قازاقستاندا العاش رەت قر باسكەتبولدان ۇلتتىق ستۋدەنتتىك ليگاسى, «جاس وتان» جاستار قاناتى جانە قر ۇلتتىق باسكەتبول فەدەراتسياسىنىڭ قولداۋىمەن وتكەن چەمپيونات ەكى كەزەڭنەن تۇردى. العاشقى كەزەڭدە 2017 جىلدىڭ قازان ايىنان باستاپ ايماقتار بويىنشا «ورتالىق», «الماتى», «وڭتۇستىك», «سولتۇستىك», «شىعىس», «باتىس» ديۆيزيوندارى قۇرىلىپ, 30-دان استام ستۋدەنتتىك توپ جارىسقا ءتۇستى. ناتيجەسىندە, الماتى قالاسىنداعى فينالعا 16 ەرلەر جانە 8 قىزدار توبى ءوتتى.
«جاس وتان» جاستار قاناتى توراعاسى دانيار سۇندەتباەۆ «چەمپيونات ستۋدەنتتەر اراسىندا ۇلكەن باسەكەلەستىك تۋدىردى. چەمپيوناتتىڭ قازاق باسكەتبولى تاريحىندا ستۋدەنتتەر اراسىندا العاش رەت وتكەنىن اتاپ ايتۋ كەرەك. جوعارى وقۋ ورىندارىنىڭ ستۋدەنتتەرى ءوز كوماندالارىنا كەرەمەت قولداۋ كورسەتتى. ستۋدەنتتەر ليگاسى باسكەتبول سپورت ءتۇرىنىڭ ەلىمىزدە, اسىرەسە جاستار اراسىندا كەڭىنەن تانىلۋىنا ىقپال ەتەدى», دەدى.
چەمپيوناتتى وتكىزۋدەگى ماقسات – جاستار اراسىندا سالاۋاتتى ءومىر سالتىن ۇستانۋدى دارىپتەۋ, ەلىمىزدە باسكەتبول ويىنىن كەڭىنەن تاراتۋ جانە جوعارى وقۋ ورىندارىنىڭ توپتارىنا قولداۋ كورسەتۋ. شەشۋشى كەزەڭدە ۇزدىك ويىن كورسەتكەن توپ مامىر ايىندا ماسكەۋدە وتەتىن ISBC حالىقارالىق كۋبوگىنا قاتىسادى. ەلىمىزدىڭ ستۋدەنتتەرى باسكەتبولدان حالىقارالىق تۋرنيردە العاش رەت باق سىناماق. الەمنىڭ 12 ەلىنەن كەلگەن ەڭ ۇزدىك ويىنشىلارمەن جارىسقا تۇسەدى. تۋرنيرگە جاقىن جانە الىس شەتەلدەردەن رەسەي, يسپانيا, سەربيا, لاتۆيا جانە گرەتسيا قۇرامالارى قاتىسادى.
