«بۇگىن, ەلباسىمىز ن.نازارباەۆ «استانا ەكسپو-2017» ۇلتتىق كومپانياسىنا كورمە نىساندارىن ءتيىمدى جانە لايىقتى قولدانۋ, سونداي-اق, ەكسپو-2017 كورمەسىن وتكىزۋ تاجىريبەسىن ەكونوميكانىڭ بارلىق سالالارىندا پايدالانۋ تۋرالى ناقتى مىندەتتەر قويدى», دەپ اتاپ ءوتتى ۆلاديمير ليۋتوۆ.
ۆلاديمير ليۋتوۆتىڭ ايتۋىنشا, ەكسپو IT-تەحنولوگيالار, ستارتاپتار يننوۆاتسيالىق الاڭى بولۋى كەرەك. قويىلعان مىندەتتەردىڭ اياسىندا ەكسپو اۋماعىندا احقو, «Astana Hub», حالىقارالىق «جاسىل» تەحنولوگيالار ورتالىعى, IT-ۋنيۆەرسيتەت سياقتى اۋقىمدى جوبالار ىسكە اسىرىلماق.
سونداي-اق, كورمە كەزىندە كورپوروتيۆتىك پاۆيلون ورنالاسقان C4.6 پاۆيلونىندا دا قالپىنا كەلتىرۋ جۇمىستارى ءجۇرىپ جاتىر. قايتا قۇراستىرۋ جۇمىستارىنا دەيىنگى اۋدانى – 5 مىڭ شارشى مەتردى, كەيىن – 9,6 مىڭ شارشى مەتردى قۇرايدى. بۇل پاۆيلوندا «Astana Hub» حالىقارالىق IT-ستارتاپتار تەحنوپاركىن ورنالاستىرۋ جوسپارلانىپ وتىر. وندا ءدارىسحانالار, كونفەرەنتس-زالدار, ۆيرتۋالدى اقيقات جوبالارىن وڭدەۋ زەرتحانالارى, سونداي-اق, «Astana Hub» سەرىكتەستەرى مەن اكىمشىلىگى ءۇشىن كەڭسەلەر قاراستىرىلماق. قۇرىلىس جۇمىستارى ۇستىمىزدەگى جىلدىڭ 1 شىلدەسىنە دەيىن اياقتالادى دەپ جوسپارلانۋدا.
«Astana Hub» جوباسى «تسيفرلىق قازاقستان» مەملەكەتتىك باعدارلاماسىنىڭ قۇرامداس ءبىر بولىگى. ءدال وسى ورتالىقتا كەيىن تسيفرلاندىرۋدىڭ جۇزەگە اسىرىلۋىنا ءوز ۇلەسىن قوساتىن قىزىقتى جانە بىرەگەي ستراتاپتار دۇنيەگە كەلمەك.
سونداي-اق, س3 جانە س4 پاۆيلوندارىن قايتا قۇراستىرۋ جۇمىستارى ءجۇرىپ جاتىر. كورمە كەزىندە وندا حالىقارالىق پاۆيلوندار ورنالاسقان بولاتىن. كەلەر جىلى بۇل عيماراتتاردا «استانا» حالىقارالىق قارجى ورتالىعى ورنالاسادى دەپ جوسپارلانۋدا.
احقو كەشەنىنىڭ عيماراتتارى بريام (BREEAM) عيماراتتاردى ەكولوگيالىق ءتيىمدى باعالاۋ ادىسىمەن سەرتيفيكاتتالماق. بۇل تىرشىلىك ارەكەتىنىڭ قاۋىپسىزدىك اسپەكتى, قورشاعان ورتاعا اسەرى مەن جايلىلىقتىڭ جوعارى ساپالى ستاندارتى.
قايتا قۇراستىرۋ جۇمىستارى اعىمداعى جىلدىڭ اياعىنا دەيىن اياقتالماق.
باسقا ەكى حالىقارالىق پاۆيلوندا IT-ۋنيۆەرسيتەت پەن زاماناۋي بيزنەس-ورتالىعى جايعاستىرىلماق. ەكى پاۆيلوننىڭ قايتا قۇراستىرۋ جۇمىستارىنا دەيىنگى اۋدانى – 47,6 مىڭ شارشى مەتردى, كەيىن – 72,3 مىڭ شارشى مەتردى قۇرايدى.
