ادامزات بالاسىنىڭ استرولوگيالىق بولجامدارعا يەك ارتۋى قاي زامانداردان باستاۋ العان ءوزى؟ ماسەلەن, ەكاتەرينا مەديچي بارلىق كەزدە ءوز استرولوگى نوسترادامۋسپەن اقىلداسىپ وتىرعانىن, ءXVى ليۋدوۆيكتىڭ دە جۇلدىز ساناۋشىسى بولعانى ايان. ايتقانداي, ليۋدوۆيكتىڭ جۇلدىز جورامالشىسى وعان 21 قاڭتاردا ساق بولۋ كەرەكتىگىن ەسكەرتكەنىمەن, كورول بۇل كەڭەسكە اسا قۇلاق قويمايدى. اقيقاتىندا, ءدال وسى كۇنى كورول جازالانعان. تىزە بەرسەڭ تاريحتا مۇنداي مىسالدار جەتكىلىكتى. ەسەسىنە جورامالشىلاردىڭ جاڭساق بولجامدارى ودان دا كوپ.
ەڭ ەجەلگى گوروسكوپقا درۋيدتەردىڭ جۇلدىز جورامالدارىن جاتقىزۋعا بولادى. ودان دا بولەك زورواستريالىق, قىتاي, جاپون گوروسكوپتارى بار. ال جاپون جۇلدىز جورامالى 12 جىلدىق ەمەس, 13 جىلدىق تسيكلعا يە. قىش كەسەنەلەرگە جازىلعان ۆاۆيلون جۇلدىز جورامالدارىنىڭ 2,5 مىڭ جىلدىق تاريحى بار. گرەك جۇلدىزنامالارى ءبىزدىڭ داۋىرىمىزگە دەيىنگى 62 جىلى جازىلعان نەمەسە پايدا بولعان. وسىلاردىڭ ىشىندەگى ەڭ ايگىلىسى زودياكتىق گوروسكوپ. «زودياك» – لاتىن ءسوزى, ءبىز ويلاعانداي «جانۋارلار شەڭبەرى» ەمەس, ء«ومىر شەڭبەرى» دەگەن ماعىنانى بىلدىرەدى.
وسى ارادا ءXVى عاسىرعا دەيىن استرونوميا مەن استرولوگيا تىعىز قارىم-قاتىناستا بولىپ كەلگەنىن ايتا كەتەلىك. ۋاقىت وتە كەلە استرولوگيالىق بولجاۋ كەستەلەرى جەكە ادامدارعا عانا ەمەس, تۇگەل ءبىر ۇلتقا, ۇيىمدار مەن ءتىپتى ءۇي جانۋارلارىنا دەيىن جاسالىنا باستاعان.
قىسقاسى, استرولوگيا مەن استرونوميانىڭ جولدارى قاي جەردە ايىرىلىسقانىن انىقتاماس بۇرىن, مىنا ءبىر ماسەلەگە نازار اۋدارىپ كورەيىكشى. ماسەلەن, ءبىر پەرزەنتحانادا ءبىر مەزەتتە قانشاما ءسابي دۇنيە ەسىگىن اشادى. بىراق سول سابيلەردىڭ ءبارىنىڭ تاعدىرى بىردەي بولاتىنىنا كىم كەپىلدىك بەرەدى؟
مىنا ءبىر قىزىقتى قاراڭىز, وسىدان ءدال جيىرما جىل بۇرىن, 1987 جىلى فرانتسۋز استرونومى پول كوۋدەرك ءبىر گازەتكە بارلىق تىلەك بىلدىرۋشىلەرگە تەگىن جۇلدىز جورامال جاساپ بەرۋگە جارناما بەرەدى. سونىمەن ول بارلىق رەسپوندەنتتەرگە بىردەي جالعان بولجامدار جولدايدى. جانە ءاربىر جۇلدىز جورامالعا مىناداي تەكتەس سوزدەر قوسادى: ء«سىزدىڭ ىشكى جان دۇنيەڭىزدە شيەلەنىس بار», «كەيدە ءسىز ادامداردى قاپالاندىراسىز», «ومىرىڭىزدە كوپتەگەن شەشىلمەگەن ماسەلەلەر بار» جانە ت.ت. ناتيجەسىندە ولار بۇل گوروسكوپتاردىڭ وزدەرىنىڭ بولمىستارىنا ءدوپ كەلگەنىن مويىنداعان. تاڭ قالارلىق تۇگى جوق. پەندەلەردىڭ ءبارىنىڭ باسىندا شەشىلمەگەن ماسەلەسى, بىتپەگەن ءىسى بولادى. ال ەندى ءسىز اقىلدىسىز, قايىرىمدىسىز دەگەن جالپىلاما جاعىمدى سوزدەن كىم باس تارتسىن!
