اۋداندا وسى ءبىلىم سالاسىنا قاتىستى ءبىر ەمەس, 4 كاسىپوداق كوميتەتى قۇرىلعان. ولاردىڭ ارقايسىسىنىڭ ءوز مۇددەسى بار. قىسقاسى, كەشەگى وقيعا وبلىس دەڭگەيىندە ءبىلىم سالاسىنا تەرەڭ تالداۋ جۇرگىزىپ, كەمشىلىكتەر بويىنشا ءتيىستى شارا قولدانۋعا تۇرتكى بولىپ وتىر. بۇل ورايدا ارنايى جۇمىس توبى دا قۇرىلدى.
وقيعانىڭ اق-قاراسىن قۇقىق قورعاۋ ورىندارى انىقتاپ, قورىتىندى شىعارار. الايدا جەتى جاستاعى بالانىڭ تاعدىرى جۇرتتى الاڭداتىپ وتىر. ەسەيمەي جاتىپ ەرەسەكتەردىڭ ءوزىن ەسەڭگىرەتەردەي پسيحولوگيالىق سوققى العان بالانىڭ ەرتەڭگى كۇنى نە بولماق؟ ۋاقىت ەمشى ەكەنىن ايتىپ, جاقىندارى جۇبانار, وقيعا دا بىرتە-بىرتە ۇمىتىلار. دەسەك تە اناسى الىستا جۇرگەن, اكەسىز ءوسىپ كەلە جاتقان ۇلدىڭ باسىنان وتكەن جاعداي وزگەگە ساباق بولدى, قاراپايىم حالىقتىڭ مۇڭ-مۇقتاجىنا دەر كەزىندە ءمان بەرۋ, اياقسىز قالدىرماۋ, ۋشىقتىرماۋ قاجەتتىگىن اڭعارتتى. ال بالانىڭ قازىرگى جاعدايىنا الاڭداۋعا نەگىز جوق ەكەنىن وڭتۇستىك قازاقستان وبلىسىنا ارنايى كەلگەن بالا قۇقىقتارى جونىندەگى ۋاكىل, ءماجىلىس دەپۋتاتى زاعيپا باليەۆا مالىمدەدى.
جاعدايدىڭ شۇعىل ارەكەتتى قاجەت ەتەتىنىن ەسكەرگەن زاعيپا باليەۆا تۇندەلەتە كەلىپ, ءوڭىردىڭ ىشكى ىستەر دەپارتامەنتىنىڭ باسشىسى قايرات دالبەكوۆپەن جانە ءجابىر كورگەن 7 جاسار بالانىڭ تۋىستارىمەن كەزدەستى. بالا قۇقىقتارى جونىندەگى ۋاكىلدىڭ ايتۋىنشا, مونيتورينگتىك توپ بالانىڭ جاعدايىن تەكسەرىپ شىققان. «مونيتورينگ توبى بالامەن بىردەن جولىعا المادى. وسىدان كەيىن ءتيىستى مەملەكەتتىك ورگان وكىلدەرىمەن سويلەستىم. ولار كەشەندى, تاۋەلسىز ساراپتاما جۇرگىزۋگە دايىن. بالانى ءوز كوزىممەن كورىپ, جاعدايىن ءبىلۋ ءۇشىن شىمكەنتكە كەلدىم. ونىڭ جاعدايىمەن تانىسىپ شىقتىم. قانداي جاعدايدا ەكەنىن ءبىلدىم. قازىر ول قاۋىپسىز جەردە. بالامەن بىرگە اجەسى جانە ناعاشى اپكەسى ءجۇر. اناسىن كوپ ۋاقىت بويى تابا المادىق, اناسىمەن سويلەستىم, ول دا كەلىستى. ەندى استانادا كەزدەسەمىز, ولار مەنىمەن بىرگە استاناعا ۇشادى», دەدى زاعيپا باليەۆا.
