دەگەنمەن بارلىعىنىڭ باسىن قوساتىن وسى مەرەكە ول ءۇشىن وزىنشە ءبىر مەكتەپ, ءتىپتى ۋنيۆەرسيتەت سياقتى. مەرەكە كۇنى ول مىسالى, ازەربايجان زامانداسىمەن ەركىن اڭگىمەلەسىپ, ءبىر وڭىردە بىرگە ءومىر ءسۇرىپ جاتقان ۇلتتى تەرەڭ تاني تۇسۋگە مۇمكىندىك الادى.
وڭتۇستىك قازاقستان وبلىسى ارىس قالاسىندا تۋىپ-وسكەن اننانىڭ قازاق تىلىندە ەركىن سويلەيتىنىنە ەشكىم تاڭعالا قويماس. قازاق كورشىلەرىمەن تاتۋ وتباسىنداعى ويىن بالاسىنىڭ ءتىلدى مەڭگەرۋىنە اۋلادا بىرگە ويناعان بالالاردىڭ ىقپال ەتكەنى انىق. ويىن كەزىندە سارى قىز كورشىلەرىنىڭ بالالارىن ورىسشاعا ۇيرەتسە, ءوز كەزەگىندە ولار مۇنىڭ قازاقشاسىن جەتىلدىردى. اۋلا ء«دارىسىنىڭ» مەكتەپتە كومەگى كوپ ءتيدى. ودان كەيىن اننا ءتۇرلى وليمپيادالارعا قاتىسىپ, جۇلدەلى ورىنداردان كورىندى.
مەملەكەتتىك تىلدە ەركىن سويلەيتىن ونى ءتۇرلى كونفەرەنتسيالارعا, ءىس-شارالارعا شاقىراتىندار دا كوبەيدى. «مەكتەپتەن كەيىن كوللەدج بەن ۋنيۆەرسيتەتتى قازاق تىلىندە ءبىتىردىم. مەنىڭ قازاق ءتىلىن ءبىلۋىم تاعدىرىما ەرەكشە اسەر ەتتى. جەرگىلىكتى تەلەارنا قىزمەتكە شاقىردى. ماقالالاردى قازاق تىلىندە جازا باستادىم, ءتىل بايلىعىمدى مولايتتىم. اۋدان اكىمدىگىندە مادەنيەت جانە تىلدەردى دامىتۋ بولىمىندە ىستەگەن ەكى جىلدا كوپ نارسەنى ۇيرەندىم», دەيدى بۇگىندە ۇلتتىق ارنانىڭ وڭتۇستىك قازاقستان وبلىستىق بولىمشەسى «وڭتۇستىك» تەلەارناسىنىڭ ديكتور-رەداكتورى اننا شولگينا. گازەت-جۋرنالداردى مەملەكەتتىك تىلدە وقيتىن اننا اعىلشىن ءتىلىن دە مەڭگەرۋدە. كوپ ءتىل بىلۋگە ەلباسى ن.نازارباەۆپەن كوزبە-كوز سويلەسىپ, جۇزدەسۋى دە سەپتىگىن تيگىزگەن.
ءيا, وتكەن جىلى مەملەكەت باسشىسى وڭتۇستىك قازاقستانعا جۇمىس ساپارى بارىسىندا قازاقستان حالقى اسسامبلەياسىنىڭ وبلىستىق عيماراتى الدىندا بوي كوتەرگەن «قازاق ەلىنە مىڭ العىس!» مونۋمەنتىن كوردى. مىنە, سول كۇن اننانىڭ بۇگىنگىدەي كوز الدىندا. «ەلباسىمەن كەزدەسۋدە العان اسەرىمدى ايتىپ جەتكىزۋ مۇمكىن ەمەس. مەملەكەت باسشىسىمەن جۇزدەسۋ كەز كەلگەن جانعا بۇيىرا بەرمەيتىن قۋانىشتى ءسات! قاتتى قوبالجىعانىم راس. بىراق ەلباسىن كورگەن ساتتە بويىم جەڭىلدەپ سالا بەردى.
