قويىلىمداردى تاماشالاۋعا كوپتەگەن كورەرمەن كەلدى. قۇرمەتتى قوناقتاردىڭ اراسىندا قىزىل تەڭىز پروۆينتسياسىنىڭ گۋبەرناتورى, قازاقستان دوستارى اسسوتسياتسياسىنىڭ توراعاسى احمەد ابداللا, وڭتۇستىك سيناي پروۆينتسياسىنىڭ گۋبەرناتورى حالەد فودا, الەكساندريا پروۆينتسياسىنىڭ گۋبەرناتورى مۇحاممەد سۇلتان, مىسىر مينيسترلىكتەرى مەن ۆەدومستۆولارىنىڭ باسشىلارى, شەتەلدەردىڭ ەلشىلەرى مەن ديپلوماتتارى كەلدى. ولار ءداستۇرلى جانە زاماناۋي مۋزىكالىق ونەردى قامتيتىن قازاق ۇلتتىق مادەنيەتىنىڭ قايتالانباس سينتەزىنە نازار اۋدارا وتىرىپ, قازاقستاندىق ارتىستەردىڭ كاسىبي دەڭگەيىن جوعارى باعالادى.
مىسىرلىق كورەرمەندەردىڭ نازارىنا ۆاگنەردىڭ ۋۆەرتيۋراسى, نيۋربنەرگ مەيستەرزينگەر وپەراسى, پروكوفەۆتىڭ ءبىرىنشى سكريپكا كونتسەرتى, شۋبەرتتىڭ توعىزىنشى سيمفونياسى سياقتى الەمدىك كلاسسيكانىڭ الدىڭعى قاتارلى شىعارمالارى ۇسىنىلدى. ءبىزدىڭ جاس جانە تالانتتى كومپوزيتور, «قازاق موتسارتى» اتانعان راحات-بي ابدىساعيننىڭ «رومانتيزم جاڭعىرىعى» اتتى شىعارماسى ەرەكشە قىزىعۋشىلىق تۋدىردى. سونىمەن قاتار «شابىت» دومبىراشىلار ءانسامبلىنىڭ «اداي», «القيسسا» كۇيلەرىن اسقان شەبەرلىكپەن ورىنداۋى, «ايگولەك» سكريپكاشىلار ءانسامبلى, سونداي-اق انشىلەر باتىرجان سماكوۆ, اسقار مۇقيات, ۇلپان ابدىكارىموۆا, نازىم ساعىنتاي, مارات ايتىمبايدىڭ ونەرلەرى جۇرتشىلىقتى قۋانتتى.
وسى كۇندەرى قازاقستاننىڭ كايردەگى ەلشىلىگى ۇيىمداستىرعان ءىس-شارالارعا مىسىردا تۇراتىن وتانداستارىمىز جانە قازاقستاندىق ستۋدەنتتەر قاتىسىپ, تۋعان جەر اۋەندەرىن تىڭدادى. كونتسەرت سوڭىندا ولار ەلشىلىكتىڭ قىزمەتكەرلەرى مەن ارتىستەرگە كەرەمەت ءىس-شارا ءۇشىن العىستارىن ءبىلدىردى. ولاردىڭ ايتۋىنشا, ەلباسىنىڭ «رۋحاني جاڭعىرۋ» باعدارلاماسى قازاقستاندىقتاردىڭ ۇلتتىق ونەرگە اتسالىسۋىنا عانا ەمەس, شەتەلدىكتەردى وتانىمىزدىڭ كوپقىرلى مادەنيەتىمەن تانىستىرۋعا دا ۇلكەن مۇمكىندىك بەرەدى.
«ەگەمەن-اقپارات»
