ءدال قازىرگى ۋاقىتتا ءوڭىردىڭ 6 بىردەي (اياگوز, ءۇرجار, كۇرشىم, ۇلان, گلۋبوكوە, زايسان) اۋدانى مەن وبلىس ورتالىعى – وسكەمەن قالاسىنىڭ تۇرعىندارى توتەنشە اپاتپەن ارپالىسۋدا. اسىرەسە كوممۋنالدىق سالا قىزمەتكەرلەرىندە تىنىم جوق. كەشە اۋا رايىنىڭ قولايسىزدىعىنا بايلانىستى وسكەمەن مەن ريددەر قالاسىنداعى مەكتەپتەردىڭ 1-11 سىنىپ وقۋشىلارى, 1-2 كۋرس ستۋدەنتتەرى ساباقتان بوساتىلدى. وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى تاراتقان مالىمەتتەرگە سۇيەنسەك, وڭىردەگى سۋ كىرگەن ۇيلەردىڭ سانى 100-دەن اسىپ كەتكەن. اياگوز اۋدانىندا 100 ءۇي, وسكەمەندە 8 ءۇي مەن 27 اۋلا, ۇلان اۋدانىندا 2 ءۇي مەن 4 اۋلا, گلۋبوكوە اۋدانىندا 3 ءۇي مەن 53 اۋلا, كۇرشىم اۋدانىندا 42 اۋلا قارعىن سۋدىڭ قۇرساۋىندا قالعان. توتەنشە جاعدايلار دەپارتامەنتى, جەرگىلىكتى پوليتسيا قىزمەتكەرلەرى, «وسكەمەن ءتارتىپ», «ۆودوكانال», شىعىس وڭىرلىك اەروۇتقىر قۇتقارۋ جاساعى وكىلدەرى وسى ۋاقىتقا دەيىن 1440 قۇمقاپ توسەپ, 15 000 تەكشە مەتر سۋ سورىپتى. ەرىگەن قار سۋىنىڭ جولعا شىعىپ كەتۋ وقيعاسى كۇرشىم, زايسان, ۇلان جانە ءۇرجار اۋداندارىندا تىركەلگەن. داعدارىس ورتالىعى جانىنان قۇرىلعان 1000 ادامدىق اپاتتىق-قۇتقارۋ توبىنىڭ 536 وكىلى قازىر اپات سالدارىمەن كۇرەسۋدە. سونداي-اق 137 تەحنيكا مەن 27 سۋ سورعى قۇرال جۇمىلدىرىلعان.
اياگوزدە 400 تۇرعىن قاۋىپسىز جەرگە كوشىرىلدى
قىس بويى بولماعان قار وڭىرگە اقپان ايىنىڭ اياعىن الا توپەلەتە جاۋعانى بەلگىلى. بۇعان ناۋرىز ايىنىڭ باسىنداعى جاڭبىر سۋى قوسىلعان. بۇدان كەيىن تاسقىن بولماعاندا قايتسىن؟!
ءدال قازىرگى كەزدە جوعارىدا ايتقان 6 اۋدان مەن 1 قالانىڭ ىشىندە اسىرەسە اياگوز قالاسىنىڭ تۇرعىندارىنا قيىنعا سوعىپ تۇر. 11 ناۋرىزدا اياگوز اۋدانى اكىمىنىڭ وكىمىمەن اياگوز قالاسى بويىنشا تابيعي سيپاتتاعى جەرگىلىكتى اۋقىمداعى توتەنشە جاعداي جاريالانعان بولاتىن. اۋداندىق ىشكى ساياسات ءبولىمىنىڭ ماماندارى ەرىگەن قار مەن جاۋىن-شاشىن سۋى 3 اۆتوكولىك, 5 جاياۋ جۇرگىنشى وتكەلى مەن 20-عا جۋىق ءۇيدى باسىپ قالعانىن, سۋ العان ۇيلەردەن 400 ادام (ونىڭ 30-ى بالا) قاۋىپسىز جەرگە كوشىرىلىپ, اياگوز قالاسىنداعى قازاق مەكتەپ-ليتسەيىنە, №6 ورتا مەكتەپ-ينتەرناتقا جانە تۋىستارىنىڭ ۇيىنە ورنالاستىرىلعانىن حابارلاعان ەدى. كەشە, ياعني 12 ناۋرىزدا اياگوز اۋداندىق توتەنشە جاعدايلار ءبولىمىنىڭ باسشىسى ج.