كوميتەت توراعاسى گەورگي كيم شارانى اشا كەلىپ, مەملەكەت باسشىسىنىڭ بەس الەۋمەتتىك باستاماسى جونىندەگى حالىققا ۇندەۋىن ىسكە اسىرۋ قىلمىستىق قۇقىق بۇزۋشىلىقتاردى بولدىرماۋ جانە ازاماتتاردىڭ قاۋىپسىزدىگىن قامتاماسىز ەتۋگە ىقپال ەتەتىنىن, ونىڭ اياسىندا «قىلمىستىق قۇقىق بۇزۋشىلىقتار كارتاسى» اسا ماڭىزدى ەكەنىن اتاپ ءوتتى.
باس پروكۋروردىڭ ورىنباسارى اندرەي لۋكين ينتەرنەت پورتالىندا ورنالاساتىن اقپاراتتار ازاماتتارعا, عىلىمي مەكەمەلەر مەن قوعامدىق ۇيىمدار وكىلدەرىنە ستاتيستيكالىق دەرەكتەردى بەرۋدە اشىقتىقتى ارتتىراتىنىن اتاپ ءوتتى.
وتىرىس بارىسىندا ىشكى ىستەر ءمينيسترىنىڭ ورىنباسارى ەرلان تۇرعامباەۆتىڭ, باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ توراعاسى باعدات ءمۋسيننىڭ باياندامالارى تىڭدالدى.
كوشپەلى وتىرىس بارلىق وبلىستار مەن رەسپۋبليكالىق ماڭىزى بار قالالاردىڭ باسشىلارىمەن جانە قۇقىق قورعاۋ ورگاندارىنىڭ وكىلدەرىمەن بەينە كونفەرەنتسيا بايلانىسى ارقىلى ونلاين تۇرىندە ءوتتى.
وتىرىس بارىسىندا كارتانىڭ مۇمكىندىكتەرى كورسەتىلىپ, ونى قۇقىق قورعاۋ ورگاندارى مەن ازاماتتاردىڭ پايدالانۋىنداعى ارتىقشىلىقتارى تۋرالى ايتىلدى, سونداي-اق ينتەرنەت پورتالىن ودان ءارى دامىتۋ جانە كەڭىنەن قانات جايۋى ماسەلەلەرى دە تالقىلاندى.
وتىرىسقا قاتىسۋشىلار ينتەرنەت پورتالىنداعى اپاتتاردىڭ, كامەلەتكە تولماعاندار جاساعان قىلمىستىق قۇقىق بۇزۋشىلىقتاردىڭ كارتاسىنا نازار اۋداردى. قازىرگى كەزدە كارتاعا استانا مەن الماتى قالالارى, 160 قالا مەن اۋدان ورتالىقتارى, 27 شاعىن قالامەن قوسا 203 ەلدى مەكەن قوسىلعان. 2017 جىلى ينتەرنەت پورتالىنىڭ قىزمەتىن 300 مىڭنان استام ادام پايدالاندى.
تالقىلاۋ بارىسىندا سەناتورلار «قىلمىستىق قۇقىق بۇزۋشىلىقتار كارتاسى» ينتەرنەت پورتالى قىلمىس دەڭگەيىن تومەندەتۋگە ارنالعانىن, سوندىقتان جۇرتشىلىقتى بەلگىلى ءبىر اۋدانداعى, ەلدى مەكەندەگى قىلمىستار جاعدايى تۋرالى ۋاقىتىندا جانە شىنايى اقپارات بەرۋ ازاماتتاردىڭ قاۋىپسىزدىگىن قامتاماسىز ەتۋگە مۇمكىندىك بەرەتىنىن اتاپ ءوتتى.
كوشپەلى وتىرىس قورىتىندىسى بويىنشا قىلمىستىق قۇقىق بۇزۋشىلىقتار ماسەلەلەرى بويىنشا ەلەكتروندىق جانە اقپاراتتىق رەسۋرستارعا قول جەتكىزۋدى جەتىلدىرۋ جونىندە ۇسىنىستار قابىلداندى.
