ول – بەسىكتەگى بوبەگىن الديلەگەن مەيىربان انا, اسىل جار, جاناشىر اپكە, اياۋلى ءسىڭلى, سىرشىل قۇربى بەينەسىنەن باستاپ ەت جاقىنىن سوعىسقا اتتاندىرعان زارلى ايەلدىڭ شەرلى كۇيىنە اۋىسسا, ەندى بىردە ەرلەرمەن بىرگە جاۋعا شاپقان تۇمار, زارينا پاتشايىمداردىڭ, بويىنا يناباتتىلىق پەن دانالىق ءدانىن ەككەن ايشا ءبيبى, قاراشاش, داناگۇلدەي ارۋلاردىڭ تەكتى بولمىسىنا ۇلاسىپ ونەر ءتىلى ارقىلى وقتىن-وقتىن ورتامىزعا ورالىپ وتىرۋى ءومىردىڭ ءوز زاڭدىلىعى ىسپەتتى.
استاناداعى Artline Gallery ونەر گالەرەياسىندا اشىلعان «ايەل: ميف جانە شىندىق» اتتى قازىرگى زامان كەسكىندەمەسىنىڭ كورمەسى وسى ءسوزىمىزدى دايەكتەي تۇسەدى. كوپشىلىك نازارىنا ۇسىنىلعان كەسكىندەمەلەردىڭ نەگىزگى تاقىرىبى – قازىرگى زامانداعى ايەل بەينەسى. الەم وزگەردى. الەممەن بىرگە ادام دا وزگەردى. سونىڭ ىشىندە, اسىرەسە ايەلدىڭ قوعامداعى ورنى, پسيحولوگياسى ءوز ەرەكشەلىگىن قالىپتاستىرىپ ۇلگەردى. ياعني, قازىرگى زاماننىڭ ايەلدەرى قانداي؟ ءارتۇرلى شەكتەۋ مەن شەڭبەردەن شىققان نازىك جاندىلار بەينەسى بۇگىندە قالاي قالىپتاسىپ جاتىر؟..
«ايەل: ميف جانە شىندىق» اتتى سۋرەت كورمەسى وسى ساۋالدارعا بارىنشا جاۋاپ بەرۋگە تالپىنادى. كورمە تورىنە قويىلعان داۋرەن ماكين, تاتيانا حوحلوۆا, نينا تەرەشەنكو, نەللي بۋبە, ۆەرا سلابوسپيتسكايا, ەلەنا رالينا, اقتوتى كولكە, ومىربەك تىلەۋليەۆ, سەمبىعالي سماعۇلوۆ, اباي چۋنچالينوۆ باستاعان وتاندىق سۋرەتشىلەردىڭ قاي-قايسىسى دا قىلقالام تىلىمەن ءوز قيالىنداعى ايەل الەمىنىڭ قۇپياسىن اشىپ كورسەتۋگە ۇمتىلىپتى.
– بۇل كورمەنىڭ باستى ەرەكشەلىگى – كلاسسيكالىق, اكادەميالىق بەينەلەۋ تاسىلدەرى ەمەس, شارتتى سۋرەتتەۋ ادىستەرىنىڭ العا شىعۋى. جاستاردىڭ سوعان دەن قويىپ, وسى تاسىلگە باسىمدىق بەرۋى دەر ەدىم. ياعني, جۇمىستىڭ بىرىنشىدەن, ابستراكتسيالىق, ەكىنشىدەن ءتۇر-ءتۇستىڭ ۇيلەسىمى ارقىلى بەرىلۋى, كورسەتىلۋى. سۋرەت ونەرىندە ءتۇر-ءتۇس ۇيلەسىمدىلىگى ۇلكەن مانگە يە. ءتۇس ارقىلى كەز كەلگەن تىرشىلىك يەسىنىڭ ىشكى كوڭىل-كۇيىن بەينەلەۋگە بولادى. ماسەلەن, سارى, اق, جاسىل جانە تاعى باسقا تۇستەر ادام كوڭىل-كۇيىنىڭ كوتەرىڭكىلىگى مەن مامىراجاي, جايباراقاتتىعىن ايگىلەسە, كەرىسىنشە, قاتقىل تۇستەر جايسىزدىق پەن قايعى-ۋايىم حالىنەن حاباردار ەتەدى. كورمەدەن وسىنداي ەرەكشەلىكتەردى كورىپ, مارقايىپ شىقتىق. نازارعا ۇسىنىلعان جۇمىستاردىڭ ىشىندە, اسىرەسە, داۋرەن ماكيننىڭ «كەلىن» كارتيناسىن ايرىقشا اتاپ وتكىم كەلەدى. «كەلىن» – داۋرەننىڭ ەلىكتەۋ, كوشىرۋدەن ادا, وزىنە عانا ءتان تالانت پەن شىعارماشىلىق ىزدەنىسىنىڭ جەمىسى. وسىنداي ىزدەنگىش جاستاردىڭ ءوسىپ كەلە جاتقانى قۋانتادى, – دەدى رەسەي ۇلتتىق ديزاين اكادەمياسىنىڭ توراعاسى, پروفەسسور ەرمەك اسىلحانوۆ.
ءيا, بۇل كورمەدە ءار سۋرەتشى كوركەمونەردەگى ءوز ءستيلى مەن ەرەكشەلىگىن ساقتاي وتىرىپ, ءبىرى ەكىنشىسىنە ۇقسامايتىن ايرىقشا ونەر تۋىندىلارىن ومىرگە اكەلۋگە ۇمتىلىپتى. ايتسە دە, ءوز قولتاڭباسىمەن دارالانۋدى ماقسات ەتكەن قىلقالام شەبەرلەرىنىڭ ايەل بەينەسىن بەدەرلەۋدەگى بارلىعىنا ورتاق ۇندەستىك – ايەل الەمىن كوكتەم, گۇل بەينەسىمەن, نازىك تە جارقىن بوياۋلار گامماسىن پايدالانۋىمەن ءبىر ارنادا توعىسادى. ەڭ باستىسى سۋرەتتىڭ ارقايسىسىندا ايەل, انا تابيعاتىنا ءتان جىلىلىق پەن نازىكتىك بار. ونەر تۋىندىلارىنىڭ ەشبىرى جانسىز ەمەس, كەز كەلگەنىنىڭ مازمۇنى مەن استارىندا ىزگىلىك نۇرى مەن ءومىر جالعاستىعىنىڭ ءىزى سايراپ جاتىر. ايەلدىڭ دە بۇل ومىردەگى باستى ميسسياسى دا وسى ەمەس پە؟!.
نازەركە جۇماباي,
«ەگەمەن قازاقستان»
