ەلباسىنىڭ «رۋحاني جاڭعىرۋ» باعدارلاماسى اياسىندا وتكەن جىلى جەرگىلىكتى بيۋدجەت ەسەبىنەن 197 ميلليون, ال دەمەۋشىلەر ەسەبىنەن 898 ميلليون تەڭگەگە ءتۇرلى جوبالار مەن ءىس-شارالار ۇيىمداستىرىلدى. اتالعان باعدارلامانىڭ 4 كىشى باعىتى «تاربيە جانە ءبىلىم», «رۋحاني قازىنا», «اتامەكەن» جانە «اقپارات تولقىنى» بويىنشا 22 جوبا قولعا الىنىپ, ءتۇرلى ءىس-شارالار وتكىزىلدى. سونىمەن قاتار, «تۋعان جەر» ارنايى جوباسى بويىنشا وتكەن جىلى وڭىردە «تۋعان جەرگە تۋىڭدى تىك!» اكتسياسى وتكىزىلىپ, مەتسەناتتاردىڭ ءتىزىمى مەن ولار حالىققا پايدالانۋعا بەرەتىن نىسانداردىڭ تىزبەسى جاساقتالدى. ناتيجەسىندە مەتسەناتتار مەن اۋدان اكىمدەرى اراسىندا مەموراندۋمعا قول قويىلىپ, بيىل جالپى قۇنى 3,1 ميلليارد تەڭگەگە 38 الەۋمەتتىك نىسان ەل يگىلىگىنە بەرىلىپ, اۋىلدار اباتتاندىرىلاتىن بولادى. ال اعىمداعى جىلى جالپى قۇنى 3,6 ميلليارد تەڭگەگە 78 كىشى جوبا مەن 53 ءىس-شارا جوسپارلانىپ وتىر. ونىڭ ىشىندە 510,5 ميلليون تەڭگە جەرگىلىكتى بيۋدجەت ەسەبىنەن, ال 3,1 ميلليارد تەڭگە مەتسەناتتار ەسەبىنەن قارالعان. سونىمەن قاتار, «قازاقستاننىڭ ساكرالدى گەوگرافياسى» جوباسى اياسىندا جامبىل وبلىسىنان بۇل تىزىمگە مەركە-جايسان تۇركى عۇرىپتىق كەشەنى, اقىرتاس كەشەنى, «ەجەلگى تاراز قالاشىعى», «تەكتۇرماس» كەشەنى, «قاراحان», «ايشا ءبيبى», «بابادجا حاتۋن» جانە «بايزاق باتىر مامبەت ۇلى» كەسەنەلەرى سياقتى 8 تاريحي ورىن ەنگىزىلگەن. بيىل وڭىردەگى ساكرالدى ورىنداردى ناسيحاتتاۋ ماقساتىندا 121,7 ميلليون تەڭگەگە 8 جوبا جۇزەگە اسىرىلاتىن بولادى.
سونداي-اق, الداعى مامىر ايىندا «اۋليەاتانىڭ كيەلى جەرلەرى» كىشى جوباسى اياسىندا وڭىردەگى تاريحي ورىنداردىڭ ەلەكتروندى كارتاسى جاسالادى. بۇل ماقساتقا وبلىستىق مادەنيەت, ارحيۆتەر جانە قۇجاتتاما باسقارماسىنان 25 ميلليون تەڭگە قاراستىرىلۋدا. اعىمداعى جىلدىڭ ەكىنشى جارتىجىلدىعىنان باستاپ «ايشا ءبيبى» ۆيدەوروليگى تۇسىرىلەدى. بۇل ماقساتقا وبلىستىق تۋريزم باسقارماسىنان 52,8 ميلليون تەڭگە قاراستىرىلۋدا.
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەردى جۇزەگە اسىرۋ اياسىندا وڭىردە بيىل 474 ميلليون تەڭگەگە 7 مادەني سالا بويىنشا جانە 876,7 ميلليون تەڭگەگە 21 سپورت سالاسى بويىنشا جوبالار ىسكە اسىرىلىپ, 40-تان استام اۋىلدىڭ ينفراقۇرىلىمى جاڭعىرتىلادى. سونىمەن قاتار وتكەن جىلى وبلىستا ء«بىر ءسابي – ءبىر اعاش» جوباسى قولعا الىنىپ, ءبىر كۇندە دۇنيە ەسىگىن اشقان مىڭ سابيگە ارنالىپ 1000 ءتۇپ اعاش وتىرعىزىلعان بولاتىن. اتالعان جوبا ەلىمىز بويىنشا ۇزدىك جوبالار قاتارىنا ەنىپ, بيىل استانا قالاسىندا جالعاسىن تابادى.
وتكەن جىلى ەلىمىزدە «قازاقستاننىڭ 100 جاڭا ەسىمى» جوباسى قولعا الىنعان بولاتىن. اتالعان جوباعا جامبىل وبلىسىنان 12 ۇمىتكەر قاتىسىپ, 8 ازامات جەڭىمپاز اتانعانىن ايتا كەتۋ كەرەك. سونداي-اق ەلىمىزدىڭ ءاربىر ازاماتى وقۋى ءتيىس «100 جاڭا كىتاپ» ارنايى جوباسىن ىسكە اسىرۋ اياسىندا وڭىردەگى جوعارى وقۋ ورىندارىنان 39 ادەبيەت ۇسىنىلىپ وتىر. سونىمەن قاتار «قازاق ءتىلىن لاتىن گرافيكاسىنا كوشىرۋ» ارنايى جوباسى اياسىندا جوعارى وقۋ ورىندارىنان لاتىن ءالىپبيىن وقىتاتىن ارنايى كافەدرالار اشىلىپ, «لاتىن ءالىپبيىن وقىتۋ» ارنايى وقىتۋ كۋرستارى ەنگىزىلدى.
– وتكەن جىلى تاراز قالاسىنداعى دوستىق ۇيىندە «رۋحاني جاڭعىرۋ» باعدارلاماسىنىڭ ارنايى جوبالارىن ىسكە اسىرۋ, ولاردى ءبىر جەرگە توپتاستىرىپ جۇمىس جۇرگىزۋ بويىنشا ينتەراكتيۆتى الاڭدار اشىلعان بولاتىن. ونداعى زاماناۋي قۇرىلعىلار ارقىلى باعدارلاما اياسىنداعى جوبالاردىڭ ينتەراكتيۆتى بازاسىمەن تانىسۋعا, بەلگىلى اقىن-جازۋشىلاردىڭ شىعارمالارىن ەلەكتروندى نۇسقادا وقۋعا, ولاردىڭ اۋديوجازبالارىن تىڭداۋعا, لاتىن ءالىپبيىن جانە اعىلشىن ءتىلىن ۇيرەنۋگە مۇمكىندىك جاسالعان, – دەيدى وبلىستىق ىشكى ساياسات باسقارماسىنىڭ باسشىسى عاليا بورانباەۆا.
ايتا كەتەيىك, ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ اياسىندا وسىنداي ورتالىقتار تاراز قالاسى مەن اۋدانداردىڭ 256 ورتا مەكتەبىندە, 25 كوللەدجدە اشىلعان. ينتەراكتيۆتى الاڭدار ارقىلى اۋدانداردا اشىلعان ورتالىقتارمەن تىكەلەي بايلانىسقا شىعىپ, كەز كەلگەن ۋاقىتتا ءتۇرلى ءىس-شارالار ۇيىمداستىرۋعا بولادى.
حاميت ەسامان,
«ەگەمەن قازاقستان»
جامبىل وبلىسى
