رەسپۋبليكالىق بايقاۋعا 18-30 جاس ارالىعىنداعى انشىلەر قاتىساتىن بولادى. قاتىسۋشىلاردىڭ ونەر كورسەتۋ رەتتىلىگى الدىن-الا جەرەبە تاڭداۋ ارقىلى انىقتالماق.
بايقاۋدىڭ باستى ەرەكشەلىگى انشىلەرگە مينۋسوۆكادا بەك-ۆوكالدى قولدانۋعا رۇقسات بەرىلمەيدى. كونكۋرستىڭ ءبىرىنشى كەزەڭىندە تالاپكەر ەركىن تاقىرىپتاعى ءاندى فونوگراممامەن (مينۋس-1) ورىنداسا, ءىى كەزەڭدە باتىرحان شوكەنوۆتىڭ ءانىن ينسترۋمەنتالدى ءانسامبلدىڭ سۇيەمەلدەۋىمەن ايتۋى ءتيىس. قاتىسۋشىلاردىڭ ونەرىن باعالايتىن قازىلار القاسىنىڭ قۇرامىندا بەلگىلى كاسىبي مۋزىكانتتار, كومپوزيتورلار, وڭدەۋشىلەر مەن مادەنيەت جانە ونەر قايراتكەرلەرى بولادى. رەسەيدەن تانىمال مۋزىكانتتار مەن بەلگىلى تۇلعالار ارنايى قوناققا كەلمەك.
كونكۋرستى ۇيىمداستىرۋعا قىزىلوردا وبلىسى مادەنيەت, ارحيۆتەر جانە قۇجاتتاما باسقارماسى مەن «تاڭداۋ» پروديۋسەرلىك ورتالىعى كىرىستى.
«ال 18 مامىردا بايقاۋ ۇمىتكەرلەرىنىڭ قاتىسۋىمەن اشىق اسپان استىندا باتىرحان شوكەنوۆتى ەسكە الۋعا ارنالعان گالا-كونتسەرت بولادى. ءدال وسى كۇنى انشىگە ەسكەرتكىش قويىلىپ, اس بەرىلەدى. سونىمەن قاتار, ونەرپازدار تال وتىرعىزىپ, قالانى كوگالداندىرۋ جۇمىسىنا دا ات سالىسادى. بايقاۋ تۇڭعىش رەت 2016 جىلى وتكىزىلىپ, وعان 27 ونەرپاز قاتىسقان ەدى» دەيدى شارانى ۇيىمداستىرۋشىلار.
ايناش ەسالي,
«ەگەمەن قازاقستان».
الماتى