قازىر مەملەكەتتىك ورگاندار تاراپىنان سوت-مەديتسينالىق ساراپتاما جۇرگىزۋ ءۇشىن بارلىق جاعداي جاسالىپ وتىر. ساراپتاما وتكىزۋگە پسيحولوگ, پسيحياترلار, بالالار دارىگەرلەرى سياقتى بارلىق ماماندار تارتىلادى. زاعيپا باليەۆانىڭ ايتۋىنشا, استانادا ساراپتاما جاساۋ ءۇشىن تاعى 2 كۇندەي ۋاقىت كەرەك. «ساراپتامانىڭ قورىتىندىسى شىققاننان كەيىن ناقتى شەشىمدەر قابىلدانادى. ەگەر بالانىڭ راسىمەن زورلانعانى دالەلدەنسە, وعان جاۋاپتى بارلىق ادامداردىڭ ءتيىستى جازاسىن الۋىن تالاپ ەتەتىن بولامىن. ەگەر راستالماعان جاعدايدا مەن بالانىڭ قۇقىقتارىنىڭ جان-جاقتى قورعالۋىن باقىلاۋعا الامىن. سونداي-اق كۇدىككە ىلىنگەن بالالاردىڭ دا زاڭدى قۇقىقتارى بار. ولاردىڭ زورلاۋ ارەكەتتەرىنە قاتىستىلىعى دالەلدەنسە, زاڭ جۇزىندە جازاسىن الاتىن بولادى. بىراق قۇقىقتارى تولىعىمەن ەسكەرىلەدى», دەدى زاعيپا باليەۆا. سونداي-اق دەپۋتات بولاشاقتا بالانىڭ باسقا جاققا قونىس اۋدارۋى جانە باسپانامەن قامتاماسىز ەتىلۋىنە جاعداي جاساۋ ماسەلەسى قاراستىرىلىپ جاتقانىن ايتتى. بالا قازىر تولىقتاي مەملەكەت قامقورلىعىنا الىنعان.
وقيعاعا بايلانىستى وڭتۇستىك قازاقستان وبلىسىنىڭ اكىمدىگىندە وتكەن وتىرىستا ءوڭىر باسشىسى جانسەيىت تۇيمەباەۆ اتالعان وقيعا دەر كەزىندە نازارعا الىنىپ, ءتيىستى جۇمىستار اتقارىلماعاندىقتان بۇقارالىق اقپارات قۇرالدارى مەن قوعام اراسىندا رەزونانس تۋدىرعانىن ايتىپ, جاۋاپتى ازاماتتارعا شارا قولدانىلاتىنىن جەتكىزدى. اتالعان ماسەلە بويىنشا تەرگەۋ امالدارىنىڭ وبەكتيۆتى جانە جان-جاقتى جۇرگىزىلۋىن قامتاماسىز ەتۋ ءۇشىن, تەرگەۋ امالدارى اياقتالعانعا دەيىن وسى وقيعاعا قاتىستى بارلىق لاۋازىمدى تۇلعالار مەن جاۋاپتى قىزمەتكەرلەر ءوز قىزمەتتەرىنەن ۋاقىتشا شەتتەتىلدى. وبلىس اكىمىنىڭ ورىنباسارى ۇ.سادىبەكوۆكە قاتاڭ ەسكەرتۋ بەرىلدى. سونداي-اق سارىاعاش اۋداندىق جەرگىلىكتى پوليتسيا قىزمەتىنىڭ باسشىسى و.بەردالى مەن سارىاعاش اۋدانى, اباي اۋىلدىق جەرگىلىكتى پوليتسيا بولىمشەسىنىڭ باسشىسى ءا.يبراگيموۆ, يۋۆەنالدى پوليتسيا بولىمشەسىنىڭ №73, №74 جالپى ورتا مەكتەپتەرىنە جاۋاپتى پوليتسيا ينسپەكتورى ق.ساريەۆ قىزمەتتەرىنەن بوساتىلدى. ال اۋدانداعى جاعدايدى دەر كەزىندە نازارعا الىپ, ءتيىستى شارا قابىلداماعان اۋدان اكىمى ق.ابدۋاليەۆكە قاتاڭ سوگىس جاريالاندى. بۇدان بولەك وبلىس اكىمى سالاعا جاۋاپتى اۋدان اكىمىنىڭ ورىنباسارى ق.قىستاۋباەۆقا شارا قولدانۋدى جانە سارىاعاش اۋداندىق ءبىلىم ءبولىمىنىڭ باسشىسى ب.مايريحوۆ پەن №73, №74 جالپى ورتا مەكتەپ ديرەكتورلارىن تەرگەۋ امالدارى اياقتالعانشا جۇمىستان شەتتەتۋدى تاپسىردى. وبلىستىق ءبىلىم باسقارماسىنىڭ باسشىسى ي.ساعىندىقوۆقا سوگىس تۇرىندە شارا قولدانىلاتىن بولدى.
