ەركىن تىلەك ۇلى – قازاق مۇسىندەۋ ونەرىنىڭ مودەرنيستىك باعىتىن قالاعان تۇلعا. شىعارمالارى ماسكەۋدەگى ترەتياكوۆ گالەرەياسىندا, ءا.قاستەەۆ اتىنداعى مەملەكەتتىك بەينەلەۋ ونەرى مۋزەيىندە, اقش, گەرمانيا سياقتى ەلدەردىڭ كوركەمسۋرەت قورىنىڭ كوللەكتسيالارىندا ساقتالعان. ە.مەرگەنوۆتىڭ شىعارماشىلىق تالانتى جايلى رەسەيلىك ونەرتانۋشى يۋ.كورولەۆ: «بۇل ادامنىڭ ويلاۋ, سەزىنۋ, ءتۇيسىنۋ قابىلەتىنىڭ تەرەڭدىگى, زاماناۋي قۇبىلىستاردى اڭعارا ءبىلۋى, تەك حاس شەبەرلەرگە عانا ءتان كورىپكەلدىك دارىنى, ونى الەمدىك دەڭگەيگە كوتەردى» دەسە, وسىدان بىرنەشە جىل بۇرىن اقش-تاعى ستەنفورد ۋنيۆەرسيتەتىنىڭ دوكتورى, سلاۆيان ءتىلى جانە ادەبيەتى كافەدراسىنىڭ اعا وقىتۋشىسى ن.سكاكوۆ, مەرگەنوۆتىڭ تۋىندىلارى: تاريح, ءدىن, فيلوسوفيا, ادەبيەتتە سونى شىعارمالار جازۋعا ىقپالىن تيگىزدى, دەپتى.
ن.گوگول اتىنداعى الماتى كوركەمسۋرەت ۋچيليششەسى جانە ۆ.سۋريكوۆ اتىنداعى ماسكەۋ مەملەكەتتىك كوركەمسۋرەت ينستيتۋتىنىڭ تۇلەگى ەركىن مەرگەنوۆتىڭ ءار جىلدارى قولىنان شىققان عۇمىرلى ەڭبەكتەرى – «نەكە», «تاڭ», «شەڭبەر», «ماحامبەت», «سەزىمتالدىق», «اعاش ءۇنى», «كەش», «جامال», ء«سابي جىلى», «دالاداعى ءتالتۇس», «ەكەۋ. قوزى كورپەش-بايان سۇلۋ», «قۋانىش», «بوبەكتەر جىلى», «بايتەرەك داۋسى», ت.ب ءمۇسىن-كەسكىندەمەلەرى راسىندا قازاق بەينەلەۋ ونەرىندەگى تىڭ باعىت. وندا – دالا مادەنيەتى, شىعىس وركەنيەتىنىڭ كومپوزيتسياسى كورىنىس تاپقان.
تالانتتى ءمۇسىنشىنىڭ باستى قاسيەتى ول عالام تانىعان مۇسىنشىلەر – كرەمەر, بارلاح, مانتسۋ, دجاكومەتتي, مايوليا, رودەن سيياقتى تارلانداردىڭ تۋىندىلارىنا تەرەڭىنەن بويلاۋ ارقىلى, ولاردىڭ ستيلدىك ەرەكشەلىگى مەن رەاليستىك كوزقاراسىنان ساباق الا وتىرىپ, ءوزىنىڭ باعىتىن قالىپتاستىرا الۋىندا.
ءۇش جىل بۇرىن ومىردەن وتكەن شىعارماشىلىق يەسى ەركىن تىلەك ۇلىن ەسكە ءتۇسىرۋ ءۇردىسى بويىنشا ۇيىمداستىرىلعان شارا كەزىندە ءسوز العان ۇلتتىق مۋزەي ديرەكتورىنىڭ مىندەتىن اتقارۋشى ل.كوچەتوۆ, مەرگەنوۆتىڭ تۋىندىلارى ۇلت مادەنيەتىن شەتەلگە تانىتۋدىڭ ۇلگىسى دەدى. سونىمەن قاتار جيىنعا ءمۇسىنشىنىڭ ۇلى الىبەك مەرگەنوۆ, ونەرتانۋشى كاميلا لي باستاعان سۋرەتشىلەر جانە باسقا دا تانىمال تۇلعالار قاتىسىپ, ارنايى وتكىزىلگەن كونفەرەنتسيا بارىسىندا ءوز ويلارىمەن ءبولىستى.
بەكەن قايرات ۇلى,
«ەگەمەن قازاقستان»