تاعى ءبىر مىسال, امەريكالىق پسيحولوگ 1999 جىلى ءبىر باسىلىمعا انكەتا سۇراقتارىن جاريالايدى دا, قايتارىمىنا ول وسى ساۋالدارعا تۇگەل جاۋاپ بەرگەندەرگە ەگجەي-تەگجەيلى تەگىن گوروسكوپ جىبەرۋگە ۋادە ەتەدى. بۇل تاجىريبەگە 150-دەي ادام قايىرىلىپ, بارلىق ادامعا بەرىلگەن ۋادە ورىندالىپ, بىراق بارىنە بىردەي جۇلدىز جورامال جىبەرىلەدى. بۇل سىناققا قاتىسقان ادامداردىڭ 94 پايىزى وزدەرىنىڭ ءدال وسى گوروسكوپتاعىداي دۇرىس سۋرەتتەلگەنىن مالىمدەگەن.
ەڭ قىزىعى, بۇل ساۋەگەيلىكتى 27 ادامنىڭ جانىن جاھانامعا جىبەرگەن قىلمىسكەر مارسەل پەتويت دەگەن قانىشەر جاساعان. ول ءوزىنىڭ قۇرباندارىن ۇيىنە الداپ شاقىرىپ, توناپ, سوسىن ءولتىرىپ, سوندىرىلمەگەن اكپەن ەرىتىپ جىبەرىپ وتىرعان. ايىپتالۋشى سوتتا 27 ەمەس, شىندىعىندا 63 ادام ءولتىردىم دەپ, ءمىز باقپاي, ميىعىنان ك ۇلىپ تۇرعان… مىنە, جۇلدىز جورامالدار قالاي ء«دال» بولجانادى!..
ءبىر جاعىنان, جۇلدىز جورامالداردى پسيحولوگيالىق تەراپيا دەپ تە ايتۋعا بولادى. پسيحولوگتەر استرولوگيالىق بولجامدارعا, كورىپكەل-بالگەرلەرگە كوبىنەسە وزىنە ءوزى سەنبەيتىندەر يەك ارتاتىنىن العا تارتادى.
ماسەلەن, جۇلدىز جورامالدان «بۇگىن بيكەشتەردىڭ جولى بولادى. ىزدەگەن ادامىڭىزعا جولىعاسىز» نەمەسە «تورپاقتار ءتيىمدى قارجىلىق كەلىسىمشارتقا قول جەتكىزۋى مۇمكىن» نەمەسە «توقتىلاردى قىزمەت بابىندا جاڭا باسپالداقتار كۇتىپ تۇر» دەگەن بولجامداردى ءجيى وقيمىز. وسى كۇنى نەمەسە ايتىلعان اپتادا بۇكىل سۋقۇيعىش بىتكەننىڭ لاۋازىمى ءوسىپ, سۇيىكتىسىمەن رەنجىسىپ بولماسا, مەرگەندەردىڭ ءبارى ءبىر مەزەتتە ىزدەگەن ماحابباتىنا جولىعىپ جاتىر ما؟
ايناش ەسالي,
«ەگەمەن قازاقستان»
