قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ ۇلتتىق عىلىمي-پراكتيكالىق دەنە تاربيەسى ورتالىعىنىڭ ۇيىمداستىرۋىمەن وتكەن باسەكەدە ەلىمىزدىڭ 9 جوعارى وقۋ ورىندارىنان كەلگەن ايەلدەر كوماندالارى ءوزارا تارتىسقا ءتۇسىپ, باقتارى مەن باپتارىن سىنادى.
قىزدار ۋنيۆەرسيتەتىنىڭ اياق دوپ شەبەرلەرى جارىستىڭ العاشقى كۇنى ءال-فارابي اتىنداعى قازاق ۇلتتىق ۋنيۆەرسيتەتىنىڭ قۇراماسىن 4:3 ەسەبىن ۇتىپ كەلەسى كەزەڭگە جولداما الدى. ال, ەكىنشى كۇنى پاۆلودار مەملەكەتتىك ۋنيۆەرسيتەتىن 3:2, ە. بۋكەتوۆ اتىنداعى قاراعاندى مەملەكەتتىك ۋنيۆەرسيتەتىن 5:2. م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن 2:1 ەسەبىمەن ويسىراتا جەڭىپ, العاشقى اينالىمعا شىقتى.
جارتىلاي فينالدا پاۆلودار مەملەكەتتىك پەداگوگيكالىق ۋنيۆەرسيتەتىنىڭ كومانداسىنان 4:3 ناتيجەسىمەن باسىم ءتۇستى. ال, فينالدا قازۇۋ سپورتشىلارىن 2:1 ەسەبىمەن جەڭىپ, ۋنيۆەرسيادا جەڭىمپازى اتاندى.
– سايىس جولىندا قىزدار ۋنيۆەرسيتەتىنىڭ كومانداسى ءوزارا ۇيىمشىلدىق تانىتىپ, تاكتيكالىق جانە تەحنيكالىق شەبەرلىكتەرىن تولىقتاي پاش ەتە ءبىلدى. سپورتشىلارىمىز شىدامدىلىق, جىلدامدىق سياقتى قاسيەتتەرىنىڭ ارقاسىندا «جۇزدەن – جۇيرىك, مىڭنان – تۇلپار» شىعىپ, التىننان القا تاقتى, – دەيدى دەنە شىنىقتىرۋ جانە سپورت كافەدراسىنىڭ مەڭگەرۋشىسى ءاليا ەسەلباەۆا.
اسا بەلسەندى ويىن ورنەگىن كورسەتكەن قازاق مەملەكەتتىك قىزار پەداگوگيكالىق ۋنيۆەرسيتەتىنىڭ «دەنە شىنىقتىرۋ جانە سپورت» ماماندىعىنىڭ ستۋدەنتتەرى ءاليا سادۋاقاسوۆا مەن ايساۋلە سايدۋللا «ەڭ ۇزدىك شابۋىلشى» اتالىمىنا لايىق دەپ تانىلدى.
قىسقى ۋنيۆەرسيادا ويىندارىندا توپ جارعان كوماندالار مەن جەكەلەي قاتىسۋشىلار ارنايى كۋبوكپەن جانە مەدالمەن ماراپاتتالدى.
