ۇكىمەتتىڭ اگرارلىق سەكتوردى دامىتۋعا دەگەن تالپىنىسى ۇلكەن ءۇمىت تۋدىرادى. دەگەنمەن ءوز اۋلاسىندا مال وسىرەتىن جەكە شارۋاشىلىقتارعا دەگەن قولداۋلار ءالى دە ماردىمدى بولماي تۇر. ال بۇلار ىشكى رىنوكتاعى ەت پەن ءسۇت ونىمدەرىنىڭ 75-80 پايىزىن, جۇمىرتقا مەن قۇس ەتىنىڭ جارتىسىن بەرەدى. اسا قاجەتتى كارتوپ سياقتى كوكونىستەردىڭ دە جارتىسى وسىلاردىڭ ۇلەسىندە. «اۋىلشارۋاشىلىق كووپەراتيۆتەرى تۋرالى» زاڭ اۋىل تۇرعىندارىنىڭ باسەكەگە قابىلەتتىلىگىن ارتتىرۋ ءۇشىن ماتەريالدىق, قاراجاتتىق الەۋەتتەرىن بىرىكتىرۋدى قاراستىرعان. الايدا ونىڭ ورىندالىپ جاتقانىن كورمەي ءجۇرمىز. قازىر كووپەراتيۆتەر دەپ بۇرىننان كەلە جاتقان فەرمەرلىك ۇيىمداردى جانە شارۋا قوجالىقتارىن اتايتىن بولىپتى, وسىلايشا جەرگىلىكتى ورگاندار ولاردىڭ سانى ارتتى دەپ كورسەتەدى. بىراق بۇلار ناعىز كووپەراتيۆتەر ەمەس. زاڭ اۋىل, سەلو تۇرعىندارىنىڭ اۋلاداعى شارۋاشىلىقتارىندا كووپەراتيۆتەر اشۋدى كوزدەگەن ەدى, ءىس جۇزىندە ونىڭ تالاپتارى قاعاز بەتىندە عانا ورىندالىپ تۇر. سوندىقتان دا اۋلاسىنداعى جەكەمەنشىك مالدارىن وسىرەتىندەردىڭ بەينەتى ءالى دە ازايماۋدا, ولار مالدارىنا جەم-ءشوپتى وزدەرى دايىنداي المايتىن بولعاندىقتان, قىمباتقا ساتىپ الۋعا ءماجبۇر. ساۋىن اپپاراتتارى دا جوق, ءدان ۇگەتىن تەحنيكالارى جانە باسقا دا قۇرال-جابدىقتارى بولمايدى, سوندىقتان ءبارىن دە قولمەن ىستەيدى. وسىنداي بەينەتى مول جۇمىستاردىڭ سەبەبىنەن مال باسىن كوبەيتە الماي وتىر. كووپەراتيۆتەر وسى ماسەلەنىڭ شەشىم تابۋىنا ىقپال ەتىپ, جەكە مال وسىرۋشىلەردىڭ بەينەتىن ازايتار دەگەن ءۇمىتىمىز اقتالمادى. ال اۋىلشارۋاشىلىق سالاسىنداعى شەنەۋنىكتەر جەكە شارۋاشىلىقتاردى ۇلكەن قۇرىلىمدارعا قوسۋ كەرەك دەگەندى ايتادى. ءبىز ونىڭ قالاي بولاتىنىن بىلەمىز, كەزىندە باستان وتكىزدىك قوي. جەكەشەگە بەرىلگەن جەر ۇلەستەرىن ۇلكەن اۋىلشارۋاشىلىق قۇرىلىمدارىنا بەرگەن تۇرعىندار قازىر سودان ەشقانداي پايدا كورمەي وتىر. كەزدەسكەن تۇرعىنداردىڭ ءبارى بىزگە جەر ۇلەستەرىن بەرگەنى ءۇشىن پاي الا الماي جۇرگەندەرىن ايتىپ, شاعىمدانادى.
اۋىلداعى اۋلالىق جەكە شارۋاشىلىقتاردىڭ دامۋىنا مەملەكەتتىك تۇرعىدان ىقپالدى كومەك بولماسا تۇرعىنداردا اۋىلشارۋاشىلىق ونىمدەرىن وندىرۋگە دەگەن ەنجارلىق تۋىپ, قالاعا كوشۋدى اڭسايدى. 2011 جىل مەن 2017 جىلداردى سالىستىراتىن بولساق, مال باسى 1,2 ميلليونعا, ياعني 25 پايىزعا ازايىپ كەتىپتى. سايىپ كەلگەندە بۇل ەلىمىزدىڭ ازىق-ت ۇلىك قاۋىپسىزدىگىنە نۇقسان كەلتىرەرى ءسوزسىز. بىزدىڭشە, وسى تىعىرىقتان تالاپقا ساي قۇرىلعان كووپەراتسيا عانا قۇتقارا الادى. سوندىقتان وسى ءىستى جانداندىرىپ, دۇرىس جولعا قويۋدى ۇسىنىپ, ءبىز پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ءو.شوكەەۆتىڭ اتىنا دەپۋتاتتىق ساۋال جولدادىق.
ۆلاديسلاۆ كوسارەۆ,
ءماجىلىس دەپۋتاتى
