الماتى ۋنيۆەرسيادا استاناسى اتاندى!

كەشكى قالالىق گازەتتەردە بولماسا, تاڭەرتەڭ جارىق كورەتىن كۇندەلىكتى باسىلىمداردا «بۇگىن...» دەپ سويلەۋ سالتى قابىلدانباعان. ويتكەنى, تاڭەرتەڭگىلىك گازەتتەر ادەتتە ەڭ جەدەل دەگەندە كەشەگى كۇننىڭ كەشكى وقيعالارى جايىندا جازادى. ال بۇل جولى ءبىز بۇگىن, ياعني 30 قاراشادا جەتكەن حاباردى جاريالاعالى وتىرمىز. تۇنگى ساعات 1-گە جاقىن قال­عاندا,  «ەگەمەن قازاق­ستان­نىڭ» بەتتەرىنە قول قويىل­عا­لى جاتقان شاقتا بەلگيا استاناسى بريۋسسەلدەن ءسۇيىن­شى حابار الدىق. قازاقستاننىڭ الەمگە كە­ڭى­رەك تانىلۋىنا سەپتىگىن تيگىزەتىن, ەلىمىزدىڭ داڭقىن اسى­را­تىن تاعى ءبىر جاقسى جاڭالىق كەلىپ جەتتى: ۋنيۆەرسيتەتتىك سپورتتىڭ حالىقارالىق فەدە­را­تسياسى (FISU) 2017 جىلعى ۋنيۆەرسيادانى الماتى قالا­سىندا وتكىزۋ جونىندە شەشىم قابىلدانعانىن جاريا ەتتى. بۇل وقيعا ەۋروپا ۋاقىتىمەن كەشكى 19-دا, استانا ۋاقى­تى­مەن تۇنگى 12-دە بولدى.  سول كەزدە FISU پرەزيدەنتى كلود-لۋي گالەن الماتى قالا­سى­نىڭ اكىمى احمەتجان ەسىموۆكە 2017 جىلعى ۋنيۆەرسيادانى وتكىزۋ قۇقىن جەڭىپ العان قا­لانىڭ سەرتيفيكاتىن تابىس ەتتى. ماڭىزى مەن اۋقىمى ءجو­نىنەن وليمپيالىق ويىن­دار­دان كەيىنگى ەكىنشى ورىندا تۇ­راتىن بۇل جاھاندىق جارىستى وتكىزۋگە تالاسۋشىلاردىڭ سوڭ­عى مارەسىنە ەكى قالا شىققان ەدى. ونىڭ ءبىرى الماتى, ەكىنشىسى يتاليانىڭ ترەنتو قالا­سى بولاتىن. كەشە الماتىنىڭ انىق ارتىقشىلىعىنا جانە ەلدەگى ەكونوميكالىق داعدا­رىس­قا بايلانىستى يتاليا ۇكىمەتى ۋنيۆەرسياداعا ترەنتو كانديداتۋراسىن الىپ تاستاۋ جونىندە شەشىم قابىلداعانى حابارلاندى. سوندىقتان ال­ما­تىنىڭ 2017 جىلعى ۋنيۆەرسيادا استاناسى اتانۋى اۆتو­مات­تى تۇردە جۇزەگە استى. احمەتجان ەسىموۆ بريۋسسەلدە الماتىنىڭ ءوتىنىم كو­ميتەتىنىڭ تۇساۋكەسەرى كەزىندە بۇل شەشىمگە بايلانىستى قالا باسشىلىعى ۋنيۆەرسيادانى ەڭ جوعارى دەڭگەيدە وتكىزۋگە بار كۇشىن سالاتىنىن ايتتى. «بۇل ءۇشىن بىزدە بارلىق جاع­داي بار. بىرىنشىدەن, قازاق­ستان پرەزيدەنتى نۇرسۇلتان نازارباەۆتىڭ تاراپىنان قول­داۋ كورىپ وتىرمىز. الەمدەگى داعدارىسقا قاراماستان, ءبىزدىڭ ەلىمىز قارقىندى دامىپ كەلەدى. ءبىز ازياداعا بارلىق حا­لىق­ارالىق ستاندارتتارعا ساي كەلەتىن جاڭا سپورت نىسان­دارىن تۇرعىزدىق. وعان FISU كوميسسياسى جوعارى باعا بەردى. بۇعان قوسا ءبىز 2017 جىلعى ويىندارعا دەيىن جاڭا مۇز سا­رايىن سالامىز», دەدى احمەتجان سماعۇل ۇلى تۇساۋكەسەردە. FISU پرەزيدەنتى كلود-لۋي گالەننىڭ قازاقستانعا, الما­تىعا قاتىستى ايتقان سوزدەرى ءاربىر وتانداسىمىزدى مەرەيلەندىرەدى دەپ ويلايمىز. «مەن الماتى ۋنيۆەر­سيا­داسى تاماشا وتەتىندىگىنە سەنىمدىمىن. ءوز تاراپىمنان بۇ­عان بارلىق قولداۋىمدى كور­سە­تەمىن. ەندى ءسىزدىڭ ەلىڭىز ۋني­ۆەرسيادادان كەيىن نە بو­لا­تىنىن ويلاي باستاۋى كەرەك. سىزدەردىڭ قىسقى وليمپيا­لىق ويىنداردى وتكىزۋگە ءوتى­نىم بەرۋگە تولىق مۇمكىن­دىك­تەرىڭىز بار دەپ ويلايمىن», دەدى كەشە FISU پرەزيدەنتى. ايتقانى كەلسىن! تاۋەلسىزدىگىمىزدىڭ جاڭا تا­بىسى قۇتتى بولسىن, ارداقتى اعايىن!