ەكى تاراپتىڭ ءوزارا ۋاعدالاستىعى بويىنشا يندۋستريالىق پارك قۇرىلىپ, سەگىز جوبا شەڭبەرىندە پەستيتسيدتەر مەن تىڭايتقىشتار, ماشينا جاساۋ زاۋىتتارى, لوگيستيكالىق ورتالىق, تاعى باسقا وندىرىستىك وشاقتار سالىناتىن بولادى. ول ءۇشىن قىزىلجار اۋدانى اۋماعىنان 400 گەكتار جەر تەلىمى بولىنگەن. قاعاز-تسەلليۋلوزا كومبيناتى مەن تەمىر جولدىڭ ەكى جەلىسىنىڭ قۇرىلىسى بيىل باستالادى. قارجىلىق جاعىنان قامتاماسىز ەتۋدى كورشىلەس ەلدىڭ ينۆەستورلارى ءوز مىندەتىنە العان. 1,5 مىڭ جۇمىس ورىندارى قۇرىلادى دەپ جوبالانۋدا.
جۋىردا كومپانيانىڭ باس ديرەكتورى جانگ كسيۋمينگ باستاعان دەلەگاتسيا وڭىرگە كەلگەن جۇمىس ساپارىندا م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ باسشىلىعىمەن كەزدەسىپ, بىلىكتى كادرلار دايىنداۋ جايى قىزۋ تالقىلاندى. كەلەشەكتە ينجەنەر, اگرونوم, ەنەرگەتيك, بيوتەحنولوگ ماماندىقتارىنا سۇرانىستىڭ ارتاتىنى ەسكەرىلىپ, ولاردى تاجىريبەدەن وتكىزۋدىڭ, باسەكەلەستىككە قارىمدىلىعىن ارتتىرۋدىڭ, جۇمىسقا ورنالاستىرۋدىڭ ناقتى قادامدارى اتاپ كورسەتىلدى. ۋنيۆەرسيتەتتىڭ رەكتورى سەرىك ومىرباەۆ ءوز سوزىندە قىتاي كومپانياسى سالاتىن ءوندىرىس ورىندارىن جەرگىلىكتى كادرلارمەن تولىقتىرۋعا ءازىر ەكەندىكتەرىن, ماتەريالدىق-تەحنيكالىق بازانى جاڭارتۋ, پروفەسسور-وقىتۋشىلار قۇرامىن ىرىكتەۋ جۇمىستارى جالعاسىپ جاتقانىن جەتكىزدى. قىتايلىق كومپانيا وكىلدەرى ۇسىنىستى قابىل الىپ, جۇمىس كۇشى زارۋلىگى بىرىگىپ شەشىلەتىنىنە, بارلىق قاجەتتى جاعدايلار جاسالاتىنىنا سەندىردى. ولاردى ەڭسەلى وقۋ ورنىنىڭ اۋىلشارۋاشىلىق جانە تەحنيكالىق الەۋەتى دە قىزىقتىردى. اۋقىمدى جوبالار ءۇش كەزەڭنەن تۇرادى. العاشقىسى جىل اياعىنا دەيىن پايدالانۋعا بەرىلەدى. وسىلايشا ءوزارا كەلىسىممەن بەكىتىلگەن مەموراندۋم شەڭبەرىندە ءىرى قارا مالعا ارنالعان جەم-ءشوپ ءوندىرىسى, اگروحيميا جانە اۋىر ونەركاسىپ سالاسىنداعى قولدانبالى عىلىمي-زەرتتەۋلەر كەشەندى تۇردە ىسكە اسىرىلادى. بۇعان قوسا الداعى ۋاقىتتا جەرگىلىكتى ستۋدەنتتەر قىتايلىق وزىق كاسىپورىنداردا تاجىريبەدەن ءوتىپ, ينۆەستيتسيالىق باعدارلامالار بويىنشا سالىناتىن زاۋىتتاردا ەڭبەك ەتە الادى.
– «پرەزيدەنتتىڭ بەس الەۋمەتتىك باستاماسى» ۇندەۋىندە اتاپ وتىلگەندەي, ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە جاڭا ماماندار دايارلاۋ – باستى تالاپتاردىڭ ءبىرى. مەموراندۋم نەگىزىندە جول كارتاسى جاسالىپ, جىلىنا 10-15 ستۋدەنت قىتايدا بىلىكتىلىكتەرى مەن شەبەرلىكتەرىن شىڭداپ قايتادى. كورشىلەس ەلدە تۇرىپ جاتقان ەتنوستىق قازاقتاردى قىزمەتكە شاقىرۋدىڭ جولدارى ويلاستىرىلعان», دەدى حالىقارالىق ستراتەگيا جانە ىنتىماقتاستىق ماسەلەلەرى جونىندەگى پرورەكتور ايدوس مۇقاتاەۆ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
