وسىلايشا استاناعا كورىك بەرەتىن اق تال, ۇيەڭكى, قايىڭ, قاراعاي, ەمەن, ءسۇمبىل تەرەك, شەتەن اعاشتارى كوبەيە ءتۇستى. اعاش كوشەتتەرىن ەگۋدە ەڭ الدا كەلە جاتقان ەسىل اۋدانى دەۋگە بولادى. ايتا كەتەلىك, الماتى اۋدانىندا – 1300, بايقوڭىر اۋدانىندا – 500, ەسىل اۋدانىندا – 2975 اعاش پەن 274 بۇتا, سارىارقا اۋدانىندا 495 كوشەت وتىرعىزىلعان. سەنبىلىكتە ءتۇس الەتىندە 687,88 توننا قالدىق جينالىپ, قوقىس جيناۋ اۋماعىنا شىعارىلدى. بارلىعى 166 تاسىمال اتقارىلدى. اتاپ ايتقاندا, قوقىس جيناۋ مەن شىعارۋ ىسىنە 200 تراكتور مەن 387 جۇك كولىگى جۇمىلدىرىلدى. ەلوردا ءىشىن قاق جارىپ اعاتىن ەسىل وزەنى مەن ونىڭ اقبۇلاق, سارىبۇلاق ىسپەتتى سالالارىنىڭ جاعالاۋلارى سانيتارلىق تارتىپكە كەلتىرىلدى. اتالعان اكتسياعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 150-دەن استام ستۋدەنتى مەن قالا اۋماعىندا اسكەري مىندەتىن اتقارىپ جۇرگەن ازاماتتار بەلسەنە قاتىستى. سونداي-اق سەنبىلىكتە تۇرعىندارعا تازالاۋعا قاجەتتى زاتتار ۇلەستىرىلدى.
«قالامىزدىڭ تازالىعى بالالارىمىزدىڭ دەنساۋلىعى ءۇشىن وتە ماڭىزدى. مۇنداي شارالاردىڭ ءجيى ۇيىمداستىرىلىپ تۇرعانىن قالايمىن. ءوزىڭ تۇراتىن قالانىڭ جارقىراپ, جايناپ تۇرعانى بارشامىزعا ۇنايدى. سوندىقتان تازالىق-سانيتارلىق شارالارىن ساقتاۋ, قالانى تازا ۇستاۋعا ارقايسىمىزدىڭ قوسار ۇلەسىمىز ۇلكەن» دەيدى الماتى اۋدانىنىڭ تۇرعىنى, زەينەتكەر ق.توقسەيىتوۆا.
ەكولوگيالىق ايلىققا مينيسترلىك, اگەنتتىك ۇجىمدارى مەن قالالىق ءماسليحات, قالا اكىمدىگىنىڭ اپپاراتى, ورتالىق اتقارۋشى ورگانداردىڭ اۋماقتىق بولىمشەلەرىنىڭ قىزمەتكەرلەرى, ارداگەرلەر كەڭەسى, كاسىپوداقتار مەن قوعامدىق ۇيىمداردىڭ دا وكىلدەرى بەلسەندى تۇردە قاتىسقانىن اتاپ وتۋگە بولادى. شاعىن جانە ورتا كاسىپكەرلىك يەلەرى وزدەرىنە تيەسىلى اۋماقتىڭ تازالىعىن قامتاماسىز ەتسە, كوممۋنالدىق قىزمەت پەن مەردىگەر ۇيىمدار اۋلاىشىلىك كورىكتەندىرۋ جۇمىستارىن جۇرگىزىپ, بالالاردىڭ ويىن الاڭدارى مەن سپورت الاڭدارىن, تاستاقتالار مەن جيەكتاستاردى جاڭارتۋعا قاتىستى. سونىمەن بىرگە ينجەنەرلىك جانە كوممۋنيكاتسيالىق جەلىلەردى جوندەۋدەن وتكىزۋ كەزىندە بۇزىلعان اۋماقتار, كابەلدى جەلىلەر, كوشەدەگى جانە ساياباقتارداعى جارىقتاندىرۋ رەتكە كەلتىرىلدى.
ەكولوگيالىق شاراعا «استانا ەكسپو-2017» ۇلتتىق كومپانياسى دا قاتىستى. ولار كورمە كەشەنىنىڭ نىساندارى مەن ساياباق ماڭايىنداعى 2 گەكتارعا جۋىق الاڭدى تازالاپ, 200 كوشەت وتىرعىزدى. سونداي-اق 7 ارنايى تەحنيكانى جۇمىلدىرىپ, 3 تەكشە مەتر قوقىس شىعاردى. «ۇجىمىمىز تولىق قۇراممەن جالپىقالالىق سەنبىلىككە شىقتى. كورمە مۇراسى نىساندارى استانا تۇرعىندارى مەن قوناقتارىنىڭ ءجيى كەلەتىن ورتالىعىنا, ال «نۇر الەم» سفەراسى – جاڭا دۇنيەجۇزىلىك بولاشاق ەنەرگياسىنىڭ نىشانىنا اينالدى. قازىر كورمە اۋماعىنا كەلۋشىلەردىڭ جايلىلىعى ءۇشىن ەكسپو نىساندارىن قايتا جوندەۋ جانە كوركەيتۋ جۇمىستارىن اتقارىپ جاتىرمىز», دەدى كاسىپورىن باسشىسى ەربول شورمانوۆ.
سەنبىلىك شارالارى ەل اۋماعىندا دا وتۋدە. ال «استانا – تازا ءارى قاۋىپسىز قالا» اتتى جالپىقالالىق سەنبىلىك 12 مامىردا تاعى دا ۇيىمداستىرىلماق.
دۋمان اناش,
«ەگەمەن قازاقستان»
