وڭتۇستىك قازاقستان وبلىسى ادام رەسۋرسىنا باي, مۇنداعى حالىقتىڭ سانى ءۇش ميلليونعا جەتەقابىل بولىپ قالدى. مىڭداعان جاستار باس قۇراعانىمەن پاتەرلەرى بولماي, قيىندىق كورىپ, تاعدىر جولى ەكى ايىرىلىپ جاتقاندارى كوبەيىپ بارادى. بۇل جاعداي مەملەكەت باسشىسىن دا قاتتى الاڭداتىپ جۇرگەنىن بىلەمىز.
سوندىقتان دا «پرەزيدەنتتىڭ بەس الەۋمەتتىك باستاماسى» اتتى ۇندەۋىندە الەۋمەتتىك جوبالاردىڭ العاشقىسىندا باسپانا ماسەلەسىن شەشۋدىڭ حالىققا اسا ىڭعايلى تەتىكتەرى ايتىلدى.
جۇمىسى بار ءاربىر شاڭىراق ءۇشىن ەلباسى «7 – 20 – 25» باعدارلاماسىن ۇسىنىپ وتىر. قازىر ءىرى قالالاردا مىڭداعان وتباسى ايىنا 100-150 مىڭ تەڭگەگە پاتەر جالداپ تۇرىپ جاتىر. مۇنىڭ ىشىندە كوممۋنالدىق تولەمدەردى ءوزى تولەيتىندىگىن قوسساڭىز, جاس شاڭىراقتىڭ عۇمىر بويى باسپانالى بولۋىنا جاعدايى كەلمەۋى مۇمكىن. مەملەكەت باسشىسى يپوتەكالىق نەسيە پايىزىن ازايتىپ, 7 پايىزعا ءتۇسىرۋدى ۇسىندى. بۇل ەكى جەپ بيگە شىعىپ قالعان بانكتەر ءۇشىن ءتيىمسىز بولعانىمەن, قازاقستاندىقتاردىڭ باسپانالى بولۋىنا بىردەن ءبىر جاقسى جول. بىرەۋلەر وسى جىلدار ىشىندەگى پايىزدى قايتا-قايتا ەسەپتەپ, الا وكپە بولىپ جاتىر. تەگىن ىرىمشىكتىڭ تەك تىشقان اۋلاعىش قاقپاندا بولاتىنىن ەسكەرسەك, بۇل پاتەر جالداپ الداعى ومىردەن ءۇمىتسىز بولعاننان مىڭ ەسە ارتىق جوبا عوي. قازىر – نارىق زامانى, تەگىن بەر دەيتىندەي ۋاقىت ەمەس. قارجى شىعارىپ وتىرعان قۇرىلىمدار بانكروتتىققا بارا المايدى.
العاشقى جارنا 20 پايىزدان اسپاعاندىقتان ميلليونداعان ازاماتتار تاياۋ جىلداردا باسپانالى بولادى.
وڭتۇستىك ءۇشىن تاعى ءبىر وزەكتى ماسەلە جۇمىسسىزدىقتىڭ الدىن الۋ بولىپ وتىر. ناتيجەلى جۇمىسپەن قامتۋ جانە كاسىپكەرلىكتى دامىتۋ باعدارلاماسىنا ۇكىمەت 85 ملرد تەڭگە ءبولىپ, جۇمىسسىزداردى وقىتۋ ارقىلى قىسقا مەرزىمدە ماماندىقتار بەرىپ جاتىر.
ءوزىن ءوزى جۇمىسپەن قامتىعان جانە جۇمىسسىز ازاماتتار ءۇشىن «باستاۋ بيزنەس» جوباسى اسا ماڭىزعا يە بولۋدا. ەلباسى «2018 جىلى قوسىمشا 20 ميلليارد تەڭگە ءبولىپ, شاعىن نەسيەلەردىڭ جالپى سوماسىن 62 ميلليارد تەڭگەگە جەتكىزۋدى تاپسىرامىن. ناتيجەسىندە شاعىن نەسيە الاتىنداردىڭ سانى 2017 جىلمەن سالىستىرعاندا 2 ەسەگە ارتىپ, 14 مىڭ ادامعا جەتەتىن بولادى» دەدى.
قازىرگى كەزدە قازاقستاننىڭ اگروونەركاسىپ سەكتورى تۇراقتى دامۋ ۇستىندە. وڭتۇستىك ءوڭىرى اگرارلىق ايماق بولعاندىقتان, بۇل باعىتتا دا جاڭا تەحنولوگيالار ەنگىزۋ بويىنشا جۇمىستار جۇيەلى تۇردە اتقارىلىپ وتىر. بۇگىنگى تاڭدا وڭىردەگى اگرارلىق سەكتوردى يگەرۋ جانە يننوۆاتسيالاردى ەنگىزۋ ەڭ ماڭىزدى ماسەلەلەردىڭ بىرىنە اينالۋدا. وبلىس اكىمى جانسەيىت تۇيمەباەۆ الداعى ۋاقىتتا ينتەنسيۆتى باق, تامشىلاتىپ سۋارۋ, جىلىجاي كولەمىن ۇلعايتۋ باعىتتارىندا جاڭا تەحنولوگيالار ەنگىزۋ ارقىلى ونىمدىلىكتى ارتىرۋعا بولاتىنىن ۇنەمى ايتىپ كەلەدى. ياعني مەملەكەتتىك قولداۋ ارقىلى جاڭا جۇمىس ورىندارىن اشۋعا مۇمكىندىك مول.
وڭتۇستىك قازاقستاننىڭ ەڭبەكقور حالقى مەملەكەت باسشىسىنىڭ بۇل ۇندەۋدەن ۇلكەن جاقسىلىقتار كۇتىپ وتىر.
قايرات بالابيەۆ,
وڭتۇستىك قازاقستان وبلىستىق ءماسليحاتىنىڭ حاتشىسى, زاڭ عىلىمدارىنىڭ دوكتورى
وڭتۇستىك قازاقستان وبلىسى
