نەگىزىنەن, اۋدان ورتالىعى جەلەزين اۋىلىنداعى №3 جالپى ءبىلىم بەرەتىن قازاق مەكتەبىنە مىرجاقىپ دۋلات ۇلىنىڭ ەسىمىن بەرۋ – وزبەكستاننىڭ ۇشقۇدىق جاعىنان كوشىپ كەلگەن ورالمان اعايىنداردىڭ باستاماسى. جەتەكتەپ كەلگەن ۇل-قىزدارىمەن اۋدان ورتالىعىندا ءومىرى بولماعان قازاق مەكتەبىن اشتىردى. ايتپاقشى جەلەزيننىڭ بايىرعى اتاۋى ءۇرلىتۇپ دەسەك, وسى ءۇرلىتۇپ جەرىندە 1931-1932 جىلدارى قولدان جاسالعان اشتىقتان بوسقان قازاقتى ەدىگە ءبيدىڭ اۋىلدارىندا قالدىرۋعا ۇگىتتەۋ ءۇشىن ولكەلىك پارتيا كوميتەتىنىڭ تاپسىرماسىمەن قىزىلوردادان عابيت مۇسىرەپوۆ كەلەدى. اۋدانداعى سول اۋىل قازىر وزەرنىي اتالىپ تۇر. وتكەن تاريحقا قازىرگى كۇننىڭ ەلدىك ماقسات-مۇددەسىمەن قارايتىن بولساق, عيبراتتى تانىمدىق اتاۋلار بۇلاي كولەڭكەدە قالا بەرمەس ەدى.
مەكتەپ ديرەكتورى التىن سمايىلحانوۆانىڭ ايتۋىنشا, اۋدان اۋماعىنداعى عيبرات الارلىقتاي وتكەننىڭ رۋحاني قۇندىلىقتارىن ءبىلۋ, ناسيحاتتاۋ پارىز. وقۋشىلار ساباقتان تىس ۋاقىتتا «ابايتانۋ», «ماعجان وقۋلارى», «ەلتانۋ», سياقتى تانىمدىق-تاريحي ۇيىرمەلەرگە قاتىسادى. مەكتەپتىڭ قاي وقۋشىسى بولسىن ماعجان ءومىرى جايلى اڭگىمە ءوربىتىپ, اقىننىڭ عيبراتتى جىرلارىن تەبىرەنىسپەن وقىپ بەرەدى. مۇندا «اكەلەر مەكتەبى», «انالار مەكتەبى» جۇمىس جاسايدى. سونداي-اق «مەنىڭ وتباسىمنىڭ داستۇرلەرى», «بۇرىمدى ارۋ» ,«قىز قىلىعىمەن سۇيكىمدى», «بويجەتەر قىز», «جىگىتكە جەتپىس ونەر دە از», «ەرجەتەر ۇل» تاقىرىبىندا تاعىلىمدى بايقاۋلار ءداستۇرلى تۇردە وتكىزىلەدى. بايقاۋلاردا حالقىمىزدىڭ «اسار» ءداستۇرى جايلى ايتىپ, وقۋشىلار شاعىن كورىنىستەر قويدى. سونىمەن بىرگە «بالاپان» اتتى قازاق تىلىندە ءتالىم-تاربيە بەرەتىن بالاباقشاعا 100 بالا كەلەدى. جىل سايىن قازاق تىلىندە ءبىلىم الاتىن وقۋشىلار قاتارى كوبەيىپ كەلەدى. بۇل كۇندەرى مەكتەپتە 18 وقۋ كابينەتى, سپورت زالى بار. ونىڭ ىشىندە 10 مۋلتيمەديا كەشەنى, روبوتتى تەحنيكا, ينفورماتيكا كابينەتتەرى, 6 ينتەراكتيۆتى تاقتا, 396 ەلەكتروندى وقۋلىق بار.
ال جۋىردا اۋدان ورتالىعىنداعى جالپى ءبىلىم بەرەتىن №3 جەلەزين قازاق ورتا مەكتەبىنىڭ وقۋشىلارى, مۇعالىمدەرى, اتا-انالارى ءۇشىن قۋانىشتى حابار جەتتى. 2011 جىلدان بەرى وبلىستىق ونوماستيكالىق كوميسسيانىڭ مەكتەپكە مىرجاقىپ دۋلات ۇلىنىڭ ەسىمىن بەرۋ جونىندەگى ۇسىنىسى ەندى قولداۋ تاپقانداي. وبلىستىق ءماليحاتتىڭ كەزەكتى سەسسياسىندا وبلىستىق تىلدەردى دامىتۋ باسقارماسى وبلىس اكىمدىگى مەن وبلىستىق ءماسليحاتتىڭ بىرلەسكەن قاۋلىسى مەن شەشىمىنىڭ جوباسىن ۇسىندى. جوبادا جەلەزين اۋىلىنداعى №3 قازاق مەكتەبىنە مىرجاقىپ دۋلاتوۆتىڭ, ەكىباستۇزدىڭ شىدەرتى, اقكول اۋىلدارىنىڭ مەكتەپتەرىنە قاجىبەك العامباروۆ, ءاشىم ارىمبەكوۆتىڭ ەسىمى بەرىلەتىنى حابارلاندى. قۇجاتتار رەسپۋبليكالىق ونوماستيكالىق كوميسسياعا جىبەرىلدى.
ءيا, ءبىر كەزدەرى وڭىردەگى اۋدان ورتالىقتارى ۋسپەن, جەلەزين اۋىلىنىڭ تۇرعىندارى كۇن سايىن قۇرىلىس باسىنا بارىپ, مەكتەپ قاشان اشىلادى دەپ اسىققان ەدى. تۇرعىندار تىلەگىنە وراي, جەلەزينكادا 2003 جىلدىڭ ساۋىرىندە باستالعان قۇرىلىس جاڭا وقۋ جىلىندا اياقتالىپ, پايدالانۋعا دا بەرىلدى. العاشقى كىرپىشىن سول كەزدە وبلىس اكىمى دانيال احمەتوۆ قالاعان ەدى.
ءتىپتى اۋدان ورتالىعىندا قازاق تىلىندە مەكتەپ اشىلعانىن ەستىگەن امەريكالىق ەرىكتىلەر ۋ.نورا, م.مەگاندار قۇتتىقتاي كەلىپ, اۋىل بالالارىنا اعىلشىن تىلىنەن ساباق تا بەردى. ءسويتىپ ەگەمەن ەلدىڭ, ەلباسىنىڭ ەلدىك ماقسات-مۇددە ساياساتى ۇلتتىق مەكتەپتەردىڭ اشىلۋىنا جول اشقانىنىڭ كۋاسى بولعانىمىز بار.
فاريدا بىقاي,
«ەگەمەن قازاقستان»
پاۆلودار وبلىسى