وزگەشە اۋرانى, جىلىلىقتى سەزىندىم. اشىق تا قاراپايىم جان, تەز ءتىل تابىسادى. مەملەكەت باسشىسىمەن ءۇش تۇعىرلى ءتىل جونىندە اڭگىمەلەستىك. ول كىسى تالاپتانساڭ ءۇش تىلمەن شەكتەلمەي كوپ ءتىل بىلۋگە بولاتىنىن, سول ارقىلى مۇمكىندىكتىڭ مولاياتىنىن ايتتى. كوپ ۇلتتى مەملەكەتىمىزدەگى ءتۇرلى ۇلتتار مەن ۇلىستار وكىلدەرىنىڭ دوستىعى تاۋەلسىز قازاقستاننىڭ باستى بايلىعى ەكەنىن اتاپ ءوتتى. ەلباسىمەن كەزدەسۋ مەنى جىگەرلەندىردى, ەرەكشە ءبىر سەزىم مەن ەرتەڭگە دەگەن سەنىم سىيلادى. ىزدەنىسكە, بىلىمگە بۇرىنعىدان دا كوپ ءمان بەرە باستادىم», دەيدى ا.شولگينا.
اننا ءۇشىن دە وڭتۇستىك قازاقستان وبلىسىندا تۇراتىن, بىرلىگى جاراسقان 100-دەن استام ەتنوستىڭ وكىلدەرى ءۇشىن دە بۇل مەرەكەنىڭ ورنى ەرەك. كوپتەگەن ۇلتتىڭ ورتاق شاڭىراعىنا اينالعان قازاق ەلى الەمگە بەيبىتشىلىك, كەلىسىم مەن تاتۋلىقتى ۇلگى ەتىپ وتىر. «قازاق حالقى جاراتىلىسىنان قۇشاعى اشىق, جانى جومارت, قوناقجاي جۇرت ەكەنى بارشاعا ايان. ۇلتىمىزدىڭ وسىناۋ ۇلى قاسيەتىن ەلباسى نۇرسۇلتان نازارباەۆ باستى باعدار ەتىپ بەلگىلەپ, دارا ۇستانىم ەتىپ جاريالادى.
بۇل جونىندە پرەزيدەنت: «تاۋەلسىزدىگىمىزدى تۇعىرلى, مەملەكەتىمىزدى عۇمىرلى ەتۋ – ءبىزدىڭ ورتاق مۇددەمىز. دامۋ جولىمىزدا تاۋەلسىزدىكتىڭ جالعىز تىرەگى بىرلىك ەكەنىن ەش ۋاقىتتا ۇمىتپاۋىمىز كەرەك» دەپ, جالپىۇلتتىق بىرلىك پەن قوعامدىق كەلىسىمدى – تاۋەلسىزدىگىمىزدىڭ باستى تۇعىرى ەتىپ قالادى. بۇگىندە وبلىستىق 20 ەتنومادەني بىرلەستىك حالقىمىزدىڭ بايىرعى مەيماندوستىق, باۋىرلاستىق, ەڭبەككەرلىك سىندى اسىل داستۇرلەرىن ۇزدىكسىز جالعاپ كەلەدى. بىرلىكتى نىعايتاتىن, دوستىققا ۇندەيتىن مەرەكەدە بارلىق ەتنومادەني بىرلەستىكتەر ءبىر ءۇيدىڭ بالاسىنداي قۋانىشىن ءبولىسىپ, ەرتەڭىن جوسپارلايدى. مەرەكە ماعان سونىسىمەن دە قىمبات», – دەيدى اننا شولگينا.
ءتۇرلى ەتنوستىڭ باسىن بىرىكتىرىپ قانا قويماي, ولاردى ورتاق ماقساتقا ۇيىستىرىپ وتىرعان وڭتۇستىك حالقىنىڭ ۇشتەن ءبىرىن جاس بۋىن وكىلدەرى قۇرايدى. ءبىز اڭگىمەلەگەن اننا شولگينا سولاردىڭ ءبىرى. ايتا كەتەلىك, قازاقستاندىق پاتريوتيزم مەن جالپىۇلتتىق بىرلىك قاعيداتتارىن وسكەلەڭ ۇرپاقتىڭ بويىنا ءسىڭىرۋ, سول ارقىلى قازاقستاندىق قوعامنىڭ جاڭا فورماتسياسى – ۇلتتىق بىرەگەيلىكتى قالىپتاستىرۋ ماقساتىندا جوعارى جانە ورتا ارناۋلى وقۋ ورىندارىندا 93 دوستىق كلۋبى جۇمىس ىستەيدى. كلۋبتىڭ ۇيىتقى بولۋىمەن وتكىزىلەتىن ستۋدەنت جاستارمەن ەركىن فورماتتاعى كەزدەسۋلەر, اشىق اڭگىمەلەر, بيزنەس-ترەنينگتەر, پىكىر الماسۋ الاڭدارى, شەبەرلىك ساباقتارى سىندى ءىس-شارالاردىڭ دا ەل بىرلىگىن نىعايتۋدا بەرەرى مول.
عالىمجان ەلشىباي,
«ەگەمەن قازاقستان»
