ء«سان يندۋسترياسى» اتتى جەڭىل جانە توقىما ءوندىرىسىنىڭ حالىقارالىق كورمەسى اياسىندا جاس ديزاينەرلەر اراسىندا ۇيىمداستىرىلعان سايىسقا ج. كوشكىن «كوستيۋم» اتالىمى بويىنشا قاتىسىپ, كوپشىلىك نازارىنا Art on Rocks ەتنوستيلىندەگى ايەلدەر كيىمىنىڭ توپتاماسىن ۇسىندى. كونكۋرسقا يتاليا, بەلارۋس, ۇلىبريتانيا, فرانتسيا, رەسەي جانە قازاقستاننان كەلگەن 100-دەن استام ديزاينەر «تەكستيل», «گرافيكالىق ديزاين», «كوستيۋم» نوميناتسيالارى بويىنشا باپتارى مەن باقتارىن سىنادى.
– ءۇش كۇنگە سوزىلعان بايقاۋدا 143 جوبا ۇسىنىلدى. سونىڭ ىشىندە «كوستيۋم» باعىتى بويىنشا 34 جۇمىس, «تەكستيل» باعىتى بويىنشا 51 جۇمىس فينالعا جولداما الدى. ونلاين داۋىس بەرۋ ناتيجەسىندە «كاسىپتىك وقىتۋ» ماماندىعىنىڭ ستۋدەنتى جازيرا كوشكىننىڭ جۇمىسى جۇلدەلى ءۇشىنشى ورىنعا لايىق دەپ تانىلدى, – دەيدى جەتەكشىسى, كاسىپتىك ءبىلىم كافەدراسىنىڭ وقىتۋشىسى ۇلجان الاشاباەۆا.
ونىڭ ايتۋىنشا, قىزدار ۋنيۆەرسيتەتىنىڭ ستۋدەنتتەرىنىڭ بۇگىنگە دەيىن قول جەتكىزگەن جەتىستىكتەرى ءبىر بۇل عانا ەمەس. بۇعان دەيىن دە بىلىمگەرلەر رەسپۋبليكالىق, ايماقتىق ءسان بايقاۋلارىندا «جۇزدەن – جۇيرىك, مىڭنان – تۇلپار» شىعىپ, جۇلدەلى ورىندارعا يە بولىپ ءجۇر. وقۋ ورنىنىڭ ۇستازداردى ساندىك-قولدانبالى ونەر بۇيىمدارىن جاساۋدى جاستارعا جەتە تانىستىرىپ, بولاشاق مامانداردىڭ كاسىبي شەبەرلىگىن ارتتىرۋدى كوزدەپ وتىر.
– ماقساتىمىز – ستۋدەنتتەرگە قازاق حالقىنىڭ سان عاسىرلار بويى جيناقتالعان ەستەتيكالىق, مادەني مۇرالارىن تەرەڭ مەڭگەرتۋ ارقىلى ولاردىڭ تانىمدىق كوزقاراسىن قالىپتاستىرىپ, قولونەرگە قىزىعۋشىلىقتارىن وياتۋ. ۇلتتىق كيىم ۇلگىلەرىندەگى ەلەمەنتتەردى جاڭا ۇلگىدەگى ۇلتتىق كيىمدەرگە ەندىرىپ, سونى برەندتتەر قالىپتاستىرساق دەگەن ويدامىز, – دەپ اتاپ ءوتتى ۇ. الاشاباەۆا.
جازيرا كوشكىن ساباقتان تىس ۋاقىتتا ديزايندىق كيىم ۇلگىلەرى مەن كوللەكتسيالاردى مودەلدەپ, قۇراستىرۋدى ادەتكە اينالدىرعان.
– قازىرگى كۇندە ەڭبەك نارىعىندا ديزاينەر ماماندارىنا دەگەن قاجەتتىلىك بايقالادى. بۇعان سەبەپ تە جوق ەمەس. ۇلتتىڭ ۇلىلىعىن ۇلىقتايتىن بۇيىمدارعا سۇرانىس كۇن وتكەن سايىن ارتىپ كەلەدى. ەلىمىز بويىنشا ءسان ورتالىقتارى مەن شەبەرحانالار دا كوپتەپ اشىلۋدا. باستى ماقساتىم – اتا-بابا ءداستۇرىن كەڭىنەن ناسيحاتتاپ قانا قويماي, زامانداستارىمدى ءتول ونەردى باعالاۋعا, ۇلتتىق مۇرانى ساقتاۋعا ۇندەۋ, – دەيدى ج. كوشكىن.
