ءبىرىنشى باستاما – ءار وتباسىنىڭ باسپاناعا قولجەتىمدىلىگىن قامتاماسىز ەتۋ. اتاپ كورسەتكەندە «7 – 20 – 25» باعدارلاماسى بۇل ءسىزدىڭ ءومىرىڭىزدى جەڭىلدەتەتىن سيقىرلى ساندار. ناقتىراق ايتساق, وسى ۋاقىتقا دەيىن بانكتەر ءۇي الۋعا نەسيەنى 18-30 پايىزبەن, الدىن الا 50 پايىزىن تولەتىپ, 20 جىلعا دەيىن بەرەتىن بولسا, ەندى ەلباسى نەسيە پايىزىن 7 پايىزعا دەيىن, الدىن الا تولەمدى 20 پايىزعا دەيىن ازايتىپ, نەسيەنى وتەۋ مەرزىمىن 25 جىلعا دەيىن ۇزارتاتىنىن ايتتى. ءۇيسىز-كۇيسىز جۇرگەن ءبىراز ادام ءۇيلى بولاتىنىنا سەنىم بار. وسىعان ءوز باسىم وتە قۋانىشتىمىن.
ەكىنشى باستاما – تومەن جالاقى الاتىن جۇمىسشىلاردىڭ سالىق جۇكتەمەسىن ون ەسەگە ازايتىپ, 1 پايىزعا ءتۇسىرۋ. بۇل باستاما 2019 جىلدىڭ 1 قاڭتارىنان باستاپ ىسكە اسادى. از عانا جالاقىمەن وتباسىن اسىراپ جۇرگەن ادامداردىڭ جاعدايى ازداپ بولسىن تۇزەلمەك.
ءۇشىنشى باستاما – جوعارى بىلىمگە قولجەتىمدىلىكتى ارتتىرۋ جانە ونىڭ ساپاسىن كوتەرۋ. 2018-2019 جىلدارى ءار جىلعا قوسىمشا 20 مىڭ گرانت بولىنەتىنىن ايتتى. جىلدا جازدا باستالاتىن «گرانتتىڭ جىرى» باسەڭسيتىن بولدى. كوللەدجدەر مەن ۋنيۆەرسيتەتتەرگە 2022 جىلعا دەيىن كەمىندە 75 مىڭ ورىندىق جاتاقحانا سالۋ جۇكتەلدى. بۇل جاستاردىڭ الاڭسىز ءبىلىم الۋىنا زور كومەك.
ءتورتىنشى باستاما – شاعىن جانە ورتا بيزنەسكە دەم بەرىپ, جاڭادان بيزنەس باستاعاندارعا قولداۋ كورسەتۋ ءۇشىن جەڭىلدەتىلگەن شاعىن نەسيە كولەمىن ارتتىرۋ.
بۇل الەۋمەتتىك باستاما شىنىندا دا ءوز ءىسىن اشامىن, كاسىپ جاسايمىن دەگەندەر ءۇشىن ۇلكەن مۇمكىندىك. ياعني, مىڭداعان ادام جەكە ءىسىن دوڭگەلەتە الادى. اسىرەسە اۋىل-ايماقتارعا, اۋىلداعى كاسىپكەرلىككە وتە قاجەت. 2018 جىلى جەڭىلدەتىلگەن شاعىن نەسيە كولەمىن ارتتىرۋ ءۇشىن قوسىمشا 20 ميلليارد تەڭگە بولىنەدى.
بەسىنشى باستاما – قازاقستاننىڭ ورتالىق جانە سولتۇستىك ايماقتارىنا گاز تارتۋ حالىقتىڭ تۇرمىس جاعدايىن جاقسارتۋ, ەكولوگيانى ساقتاۋ, حالىق دەنساۋلىعىن ساقتاۋ مەن قورعاۋدىڭ ءبىر جولى دەپ بىلەمىن. قازاقستان حالقىنا ارناعان ءاربىر جولداۋىندا وتكەندى سارالاپ, بولاشاققا باعدار جاساي وتىرىپ, ۇكىمەت الدىنا جاڭا مىندەتتەر جۇكتەيتىن ەلباسىمىز ن.ءا.نازارباەۆتىڭ باستامالارى بۇدان دا بيىك, بۇدان دا اسقارالى مۇراتتارعا جەتەلەيتىندىگىنە, قازاقستاندىقتاردىڭ بولاشاققا دەگەن ۇمىتتەرىن ارتتىرا تۇسەتىندىگىنە سەنىم مول.
گۇلدانا ەسمۋرزينا,
كوكشەتاۋ قالاسى تىلدەردى وقىتۋ ورتالىعىنىڭ ديرەكتورى
اقمولا وبلىسى
