ونىڭ ارقيلى سەبەپتەرىنە توقتالماي-اق قويايىق, ەڭ باستىسى, ورىن العان ولقىلىقتاردى تۇزەتۋگە جاڭا باسشىلىقتىڭ بىلەك سىبانا كىرىسكەنىن جاقسىلىقتىڭ جارشىسىنا بالاعانىمىز ءجون شىعار. بىلتىر تەگىن ءبىلىم الۋعا تىلەك بىلدىرگەندەردىڭ 30 پايىزى گرانتقا قابىلداندى. 2015 جىلى بۇل كورسەتكىش 13 پايىز توڭىرەگىندە بولعانىن ەسكەرسەك, ءسوز جوق, ىلگەرىلەۋ بار. قازىر مۇندا ءبىلىم الىپ جاتقان ستۋدەنتتەردىڭ ۇشتەن ءبىرى مەملەكەت قاراجاتى ەسەبىنەن وقيدى. 48 باعىت بويىنشا ماماندار دايارلانادى. الدا 23 باكالاۆريات ماماندىعى قوسىلادى.
– پرەزيدەنت ۇندەۋىنىڭ ءۇشىنشى باستاماسىندا ستۋدەنتتەردىڭ ءبىلىم الۋىنىڭ قولجەتىمدىلىگى مەن وقۋ ساپاسىنا ەرەكشە نازار اۋدارىلعان. ول ءۇشىن كوپتەگەن الەۋمەتتىك مۇمكىندىكتەر تۋدىرىلاتىنى اتاپ ايتىلعان. ءبىز دە ستۋدەنت جاستاردى جايلى جاتاقحانالارمەن قامتاماسىز ەتۋدىڭ جولدارىن قاراستىرىپ وتىرمىز, – دەگەن ەدى ۋنيۆەرسيتەت رەكتورى سەرىك ومىرباەۆ «پرەزيدەنتتىڭ بەس باستاماسى» ۇندەۋى تالقىلانعان اكتيۆ جيىنىندا.
اراعا كۇندەر سالىپ وقۋ ورنىنىڭ پرورەكتورى ەربول يساقاەۆپەن حابارلاسقانىمىزدا, مىڭ ورىندى جاتاقحانا سالۋ ماقساتىمەن ەكى نۇسقا ازىرلەنگەنىن, بۇدان وزگە دە الەۋمەتتىك قامقورلىقتار جاسالاتىنىن جەتكىزدى. ءبىرىنشى نۇسقا بويىنشا 5 قاباتتى ەكى جاتاقحانا تۇرعىزۋ ويلاستىرىلعان. ەكىنشىسىندە 12-14 قاباتتى ءزاۋلىم عيمارات سالۋ قاراستىرىلعان. ءتيىمدى دەگەنى تاڭداپ الىنادى. جاڭا نىساننىڭ بولمەلەرى جايلى پاتەرلەرگە ۇقساتىپ سالىنادى. اسحانا, دۋش جۇمىس ىستەيدى. بۇدان بولەك جاتتىعۋ زالى, كىر جۋاتىن بولمە ورنالاسادى, دەدى ول. بۇگىنگى كۇنى ءۇش جاتاقحانادا 1026 ستۋدەنت تۇرادى. كەزەكتى سارعايا كۇتۋشىلەردىڭ قاتارى قالىڭ. قالعاندارى باسپانا جالداۋعا ءماجبۇر. جالداۋ باعاسى قىمبات ءارى قالا شەتىنەن قاتىنايتىندىقتان ءتۇرلى قولبايلاۋ تۋدىراتىنى انىق.
سول سياقتى ۋنيۆەرسيتەت بازاسى نەگىزىندە العاش رەت مەديتسينا ماماندىعىنا تالاپكەرلەر قابىلدانىپ, اۋىل شارۋاشىلىعى كافەدراسى قۇرىلادى. جۋىردا ۋنيۆەرسيتەت رەكتورى گرانتىنا ارنالعان بايقاۋدىڭ شەشۋشى كەزەڭى ءوتتى. 130 ۇمىتكەردىڭ اراسىنان ەڭ ۇزدىكتەرى ىرىكتەلىپ الىندى. جەڭىمپازدار ءتورت جىل بويى تەگىن وقۋ مۇمكىندىگىن يەلەنسە, ەكىنشى ورىن العاندارعا – 50, ءۇشىنشى ورىن العاندارعا 25 پايىزدىق جەڭىلدىك بەرىلەدى. وڭىردە مۇعالىمدەر جەتىسپەيتىندىكتەن ماتەماتيكا, بيولوگيا, گەوگرافيا, پەداگوگيكا جانە باستاۋىش وقۋ ادىستەمەسى سياقتى ماماندىقتارعا باسىمدىق بەرىلگەن. قازىر «سەرپىن» باعدارلاماسى اياسىندا 800-دەي جاس ءبىلىم الۋدا. بۇل باعىتتا دا اۋقىمدى شارالار جالعاسىن تاپپاق.
ۋنيۆەرسيتەت باسشىلىعىنىڭ ايتۋىنشا, 2020 جىلعا تامان ستۋدەنتتەردىڭ سانىن 8 مىڭعا دەيىن جەتكىزۋ مەجەلەنگەن.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
