كەڭەس مۇشەلەرى بەكبولات تىلەۋحان, دينار نوكەتاەۆا, يسلام بايرامۋكوۆ الماتىداعى ءال-فارابي اتىنداعى قازاق ۇلتتىق ۋنيۆەرسيتەتىنىڭ, ق.ساتپاەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسورلىق وقىتۋشىلار قۇرامى مەن ستۋدەنتتەرمەن كەزدەسىپ, جاتاقحانالاردىڭ جانە وندا تۇرىپ جاتقان ستۋدەنتتەردىڭ جاعدايىمەن تانىستى.
جاستارعا دەگەن مەملەكەت قامقورلىعىن ەلباسى ءوزىنىڭ 5 الەۋمەتتىك باستاماسىندا «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ قولعا الىنۋى ءتيىس» دەپ اتاپ كورسەتتى. پرەزيدەنت ن.نازارباەۆ ءتورتىنشى ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە بولاتىن سان مىڭ جاڭا ماماندى دايارلاۋعا 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرعان بولاتىن.
«ستۋدەنتتەر ءۇيىن» ارالاۋ كەزىندە بەلگىلى بولعان جايتتاردى اتاپ وتسەك, 2017-2018 وقۋ جىلىندا قازاق مەملەكەتتىك قىزدار پەداگوگيكالىق ۋنيۆەرسيتەتىندە 5871 ستۋدەنت ءبىلىم الادى. بۇل ۋنيۆەرسيتەتتە 7 جاتاقحانا بار, وندا 3177 ستۋدەنت تۇرادى. ال ءال-فارابي اتىنداعى قازۇۋ-دە 17 143 ستۋدەنت ءبىلىم السا, ونىڭ ىشىندە گرانتتا وقيتىندار سانى – 13 775. ۋنيۆەرسيتەتكە قاراستى 16 جاتاقحانادا 5730 ستۋدەنت تۇرىپ جاتىر. ق.ساتپاەۆ اتىنداعى قازاق ۇلتتىق تەحنيكالىق ۋنيۆەرسيتەتىندە 9949 ستۋدەنت وقيدى. وعان تيەسىلى 6 جاتاقحانادا 1998 ستۋدەنت تۇرىپ جاتىر. اباي اتىنداعى ۇلتتىق پەداگوگيكالىق ۋنيۆەرسيتەتىندە 6821 ستۋدەنت ءبىلىپ السا, ونىڭ 1887-ءسى وسىنداعى 5 جاتاقحاناعا قونىستانعان. قازۇۋ-ءدىڭ رەكتورى, اكادەميك ع.مۇتانوۆتىڭ ايتۋىنشا, جوسپاردا تۇرعان جالپى اۋماعى 45 مىڭ گا جەرگە 1287 ورىنعا ەسەپتەلگەن, ياعني 543 بولمەلىك 12 قاباتتى زاماناۋي تالاپقا ساي جاڭا جاتاقحانا قۇرىلىسىن جۇرگىزۋ جۇمىسى تاياۋ ارادا قولعا الىنادى.
ەلىمىزدىڭ جوعارى وقۋ ورىندارىندا ءبىلىم الىپ جاتقان 530 مىڭ ستۋدەنتتىڭ 204 مىڭى قالاعا سىرتتان كەلگەن ستۋدەنتتەر. ستۋدەنتتەردىڭ جاتاقحانامەن قامتىلۋىن كورسەتەتىن رەسمي ستاتيستيكالىق مالىمەتتەر تالداۋى بۇل جاعدايدىڭ قاناعاتتارلىق دەڭگەيدە ەمەس ەكەنىن كورسەتتى. جالپى العاندا رەسپۋبليكا بويىنشا ستۋدەنتتىك جاتاقحانالارعا سۇرانىس 77500 كەرەۋەتتىك ورىن بولىپ وتىر. سونىڭ ىشىندە ەڭ كوبى الماتى قالاسىنا تيەسىلى – 21557 ادام جاتاقحاناعا مۇقتاج.
كەڭەستىڭ كوشپەلى جيىن قورتىندىسىندا «ميراس» كەڭەسى مەملەكەت باسشىسى ن.نازارباەۆتىڭ «پرەزيدەنتتىڭ بەس الەۋمەتتىك باستاماسى» ۇندەۋىنە قولداۋ ءبىلدىردى. «بەس الەۋمەتتىك باستاما» اياسىنداعى ءاربىر باعىت ماڭىزدى ءارى قوعامنىڭ بەلگىلى ءبىر توپتارىنىڭ سۇرانىسىنا ساي اسا قاجەت ۇلكەن مۇمكىندىكتەر الاڭى بولماق.
ايگۇل احانبايقىزى,
«ەگەمەن قازاقستان»
الماتى