قاليەۆتان كەلگەن رەسمي اقپاراتتا بۇل مالىمەتتەرگە ءبىرشاما وزگەرىستەر ەنگەنىن بايقادىق. ءبولىم باسشىسىنىڭ بەرگەن دەرەكتەرىنە سۇيەنسەك, سۋ باسقان ۇيلەر سانى – 100, بۇزىلعان ۇيلەر سانى – 8, اپاتتى ۇيلەر سانى – 10. «قازىرگى ۋاقىتتا جاعداي ءبىرشاما تۇراقتالدى. 12 ناۋرىز كۇنى اۋدان اكىمدىگىندە سۋ باسقان ۇيلەر مەن زارداپ شەككەندەردى انىقتاۋ ءۇشىن 4 توپ قۇرىلدى. سونىمەن قاتار قازىر شىعىس وڭىرلىك اەروۇتقىر قۇتقارۋ جاساعىنىڭ 16 قىزمەتكەرى 3 تەحنيكامەن جانە وسىنشا قايىقپەن اياگوز وزەنىنىڭ جاعاسىندا جۇمىس ىستەپ جاتىر. كەشە اياگوز قالاسىنداعى №6 ورتا مەكتەپ-ينتەرناتتا ورنالاسقان ادامدارعا سۋ جەتكىزىلدى», دەلىنگەن رەسمي مالىمەتتە. اياگوز اۋداندىق ىشكى ساياسات ءبولىمىنىڭ باسشىسى مەدەت مىرزىكەشوۆپەن تەلەفون ارقىلى سويلەسكەنىمىزدە, قۇرىلعان 4 توپ ۇيلەردى ارالاپ, شىعىن كولەمىن انىقتاۋمەن شۇعىلدانىپ جاتقانىن, كوشىرىلگەن ادامدار جاتىن ورىنمەن, تاماقپەن قامتاماسىز ەتىلگەنىن ايتتى. «اۋدانداعى اقساقالدار, جاستار, باسقا دا تۇرعىندار قولدان كەلگەن كومەكتەرىن كورسەتىپ جاتىر. قالاداعى «شوكولود», «بايتەرەك» دەگەن ءدامحانالاردا تەگىن تاماق ۇيىمداستىرىلعان», دەدى ول.
ماماي اۋىلىنا جاڭا كوپىر سالىنادى
وبلىس ورتالىعى – وسكەمەندە دە جاعداي ءماز بولىپ تۇرعان جوق. 11 ناۋرىز كۇنى قالانىڭ ورتالىق كوشەلەرى كولكىگەن سۋدىڭ استىندا قالىپ, كوشەگە جايىلعان سۋدان ادامدار تۇگىل كولىكتەردىڭ ءوزى ازەر وتكەن-ءدى. قارعىن سۋ, اسىرەسە شاھاردىڭ كراسين, كۇلەنوۆ, شمەلەۆ لوگ, احمەر, سامسونوۆ, ابلاكەت جانە ميرنىي ەلدى مەكەندەرىنىڭ تۇرعىندارىن اۋرەگە سالعان-دى. ابلاكەت كەنتىندەگى فايزراحمانوۆتار وتباسىنىڭ وسىدان ءۇش جىل بۇرىن عانا سالىنعان ءۇيى سۋعا تولىپ, مۇلدە جارامسىز بولىپ قالعان ەدى. 11 ناۋرىز كۇنى وسكەمەننىڭ اكىمى قۋات تۇماباەۆ كورشىلەرىنىڭ ءۇيىن پانالاپ وتىرعان وتباسى مۇشەلەرىمەن كەزدەسىپ, ماسەلە بىرجاقتى بولعانشا, دوبروليۋبوۆ كوشەسىنەن ۋاقىتشا تۇراتىن پاتەر بەرىلەتىنىن جەتكىزدى.
