
– كارتينالار ىلىنگەن قابىرعالارعا جاعالاتا كوز سالعاننان-اق اشىق ءتۇستى بوياۋلاردىڭ جارقىن, جايدارى تابى سەزىلىپ, جانىڭنان سامال ەسىپ وتكەندەي بولادى. كوركەم ادەبيەتتە كەزدەسەتىن شىمىر وقيعا, ءساتتى سيۋجەت, قىزىقتى بايانداۋ, كەلىستى ۇيقاس دەپ جاتاتىن ءتاسىلدىڭ ءبارى بوياۋ كۇشىمەن كەنەپتىڭ ۇستىنە كوشىپ العانداي اسەر بەرەدى. قىلقالام شەبەرىنىڭ جەتكىزگىسى كەلگەن يدەياسى كوڭىل-كۇيمەن كەرەمەت ساباقتاسقان, – دەيدى شارا ۇيىمداستىرۋشىلارى.