ەكسپو اياسىندا IT-ۋنيۆەرسيتەتتىڭ ورنالاسۋى مەن اشىلۋى بەكەر ەمەس, سەبەبى, ۋنيۆەرسيتەت ەلىمىزدىڭ تسيفرلىق ەكونوميكاسىنا جوعارى بىلىكتى مامانداردى دايىنداۋمەن اينالىسپاق. بيزنەس-ورتالىق بىرىنشىدەن احقو ماقساتى مەن مىندەتتەرىنە قاراي باعىتتالادى. وندا ءىرى حالىقارالىق ۇيىمدار مەن قارجى ينستيتۋتتارى, سونداي-اق, احقو رەزيدەنت-كومپانيالارى ورنالاستىرىلادى.
ەلباسىنىڭ باستاماسىمەن ەكسپو نەگىزىندە, اتاپ ايتقاندا «ۇزدىك تاجىريبەلەر ايماعى» پاۆيلونىندا حالىقارالىق «جاسىل» تەحنولوگيالار ورتالىعى قۇرىلماق. ەكسپوزيتسيالاردىڭ ءبىر بولىگى «ۇزدىك تاجىريبەلەر ايماعى» اياسىندا ساقتالىپ قالسا, ەكىنشىسى «نۇر الەم» پاۆيلونىنا اۋىستىرىلماق. وسىلايشا, ءبىز ەكسپو مۇراسىن ساقتاپ قالامىز. قايتا قالپىنا كەلتىرۋ جۇمىستارىنا دەيىنگى اۋماعى – 3115 شارشى مەتر, ال كەيىنگى – 4,6 مىڭ شارشى مەتردى قۇرايدى.
قالا تۇرعىندارى مەن قوناقتارى اسا قىزىعۋشىلىق تانىتىپ وتىرعان «نۇر الەم» پاۆيلونىنا جاڭا كونتەنت ەنگىزۋ اياسىندا جۇمىستار اتقارىلىپ جاتىر.
پاۆيلونداردى قايتا قۇراستىرۋ جۇمىستارىنان بولەك ءبىز 6 گا قۇرايتىن كورمە اۋماعىنىڭ اباتتاندىرۋ جانە كوگالداندىرۋ جۇمىستارىن قارقىندى جۇرگىزىپ جاتىرمىز. وسىلايشا, «تاۋەلسىزدىك» مونۋمەنتى جاعىنان پارك اۋماعى جالعاستىرىلماق. پارك اۋماعى كەزىندە تسيرك ديۋ سولەي, امفيتەاتر, شەلل پاۆيلونى ورنالاسقان الاڭدا ورنالاسادى.
اۋقىمدى قۇرىلىس جۇمىستارىنىڭ جۇرگىزىلۋىنە قاراماستان, استانا كۇنىنە وراي ەكسپو اۋماعىندا قوناقتاردىڭ دەم الۋىنا بارلىق مۇمكىندىكتەر جاسالادى.
پاۆيلونداردى جاعالاي بۋلۆار اشىلماق. مۇندا كورمە كەزىندە كەلۋشىلەر مەن تۋريستەردىڭ كوڭىلىنەن شىققان جالىندى سۋ بۇرقاقتار شوۋى جۇمىس ىستەي باستايدى. شاعىن ءدامحانالار مەن مەيرامحانالار دا جاڭا ماۋسىمعا دايىندىقتارىن باستاپ كەتتى. وعان قوسا, بالالارعا ارنالعان, سونىڭ ىشىندە ەرەكشە سۇرانىستى تالاپ ەتەتىن بالالارعا بەيىمدەلگەن ويىن الاڭدارى جۇمىس ىستەيتىن بولادى.
سونداي-اق, جازعى جانە كۇزگى ماۋسىمعا اۋقىمدى مادەني ويىن-ساۋىق شارالارى جوسپارلانىپ قويدى. كونتسەرتتىك باعدارلامالاردى وتكىزۋ ءۇشىن اشىق ساحنا جۇمىس ىستەيتىن بولادى. قوناقتارىمىزدى توسىن جايتتار مەن سۇيىكتى الەمدىك جۇلدىزدارىمەن كەزدەسۋلەر كۇتۋدە.
