بىلتىر «ەكسپو-2017» حالىقارالىق كورمەسى اياسىندا باياناۋىلدا ءتۋريزمدى دامىتۋ ماقساتىندا «سامرۇق-قازىنا» اق-نىڭ ۇيىمداستىرۋىمەن «مەنىڭ ەلىم» اتتى كىشى بيزنەس جوبالار بايقاۋى وتكەن-ءدى. اۋدان ورتالىعىنداعى ش.ايمانوۆ اتىنداعى مەكتەپ-ينتەرنات شىعارماشىلىق توبى دا بايقاۋعا قاتىسىپ جۇلدەگەر اتاندى. شاعىن گرانت 1 ميلليون تەڭگە تۇرادى. وسى قارجىعا 15 ۆەلوسيپەد ساتىپ الىندى. ءسويتىپ «باياناۋىلدا ەكولوگيالىق ۆەلوتۋريزمدى ۇيىمداستىرۋ» جوباسىن باستاپ كەتتى. ماقسات – اۋداندا ۆەلودەسانت توپتارىن قۇرىپ, ەكولوگيالىق ۆەلوتۋريزمدى ۇيىمداستىرۋ, وقۋشىلار ءۇشىن ەكولوگيا, بيولوگيا, گەوگرافيا پاندەرى بويىنشا تەوريالىق جانە پراكتيكالىق ساباقتاردى تابيعات اياسىندا وتكىزۋ. ەكىنشىدەن, اۋىلدىقتاردىڭ دا بوس ۋاقىتتارىن ءتيىمدى پايدالانۋ ارقىلى تۋريزم اۋماعىن قوقىستان تازارتىپ, سالاۋاتتى ءومىر سالتىن ۇستانۋ.
– قازىر باياناۋىلدا باسەكەگە قابىلەتتى تۋريزم كلاستەرىن قالىپتاستىرۋ ءۇشىن كوپ جۇمىستار اتقارىلۋدا. ۆەلوتۋريزم شىلدە-قازان ايلارى ارالىعىندا وتەدى,– دەيدى اۋدان اكىمى ورازگەلدى قايىرگەلدينوۆ. – سوندىقتان «باياناۋىلدا ەكولوگيالىق ۆەلوتۋريزمدى ۇيىمداستىرۋ» جوباسى اۋداندا ءتۋريزمنىڭ دامۋىنا سەرپىن بەرەدى دەپ ويلايمىن.
ال مەكتەپ-ينتەرنات ديرەكتورى سالتانات دوسماعامبەتوۆانىڭ ايتۋىنشا, الەۋمەتتىك كاسىپكەرلىكتى دامىتۋ جوباسى بويىنشا مەكتەپ-ينتەرنات وقۋشىلارىنىڭ بوس ۋاقىتىندا جۇمىسپەن قامتۋدى, ەڭبەككە باۋلۋدى ويلاستىرىپتى. جۇمىسقا 7-9 سىنىپتىڭ ۇل بالالارى تارتىلادى. وقۋشىلار سابىندىكول, جاسىباي كولدەرىنىڭ جاعاجايلارى, جاسىباي باتىر زيراتىنىڭ ماڭايى, باياناۋىل اۋىلىنىڭ ماڭايىنداعى بۇلاقتار, ورمانداردى تازالايدى. ۆەلوسيپەدتەر مەكتەپ-ينتەرناتتىڭ مۇلكى ەسەبىندە تىركەلگەن. تاۋ-تاسقا ىڭعايلى, 8 رەجىمدى جىلدامدىعى بار تاۋلى جەرگە ارنالعان ۆەلوسيپەدتەر. الەۋمەتتىك كاسىپكەرلىك جوباسىنا مۇعالىمدەر ەرجان راحىمتاەۆ, نۇربول ابدۋەۆتەر جەتەكشىلىك جاسايدى. مەكتەپ-ينتەرنات 446 وقۋشىعا ءبىلىم مەن تاربيە بەرۋدە 446 وقۋشىنىڭ 205-ءسى ينتەرناتتا, باياناۋىلدىڭ شالعاي اۋىلدارى جوسالى, اقشي, ەگىندىبۇلاق, كوكدومباق, تورايعىر, قاراتومار, بەلاعاش, جاناتىلەك, ءبىرىنشى مامىر جانە جەكە ورنالاسقان بولىمشەلەر مەن فەرمالاردان كەلگەن وقۋشىلار وقيدى. قالعان 241 بالا اۋدان ورتالىعىندا ءوز ۇيلەرىندە تۇرادى.
ءتىپتى ۆەلوسيپەدتى جالعا العان ادامعا قوقىس سالاتىن قاپ بەرىلەدى. ۆەلوسيپەد ارقىلى دەنساۋلىعىن دا شىنىقتىرادى, قوقىس قالدىقتارىن دا جينايدى. جالعا الۋ قۇنى ساعاتىنا – 500 تەڭگە. تۇسكەن قاراجات وقۋشىلاردىڭ ەڭبەك اقىسىنا, رەسپۋبليكالىق «مەكتەپكە جول» اكتسياسى بويىنشا از قامتاماسىز ەتىلگەن جانە كوپبالالى وتباسىلاردىڭ بالالارىنا كومەك رەتىندە بەرىلىپتى. شاحمات كابينەتىن جابدىقتاۋعا, گيمناستيكا زالىنا جيھاز الۋعا جۇمسالدى.
ءيا, باياناۋىل ءتۋريزمى كەرەمەت-اق. بىراق ءتۋريزمدى دامىتۋمەن بىرگە, تابيعاتتىڭ لاستانۋ جاعدايى الاڭداتادى. ەكولوگيالىق سانا, ەكولوگيالىق مادەنيەتتىڭ تومەن بولۋىنان دەمالۋشىلار سوڭىندا قوقىس قالدىرادى.
– سوندىقتان, – دەيدى مەكتەپ ديرەكتورى سالتانات دوسماعامبەتوۆا. – «باياناۋىلدا ەكولوگيالىق ۆەلوتۋريزمدى ۇيىمداستىرۋ» اتتى بيزنەس-جوبامىزدى «مەنىڭ ەلىم» بايقاۋىنا ۇسىندىق. ءبىزدىڭ مەكتەپ-ينتەرنات ۇجىمى وسى جوبا ارقىلى باياناۋىلدا ءتۋريزمدى دامىتۋ مەن قورشاعان ورتانى ساقتاۋ ماسەلەسىن شەشەتىن جولدى ۇسىنىپ, ۇلەس قوسۋدا. ادام مەن تابيعات اراسىندا بايلانىستى ورناتۋداعى جالپى مادەنيەتتىڭ ءبىر بولىگى رەتىندە ادامدى ەكولوگيالىق مادەنيەتكە تاربيەلەۋ, تازا اۋامەن تىنىستاپ, دەنساۋلىعىن نىعايتۋ كەرەكتىگىن ۇقتىرعىمىز كەلەدى.
فاريدا بىقاي,
«ەگەمەن قازاقستان»
پاۆلودار وبلىسى,
باياناۋىل اۋدانى
سۋرەتتى تۇسىرگەن ەرجان راحىمتاي