ايتا كەتەيىك, سارىاعاش اۋداندىق ءبىلىم باسقارماسىنىڭ باستىعى, ەگەر زورلانۋ فاكتىسى دالەلدەنسە, قىزمەتتەن كەتۋگە دايىن ەكەندىگىن مالىمدەگەن دە بولاتىن. ءوڭىر باسشىسىنىڭ ايتۋىنشا, ساراپتامالىق كوميسسيا اۋداندا جانە وبلىستا جۇرگىزگەن ەكى مەديتسينالىق تەكسەرۋ قورىتىندىسى بويىنشا بالانىڭ زورلانعانى راستالماعان. «بۇل جالپى وبلىسىمىزداعى, قالالارداعى, اۋداندارداعى ءبىلىم سالاسىنداعى كەمشىلىكتەردى كورسەتىپ وتىر. سوندىقتان بارلىق قالا-اۋدان اكىمدەرىنە جەرگىلىكتى قوعامدىق جانە ارداگەرلەر كەڭەستەرىمەن بىرلەسىپ مەكتەپ وقۋشىلارىنىڭ بوس ۋاقىتىن دۇرىس ۇيىمداستىرۋ بويىنشا ءىس-شارالاردى قولعا الۋدى تاپسىرامىن. ال وبلىستىق ىشكى ىستەر مەن قۇزىرلى ورگان وكىلدەرىنە مەكتەپتەردەگى اقشا جيناۋ, الىمجەتتىك بويىنشا ءتۇرلى قىلمىستارعا مونيتورينگ جاساۋدى, ءتيىستى ءىس-شارالار جوسپارىن ءبىر اپتا مەرزىمىندە جۇرگىزۋدى تاپسىرامىن», دەدى جانسەيىت تۇيمەباەۆ.
سوڭعى كۇندەرى ءتۇرلى بۇقارالىق اقپارات قۇرالدارى مەن الەۋمەتتىك جەلىلەردە تاراتىلىپ, قوعامدى دۇرلىكتىرگەن وقيعا 2017 جىلدىڭ 9 قىركۇيەگىندە بولعان ەكەن. ەگەر ءتيىستى شارالار ۋاقىتىندا جانە ءادىل دە اشىق زاڭ تالاپتارىنا ساي قولدانىلعاندا بۇگىنگىدەي دۇرلىگۋ بولار ما ەدى؟! وبلىستىق ىشكى ىستەر دەپارتامەنتىنىڭ باستىعى, پوليتسيا پولكوۆنيگى قايرات دالبەكوۆتىڭ ايتۋىنشا, بالانىڭ اجەسىنىڭ ارىز جازباۋىنا بايلانىستى تولىق ماتەريالدار جينالماعان. وقيعاعا قاتىستى جۇرگىزىلىپ جاتقان قىزمەتتىك تەكسەرۋ قورىتىندىسى بويىنشا الداعى ۋاقىتتا ءتيىستى شارالار قولعا الىنباق. ال وڭتۇستىك قازاقستان وبلىستىق پروكۋراتۋراسى ءىستىڭ قاتىسۋشىلارى كامەلەتتىك جاسقا تولماعاندىقتان, ولاردىڭ قۇقىقتارى مەن تەرگەۋ قۇپياسىن ساقتاۋدى سۇرادى.
«اتالعان دەرەك بويىنشا بيىلعى جىلدىڭ قاڭتار ايىنان باستاپ سارىاعاش اۋدانىنىڭ ىشكى ىستەر ءبولىمى سوتقا دەيىنگى تەرگەپ-تەكسەرۋ جۇمىستارىن جۇرگىزىپ جاتىر. تەرگەۋ اياسىندا سوت پسيحولوگيالىق-پسيحياتريالىق ساراپتامالار تاعايىندالدى. ولاردىڭ قورىتىندىلارى ءالى دايىن ەمەس. ونىڭ ناتيجەسى بويىنشا استانا قالاسىندا ارنايى مامانداردىڭ قاتىسۋىمەن كەشەندى سوت-مەديتسينالىق ساراپتاماسى جۇرگىزىلەدى», دەلىنگەن پروكۋراتۋرا تاراتقان حابارلامادا.
ايتا كەتەيىك, اكىمدىكتە وتكەن وتىرىستا وبلىس اكىمى زورلاندى دەلىنگەن جەتى جاسار بالانىڭ استاناعا جىبەرىلگەنىن ءمالىم ەتتى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
