باتىر قىزدىڭ ەسكەرتكىشى 3,6 مەترلىك, تۇعىرىمەن قوسقاندا بيىكتىگى 6 مەتردەن اسادى. جەرگىلىكتى ماماندار مەن مادەنيەت مينيسترلىگى وكىلدەرىنەن قۇرالعان كوميسسيانىڭ تالقىسىنان ءوتىپ تاڭدالعان ەسكەرتكىش جوباسىنىڭ اۆتورى – بەلگىلى ءمۇسىنشى مۇرات مانسۇروۆ. قادىربولات قابدىر ۇلىنىڭ ايتۋىنشا, ءمۇسىننىڭ جالپى جوباسى دايىن, ءوڭىردىڭ وكىلدەرى ەسكەرتكىش دايىندالىپ جاتقان تسەحقا ارنايى بارىپ, شەبەرلەردىڭ جۇمىس بارىسىن قاداعالاپ, سوڭعى ەسكەرتۋ-ۇسىنىستارىن بىلدىرگەن.
- بۇل ەسكەرتكىش استاناداعى جەڭىس داڭعىلى بويىندا ورناتىلادى, اينالاسىندا حالىق كەلىپ, دەمالاتىن ارنايى سكۆەر بولادى. ول الاڭقايعا ورىندىقتار ورناتىپ, اباتتاندىرۋدى دا ءوزىمىز قولعا الامىز, - دەدى ق.مۇساعاليەۆ.
كەزدەسۋدە ەسكەرتكىش جوباسىمەن تانىسقان زيالى قاۋىم وكىلدەرى وزدەرىنىڭ كەيبىر ۇسىنىس-پىكىرىن ءبىلدىردى. مانشۇكتىڭ بۇدان بۇرىن ورناتىلعان ەسكەرتكىشتەرىندە ماكسيم پۋلەمەتى قوسا بەينەلەنسە, بۇل جولى ول ەلەمەنت جوق. ياعني, باتىر قىز جەلبەگەي جامىلعان شينەلىن قوس قولىمەن قىمتاپ, وڭ اياعىن ءسال العا باسىپ ويلانىپ تۇر. اسكەري كيىمى بولماسا, مامىراجاي بەيبىت بويجەتكەننەن ايىرماسى جوق. «جالپى الەمدىك ۇردىستە ەسكەرتكىشتەرگە قارۋ بەينەلەۋ – سوعىستىڭ, اگرەسسيانىڭ جارناماسىنداي قابىلدانادى. سوندىقتان اۆتورلار مانشۇكتى ۇرىس اراسىنداعى تىنىش ساتىندە, بارىنشا بەيبىت قالىپتا بەينەلەۋگە تىرىسقان. بۇل وسى جەرگە دەمالۋعا كەلەتىن استانا جۇرتشىلىعىنىڭ دا كوڭىلىنەن شىعار دەگەن ويدامىز» دەيدى ق.مۇساعاليەۆ.
وسى جوبانىڭ باسى-قاسىندا جۇرگەن ساراپشىنىڭ ءبىرى, ورال قالاسىنداعى م.مامەتوۆا اتىنداعى مەموريالدىق مۋزەي-ءۇيىنىڭ ديرەكتورى سۆەتلانا بەكتەنوۆا ەسكەرتكىشتىڭ بەت-ءجۇزى باتىر قىزدىڭ وسى كەزگە دەيىن ساقتالعان سۋرەتتەرىنە بارىنشا سايكەس جاسالعانىن ايتادى.
باتىس قازاقستان وبلىسى وسىدان 10 جىل بۇرىن, استانانىڭ 10 جىلدىعىنا وراي ەلورداعا «استانانىڭ قۇرداسى» اتتى كومپوزيتسيالىق كەشەن سىيعا تارتقان بولاتىن. باتىسقازاقستاندىق سۋرەتشى ەرعالي بەكەشوۆتىڭ بۇل تۋىندىسىندا قازاقى ءۇيدىڭ تەرەزەسىنە سۇيەنگەن 10 جاسار بالدىرعان بەينەلەنگەن.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
