مەملەكەت باسشىسى ەكى ەل اراسىنداعى قارىم-قاتىناستىڭ سەنىمگە نەگىزدەلگەنىن اتاپ ءوتىپ, قازاقستان مەن تاجىكستان حالىقتارىنىڭ دوستىعىن نىعايتۋ جولىندا ەمومالي راحموننىڭ ايرىقشا ءرول اتقارعانىن ايتتى.
– ءسىز باسشىلىق ەتكەن جىلدار ىشىندە ءبىز زور سەنىمگە, ىنتىماقتاستىققا جانە دوستىققا نەگىزدەلگەن قارىم-قاتىناس ورناتتىق. ەشقاشان ارامىزدا شەشىمىن تاپپاعان ماسەلە بولعان ەمەس. ءبىز ءاردايىم, اسىرەسە حالىقارالىق دەڭگەيدە ءبىر-ءبىرىمىزدى قولداپ كەلەمىز, – دەدى قازاقستان پرەزيدەنتى.
نۇرسۇلتان نازارباەۆ بۇگىندە ەكى ەل اراسىنداعى ىنتىماقتاستىق جاڭا كەزەڭگە اياق باسقانىن ايتىپ, مەملەكەتارالىق قارىم-قاتىناستىڭ وزەكتى ماسەلەلەرىن تالقىلاۋعا نيەتتى ەكەنىمىزدى جەتكىزدى.
– ءبىز سىزدەرمەن كەز كەلگەن ماسەلەنى تالقىلاپ, شەشۋگە دايىنبىز. سونىمەن قاتار كورشى مەملەكەتتەردىڭ باسشىلارى كەلە جاتىر. ەرتەڭ ءبىز ءۇشىن تاعى ءبىر مارتە كەزدەسۋگە مۇمكىندىك تۋادى. بيىل سىزدەردە سۋ رەسۋرستارىن باسقارۋ جونىندەگى كونفەرەنتسيا وتەتىنىن بىلەمىن. قازاقستان بۇل باستامانى قولدايدى, – دەدى مەملەكەت باسشىسى.
كەزدەسۋ بارىسىندا نۇرسۇلتان نازارباەۆ تاجىكستان رەسپۋبليكاسىنىڭ پرەزيدەنتىن «پاراسات» وردەنىمەن ماراپاتتادى.
ە.راحمون نۇرسۇلتان نازارباەۆقا قازاقستانعا شاقىرعانى ءۇشىن جانە جوعارى ماراپات تابىس ەتكەنى ءۇشىن العىس ءبىلدىردى.
– قازاقستانعا كەلگەن ءار ساپارىمدا استانانىڭ كەلبەتى جىلدام وزگەرىپ كەلە جاتقانىن بايقايمىن. بۇل جەتىستىك, ەڭ الدىمەن, ءسىزدىڭ دانا ءارى كورەگەن ساياساتىڭىزدىڭ جەمىسى بولىپ سانالادى, – دەدى تاجىكستان رەسپۋبليكاسىنىڭ پرەزيدەنتى.
ە.راحمون ەكى ەل اراسىنداعى ساۋدا-ەكونوميكالىق قارىم-قاتىناستىڭ قارقىندى دامىپ كەلە جاتقانىنا توقتالىپ, ونى ءارى قاراي ىلگەرىلەتە تۇسۋگە نيەتتى ەكەنىن اتاپ ءوتتى.
– تاۋار اينالىمىنىڭ كولەمى جونىنەن قازاقستان تاجىكستاننىڭ جەتەكشى ەكونوميكالىق ارىپتەستەرى اراسىندا ەكىنشى ورىنعا يە. ءبىز ەلدەرىمىزدىڭ كەشەندى ءارى ستراتەگيالىق قارىم-قاتىناستارىن نىعايتۋعا نيەتتىمىز, – دەدى تاجىكستان رەسپۋبليكاسىنىڭ پرەزيدەنتى.
