سۋرەتتى تۇسىرگەن دارينا تورەمۇرات
ەلگە ەل قوسىلسا – قۇت. بۇل كۇندەرى قازاق تىلىندە ءبىلىم بەرەتىن مەكتەپتە 400-دەي وقۋشى, ورىس تىلىندەگى مەكتەپتە 366 وقۋشى بار. ورىس مەكتەبىندە 130-داي قازاق بالاسى وقىپ ءجۇر. 1-5 جاستىڭ ارالىعىندا 400-دەي ءبۇلدىرشىن ءوسىپ كەلەدى. بالا سانىمەن بىرگە قونىستانۋشىلار دا كوبەيۋدە. ءوندىرىستى كەنت سانالاتىن ەلدى مەكەن, تۇرعىندارىنىڭ كوپشىلىگى ءزاۋلىم بيىك مۇرجالارى بار الىپ ستانسادا ەڭبەك ەتۋدە. بىرنەشە شارۋا قوجالىعى, شاعىن جانە ورتا بيزنەس نىساندارى جۇمىس ىستەيدى. تۇرعىنداردىڭ بالالار جاڭا مەكتەپتە ءبىلىم السا دەگەن وتىنىشتەرى دە ورىندالار كۇن جاقىن. قازىر 420 ورىندىق قازاق تىلىندە ءبىلىم بەرەتىن مەكتەپ قۇرىلىسىن سالۋ ءۇشىن ەكىباستۇز قالاسى اكىمدىگىنىڭ قۇرىلىس ءبولىمى قۇجاتتامالىق سمەتا جوباسىن دايىنداۋدا. رەسپۋبليكالىق بيۋدجەت قاراجاتىنا سالىناتىن قۇرىلىستى جەرگىلىكتى مەردىگەر كومپانيا جۇرگىزبەكشى. بۇل قۋانىشتى جايت قالا اكىمى قايرات نۇكەنوۆتىڭ حالىقپەن بولعان ەسەپتى كەزدەسۋىندە ايتىلدى.
ناۋرىز مەيرامى كۇنى مەكتەپ سالىناتىن قۇرىلىس الاڭىنا مۇعالىمدەر, وقۋشىلار, اتا-انالار جينالدى. سۇيىنشىلەپ, ءبىر-ءبىرىن قۇتتىقتاعان كەنتتىڭ ۇلكەندەرى انۋربەك, قالياسقار قاجىلار, كلارا, ءزارۋ, بيعايشا اجەلەر «مەكتەپتىڭ ىرگەتاسى بەرىك, شاڭىراعى بيىك بولسىن!» دەپ باتا جاسادى. شاشۋ شاشىلدى. وقۋشىلار مەكتەپكە كەلەر جولعا اعاش ەكتى. كەنت اكىمى مارجان الشىمباەۆا دا قۇتتىقتاۋ ءسوز سويلەدى.
ال اباي اتىنداعى مەكتەپ ديرەكتورى ايمان كەنجەباەۆانىڭ ايتۋىنشا, اۋىل ۇلكەندەرى كوپتەن كۇتكەن قۋانىشتى ناۋرىز تويىمەن بىرگە مەكتەپ سالىناتىن جەردە اتاپ وتۋگە ۇسىنىس ءبىلدىرىپتى. وسى قۋانىشتى ەل گازەتى «ەگەمەنمەن» دە بولىسكىمىز كەلدى دەيدى اۋىلدىقتار.
فاريدا بىقاي,
«ەگەمەن قازاقستان»
پاۆلودار وبلىسى,
ەكىباستۇز قالاسى
