بيىلعى ماۋسىم باستالعالى بەرى «ليۆەرپۋل» ويناعان بارلىق تۋرنيرلەردە موحامەد سالاح 43 گول سالدى. بۇل تاڭداي قاقتىرارلىق كورسەتكىش. كلۋب تاريحىنداعى ەڭ اتاقتى شابۋىلشى يان راشتىڭ رەكوردىنا جەتۋ ءۇشىن مىسىرلىق شابۋىلشىعا تاعى دا 4 گول سالۋ قاجەت. سالاحتىڭ قازىرگى قارقىنىنا قاراساق, بۇل مەجەگە جاقىن ارادا جەتىپ تە قالاتىن سەكىلدى. العاشقى تايمنىڭ بەل ورتاسىندا ەشقانداي قاقپاشى قايتارا المايتىن سوققى جاساعان سالاح ەسەپ اشتى. ودان كەيىن فيرمينودان پاس الىپ, ەسەپتى ەسەلەي ءتۇستى. ەكىنشى تايمدا قاپتال ارقىلى شابۋىلداعان موحامەد الدىمەن مانەگە, كەيىننەن فيرمينوعا قولمەن قويعانداي پاستار بەرىپ, يتاليالىقتاردى ەسەڭگىرەتىپ تاستادى. ول از بولعانداي 69-مينۋتتا دجەيمس ميلنەر رەكورد ورناتتى. اعىلشىن ويىنشىسى چەمپيوندار ليگاسىنىڭ ءبىر ماۋسىمىندا 9 مارتە اسسيستەنتتىك جاساعان فۋتبولشى بولىپ تىركەلدى. سەبەبى ونىڭ پاسىن روبەرتو فيرمينو گولعا اينالدىردى.
جالپى ايتار بولساق, سالاح پەن فيرمينو ەكەۋى بيىلعى چەمپيوندار ليگاسىندا ون-وننان جيىرما گول سوقتى. 2014/2015 جىلعى ماۋسىمدا «بارسەلونانىڭ» ەكى ويىنشىسى 10 گولدان سوققان ەدى. مۇنىڭ ءوزى دە ءجيى كەزدەسە بەرمەيتىن كورسەتكىش.
ويىننىڭ 81-مينۋتىندا «ەنفيلد» ستاديونىنداعى تابلو 5:1-گە وزگەردى. بوسنيالىق شابۋىلشى ەدين دجەكو قالىڭ ۇيقىدان ويانعان باتىرداي كومانداسىن قۇتقارۋعا كىرىستى. دجەكو وسىمەن 4-ويىن قاتارىنان كوزگە ءتۇستى. ال ودان كەيىن بەلگىلەنگەن پەنالتيدەن ديەگو پەروتتي تاعى ءبىر گول سوقتى. سوڭعى 10 مينۋتتا «روما» ءۇمىت وتىن قايتا جاعىپ, ۇزىلگەلى تۇرعان ءۇمىتتىڭ نازىك ءجىبىن قايتا جالعادى. ەندى «وليمپيكو» ستاديونىندا وتەتىن 2 مامىر كۇنگى ويىندا «روما» تاعى دا 3:0 ەسەبىمەن جەڭسە, فينالعا شىعىپ كەتۋى مۇمكىن. «بارسەلونانىڭ» ءوزىن 3:0 جەڭگەندە, «ليۆەرپۋلگە» دە شامامىز جەتەدى», دەپ يتاليالىق اياقدوپشىلار سۇحبات بەرىپتى. كىم بىلەدى, دوپ دومالاق, الاڭ جازىق ەمەس پە؟
ەرمۇحامەد ماۋلەن,
«ەگەمەن قازاقستان»
