كونفەرەنتسيا جۇمىسىنا شەتەلدەردىڭ كونستيتۋتسيالىق باقىلاۋ ورگاندارىنىڭ, قۇقىق ارقىلى دەموكراتيا ءۇشىن ەۋروپالىق كوميسسيا, ەۋروپالىق كەڭەس (ۆەنەتسيا كوميسسياسى) جانە قىرعىزستاندا اككرەديتتەلگەن باسقا دا حالىقارالىق ۇيىمداردىڭ وكىلدەرى, سونداي-اق تاياۋ جانە الىس شەتەلدەردىڭ بەلگىلى عالىمدارى قاتىستى.
كونفەرەنتسيا بارىسىندا ق.ءمامي «كونستيتۋتسيانىڭ ۇستەمدىگىن قامتاماسىز ەتۋدە كونستيتۋتسيالىق ادىلەت ورگاندارىنىڭ ءرولى» اتتى ءبىرىنشى سەكتسيانىڭ مودەراتورى رەتىندە ءسوز سويلەدى.
ءوز بايانداماسىندا ول كەلەسىلەردى اتاپ ءوتتى.
«بۇگىندە حالىقارالىق اۋقىمدا كونستيتۋتسيا تۋرالى تەزيس ء«تىرى كونستيتۋتسيا» تۇجىرىمداماسىنا نەگىزدەلىپ, دامىپ وتىراتىن قۇقىقتىق ماتەريا رەتىندە تانىلعان. ونى ودان ءارى جەتىلدىرۋ وعان تۇزەتۋلەر ەنگىزۋ جولىمەن عانا ەمەس, كونستيتۋتسيالىق باقىلاۋ ورگاندارىنىڭ شەشىمدەرى نەگىزىندە دە جۇزەگە اسىرىلىپ كەلەدى. نەگىزگى زاڭنىڭ ەڭ قىمبات قازىناسى – ادام جانە ادامنىڭ ءومىرى, قۇقىقتارى مەن بوستاندىقتارى.
كونستيتۋتسيالىق ادىلەت ورگاندارى وزدەرىنىڭ كۇندەلىكتى قىزمەتىندە وسى ەرەجەلەردى باسشىلىققا الادى جانە ولاردىڭ شەشىمدەرى قۇقىقتىق ۇستەمدىگى قاعيداتىن ومىردە جۇزەگە اسىرۋعا باعىتتالعان.
وسى ۇزدىكسىز پروتسەستە كونستيتۋتسيالىق پراكتيكانى قالىپتاستىرۋعا قاجەتتى جاعداي جاساۋدىڭ ماڭىزى وتە زور. ول كونستيتۋتسيالىق نورمالاردىڭ ناقتى كۇشىن, ولاردىڭ بىركەلكى قولدانىلۋىن قامتاماسىز ەتۋ ءۇشىن قاجەت.
وسى ماقساتتا قازاقستاندا وتكەن جىلى كونستيتۋتسيالىق رەفورما بولدى, ونىڭ ءمانى پرەزيدەنتتىڭ كەيبىر وكىلەتتىكتەرىن پارلامەنت پەن ۇكىمەت اراسىندا قايتا بولۋمەن قورىتىندىلانادى.
كونستيتۋتسيالىق كەڭەس ءوزىنىڭ وكىلەتتىكتەرى شەڭبەرىندە ەل زاڭناماسىنىڭ جۇمىس ىستەۋىنىڭ پارمەندى كەپىلى بولىپ تابىلادى», – دەپ قورىتىندىلادى ءسوزىن ق.ءمامي.
بىشكەك قالاسىندا قازاقستان كونستيتۋتسيالىق كەڭەسىنىڭ توراعاسى بىرقاتار ەلدەردىڭ كونستيتۋتسيالىق ادىلەت ورگاندارى باسشىلارىمەن ەكىجاقتى كەزدەسۋلەر وتكىزدى.
