جيىن بارىسىندا «BI-جۇلدىزاي» كورپوراتيۆتىك قورىنىڭ ديرەكتورى, قازىلار القاسىنىڭ ءتورايىمى گۇلحان يساباەۆا فەستيۆال اعىمداعى جىلدىڭ 6-24 ءساۋىرى ارالىعىندا وڭىرلەردە وبلىستىق ىرىكتەۋ كەزەڭدەرى, 26-28 مامىر ارالىعىندا استانا قالاسىندا, رەسپۋبليكالىق كەزەڭ جانە گالا-كونتسەرت 1 ماۋسىم – بالالاردى قورعاۋ كۇنىنە وراي, قازاقستاندىق ەسترادا جۇلدىزدارىنىڭ قاتىسۋىمەن وتەتىنىن اتاپ ءوتتى.
«فەستيۆال اياسىنداعى بايقاۋلار 6 اتالىم بويىنشا وتەدى. ولار: ۆوكال, اسپاپتا ورىنداۋ, ىم-يشاراتپەن ورىنداۋ, حورەوگرافيا, بەينەلەۋ ونەرى, كوركەم-قولدانبالى ونەر. قور 2016 جىلدان بەرى سپورت باعىتىن دامىتىپ, ءبىلىم الۋداعى ەرەكشە مۇقتاجدىعى بار بالالاردى سالاماتتى ءومىر سالتى مەن سپورتپەن اينالىسۋعا ىنتالاندىرۋعا ىقپال ەتۋى ءتيىس «جۇلدىزاي» رەسپۋبليكالىق سپارتاكياداسىن وتكىزىپ كەلەدى. بۇل بالالار دەنساۋلىعىن جاقسارتۋ مەن وڭالتۋعا وڭ اسەرىن تيگىزۋدە. جارىستار ەلدىڭ بارلىق وڭىرىندە سپورتتىڭ 7 ءتۇرى بويىنشا وتەتىن بولادى: شاعىن فۋتبول, ۇستەل تەننيسى, وتىرىپ وينايتىن ۆولەيبول, جەڭىل اتلەتيكا (جۇگىرۋ, ەستافەتا), ۇلتتىق سپورت تۇرلەرىنەن جارىس («بەستاس», «اسىق اتۋ»), گولبول, ءجۇزۋ. وبلىستىق ىرىكتەۋ جارىستارى وتكىزىلگەننەن كەيىن, قىركۇيەك ايىندا, استانا قالاسىنىڭ وزىق سپورت الاڭدارىندا رەسپۋبليكالىق سپارتاكيادا وتەدى», دەدى ول.
راۋان قايدار,
«ەگەمەن قازاقستان»
