ەستەرىڭىزگە سالا كەتەيىك, 5 مامىردا اقش-تىڭ لاس-ۆەگاس قالاسىندا وتەدى دەپ جوسپارلانعان جەكپە-جەككە ەكى اي قالعاندا ساۋل الۆارەستىڭ رۇقسات ەتىلمەگەن ءدارى دارمەكتەردى پايدالانعانى بەلگىلى بولىپ, باسى ۇلكەن داۋعا قالدى. وسى جاعدايعا بايلانىستى بۇل كۇندەرى بوكس سالاسىنىڭ باسى-قاسىندا جۇرگەن مامانداردان باستاپ, قاتارداعى قاراپايىم جانكۇيەرلەرگە دەيىن ءوز ويلارىن ورتاعا سالىپ, سان الۋان پىكىرلەر ايتۋدا. ماسەلەنىڭ ۋشىعۋىنا بايلانىستى GGG مەن كانەلو اراسىنداعى كەزدەسۋدىڭ كەيىنگە شەگەرىلۋى دە ابدەن مۇمكىن. ال سولاي بولعان جاعدايدا GGG-گە كىم قارسىلاس اتانۋى مۇمكىن؟
قازىردىڭ وزىندە بىرنەشە بوكسشى «گەننادي گولوۆكينمەن جۇدىرىقتاسۋعا دايىنمىن» دەپ جاھانعا جار سالۋدا. سولاردىڭ اراسىندا امەريكالىق دجەرمالل چارلو مەن ۋكراينالىق سەرگەي دەرەۆيانچەنكو ەرەكشە بەلسەندىلىك تانىتۋدا. بۇل ەكەۋى دە كوپشىلىككە جاقسى تانىمال. 27 جاستاعى اقش بوكسشىسى 10 جىلدان بەرى كاسىپقوي رينگتە كۇش سىناسۋدا. وسى ارالىقتا 26 كەزدەسۋ وتكىزىپ, بارلىعىندا باسىمدىق تانىتتى. 20 قارسىلاسىن ەسىنەن تاندىردى.
32 جاستاعى ۋكراينانىڭ ساڭلاعى كەزىندە دۇنيەجۇزىلىك بوكس سەرياسى دوداسىندا «استانا ارلاندارى» ساپىندا كەرەمەت ونەر كورسەتكەنىن جانكۇيەرلەر ۇمىتا قويعان جوق. دەرەۆيانچەنكو سول جوباداعى ەڭ مىقتى بوكسشىلاردىڭ ءبىرى رەتىندە كوپشىلىكتىڭ ەسىندە قالدى. 2014 جىلى كاسىپقوي رينگتە باق سىناۋعا بەل بۋعان ول 12 باسەكەنىڭ بارلىعىن جەڭىسپەن اياقتادى. 10 قارسىلاسىن نوكاۋتقا جىبەردى.
GGG-مەن جۇدىرىقتاسۋعا قۇلشىنىس تانىتىپ وتىرعاندار اراسىنان ماتۆەي كوروبوۆتى دا ەرەكشە اتاپ وتۋگە بولادى. 35 جاستاعى رەسەيدىڭ ساڭلاعى كەزىندە اۋەسقويلار اراسىندا الەمنىڭ ەكى دۇركىن چەمپيونى جانە ەۋروپا بىرىنشىلىگىنىڭ جەڭىمپازى اتاندى. 2003 جىلعى بانگكوكتا وتكەن دۇنيەجۇزىلىك دودادا كوروبوۆ ءبىزدىڭ گەننادي گولوۆكينگە جانە 2004 جىلعى بەيجىڭ وليمپياداسىندا باقتيار ارتاەۆقا ەسە جىبەردى. كاسىپقوي رينگتە جۇدىرىقتاسىپ جۇرگەنىنە 10 جىلعا جۋىقتادى.
سول ارالىقتا 28 كەزدەسۋ وتكىزىپ, 27 رەت جەڭىسكە جەتتى. 14 قارسىلاسىن ايقىن باسىمدىقپەن ۇتتى.
سونداي-اق جەرلەسىمىزبەن جۇدىرىقتاسۋعا ەرەكشە ىنتا تانىتىپ وتىرعاندار قاتارىندا اقش-تىڭ ءاپايتوسى دەمەتريۋس اندرادە, مەكسيكانىڭ مىقتىلارى حۋليو سەزار چاۆەس, روبەرتو گارسيا جانە جاپونيانىڭ جۇلدىزى ريوتا مۋراتا سىندى كاسىپقوي بوكس الەمىندە ەسىمدەرى ەرەكشە قۇرمەتپەن اتالاتىن سايىپقىراندار بار.
عالىم سۇلەيمەن,
«ەگەمەن قازاقستان»
