ەستەرىڭىزگە سالايىق, بىلتىر كۇزدە ەمتيحاندى ءوز كۇشىمەن تاپسىرعاندار ارىزدانىپ, بۇل ءىس بويىنشا تەكسەرىس جۇرگىزىلگەن ەدى. سونىڭ ناتيجەسىندە اعىلشىن ءتىلى ەمتيحانى بويىنشا 117 تىركەلمەگەن سەرتيفيكات انىقتالدى. IELTS سەرتيفيكاتى ماگيستراتۋرا نەمەسە دوكتورانتۋراعا ءتۇسۋ كەزىندە باسىمدىق بەرەدى. سول سەبەپتى بىلتىر كوپ ادام بۇل قۇجاتتى ساتىپ العان. الايدا بارلىق سىناقتان ءوز كۇشىمەن وتكەندەر ەمتيحان ناتيجەسىمەن كەلىسپەي, بۇل ماسەلەگە قوعام نازارىن اۋدارۋعا تىرىستى. ناتيجەسىندە قر ءبىلىم جانە عىلىم مينيسترلىگى تەكسەرىس جۇرگىزىپ, بازادا تىركەلمەگەن 117 سەرتيفيكات بار ەكەندىگىن انىقتادى. ء«بىلىم جانە عىلىم مينيسترلىگىنىڭ كوميسسياسى ەكى رەت تەكسەرىس جۇرگىزدى. باسىندا ءبىز 33 بالانى شىعاردىق. جاقىندا تاعى 84 ستۋدەنت وقۋدان شەتتەتىلدى. ەندى بۇل ازاماتتار ولاردىڭ وقۋىنا جۇمسالعان قارجىنى قايتارۋى ءتيىس. ولاردىڭ كوبى گرانتتا وقىدى. تەك 9 ادام عانا اقىلى تۇردە ءبىلىم الدى», - دەيدى «استانا مەديتسينا ۋنيۆەرسيتەتى» اق رەكتورىنىڭ ورىنباسارى فرانتس گاليتسكي.
بۇل وقيعانى تەرگەۋ قالالىق ىشكى ىستەر دەپارتامەنتىنە جۇكتەلدى. ناتيجەسىندە 117 قىلمىستىق ءىس قوزعالدى. ونىڭ 30-ى سوتقا جىبەرىلدى. «385-باپتىڭ 3-بولىگى, ياعني جالعان قۇجاتتى پايدالانۋ ءىسى بويىنشا 300 ايلىق ەسەپتىك كورسەتكىش كولەمىندە ايىپپۇل تاعايىندالادى. سونىمەن قاتار قاماۋعا الۋ نەمەسە قوعامدىق جۇمىستارعا تارتۋ دا قاراستىرىلعان», - دەيدى سارىارقا اۋداندىق №2 سوتىنىڭ سۋدياسى بولات پازىلوۆ.
قازىر وقۋدان شىعىپ قالعان ستۋدەنتتەردىڭ ورنى بوس. ەندى ەمتيحاندى ءوز كۇشىمەن تاپسىرعاندار وسى گرانتتاردى يەلەنۋدەن ءۇمىتتى. «وكىنىشكە قاراي, ءبىز بۇل ماسەلەنى ءوز بەتىمىزبەن شەشە المايمىز. ول ءۇشىن ءبىلىم جانە عىلىم مينيسترلىگى بىرقاتار قۇجاتتى رەتتەۋ كەرەك. سونىڭ نەگىزىندە اقشا تولەپ وقىپ جاتقانداردى وسى بوس ورىندارعا اۋىستىرامىز», - دەيدى «استانا مەديتسينا ۋنيۆەرسيتەتى» اق رەكتورىنىڭ ورىنباسارى.
جالعان سەرتيفيكات ساتىپ العان ستۋدەنتتەردىڭ ءبارى وقۋدان كۇزدە شىعارىلۋى ءتيىس ەدى. بىراق سوتتىڭ بۇل شەشىمى ۋاقتىلى ورىندالماعان. مۇنداي جاعدايدا مەديتسينا ماماندارىن دايارلايتىن وقۋ ورداسى ليتسەنزياسىنان ايىرىلۋى دا مۇمكىن.