كەشە قالادا قالىپتاسقان جاعدايمەن اياعىنا رەزەڭكە ەتىك كيىپ وبلىس اكىمى دانيال احمەتوۆتىڭ ءوزى ارنايى تانىسىپ شىقتى. كراسين كەنتى مەن ابلاكەتكا شاعىن اۋداندارىندا قارعىن سۋ باسقان جەكە ۇيلەردىڭ تۇرعىندارىمەن كەزدەسىپ, پىكىرلەرىن تىڭدادى. كراسين كەنتىندەگى كوجەدۋب جانە پۋشكين كوشەلەرى بويىندا ورنالاسقان ءتورت ءۇيدىڭ اۋلاسى ارىق سۋى ارناسىنان اسقان سوڭ 40 سانتيمەترلىك سۋ استىندا قالىپتى. جەرگىلىكتى تۇرعىنداردىڭ ءبىرى اندرەي تاتارچەنكو اكىمگە مۇنداي جاعدايدىڭ ورىن الۋىنا وسى ماڭداعى ارىق ارناسىنىڭ ۋاقتىلى تازالانباۋى سەبەپ بولعانىن ايتىپ, مۇڭىن شاقتى. ءوز كەزەگىندە ايماق باسشىسى: «سىزدەر ءبىر ارىقتىڭ سۋىمەن ءبىر تاۋلىك بويى الىستىڭىزدار. اينالدىرعان 4 ءۇيدىڭ ماسەلەسىن وسىنشاما ۇزاق ۋاقىت شەشە الماۋلارىڭىز اقىلعا سىيمايدى. بىلتىر قوماقتى قاراجات ءبولىپ, مۇنداي جاعدايعا قاجەت تەحنيكا الۋعا جاردەمدەسكەنبىز. سول تەحنيكالار قايدا؟ جالپى, مۇنداي جاعدايدىڭ قالىپتاسۋىنا تابيعات قانا ەمەس, ءوز مىندەتتەرىنە سالعىرت قاراعان كەيبىر لاۋازىمدى تۇلعالار دا كىنالى», دەپ وبلىستىق توتەنشە جاعدايلار دەپارتامەنتى مەن قالا اكىمدىگىنىڭ جۇمىسىن قاتاڭ سىنعا الدى.
وڭىردە بىرنەشە كۇن بويى تولاستاماي جاۋعان جاڭبىر سالدارىنان ۇلان, اياگوز, گلۋبوكوە اۋداندارىنداعى بىرقاتار وزەندەر ارناسىنان اسىپ, ماڭايداعى ەلدى مەكەندەرگە قاۋىپ توندىرگەن-ءدى. سونداي اپاتتى جاعداي ۇلان اۋدانىنىڭ ماماي باتىر اۋىلىندا دا قالىپتاسقان بولاتىن. ابلاكەت اۋىلدىق وكرۋگىنىڭ اكىمى ارسلان اعىلانبەكوۆتىڭ ايتۋىنشا, جەكسەنبى كۇنى تاڭەرتەڭ اۋىل شەتىمەن اعىپ وتەتىن وزەندەگى سۋ دەڭگەيى كۇرت كوتەرىلىپ, ەلدى مەكەنگە كىرەبەرىستەگى كوپىردى باسقان. سونىڭ سالدارىنان اۋىل مەن وزگە ەلدى مەكەندەر اراسىنداعى بايلانىس ۇزىلگەن. اۋدان باسشىلىعى مەن وبلىستىق توتەنشە جاعدايلار دەپارتامەنتى قابىلداعان شۇعىل شارالار ناتيجەسىندە ءبىر تاۋلىك ىشىندە جاعداي قاناعاتتانارلىق دەڭگەيگە جەتكىزىلىپتى. وبلىس اكىمى بۇل اۋىلداعى جاعدايدى دا ءوز كوزىمەن كورىپ, جاقىن ۋاقىتتا ەلدى مەكەننىڭ كىرەبەرىسىنە جاڭا كوپىر سالىناتىنىن ايتتى.
بەت قاتتالىپ جاتقاندا:
كۇرشىم اۋدانىنداعى كۇرشىم مەن توپتەرەك اۋىلدارىنىڭ اراسىن جالعايتىن كوپىردى سۋ شايىپ كەتتى دەگەن سۋىت حابار جەتتى. وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى قازىرگى ۋاقىتتا كۇرشىم اۋداندىق توتەنشە جاعدايلار ءبولىمى, جەرگىلىكتى پوليتسيا مەن اكىمدىك شىعىس وڭىرلىك اەروۇتقىر قۇتقارۋ جاساعى وكىلدەرىمەن بىرلەسىپ اۋىل تۇرعىندارىن وزەننەن قايىق ارقىلى وتكىزىپ جاتقانىن حابارلادى.
ازامات قاسىم,
«ەگەمەن قازاقستان»
شىعىس قازاقستان وبلىسى
