ەلباسى پارلامەنت پالاتالارىنىڭ بىرلەسكەن وتىرىسىندا جاريالاعان ۇندەۋىندە قازاقستاندى ودان ءارى كەمەلدەندىرە تۇسەتىن اۋقىمدى باعدارلامالار ۇسىنىپ, بەس الەۋمەتتىك جوبانى دارالاپ كورسەتتى, دەي كەلىپ قۇمار ىرگەباي ۇلى الدا بەلسەندى جۇمىستار كۇتىپ تۇرعانىن اتاپ كورسەتتى. تۇرعىنداردى قولجەتىمدى ءارى جايلى باسپانامەن قامتاماسىز ەتۋ–كوكەيكەستى ماسەلەلەردىڭ ءبىرى. وبلىستا 19 مىڭ ادام پاتەر كەزەگىندە تۇرسا, 32 مىڭ ادام «تۇرعىن ءۇي قۇرىلىس جيناق بانكى» ارقىلى جەكە ەسەپ-شوت اشقان. قۇرىلىس يندۋسترياسىن جانداندىرۋدىڭ ارقاسىندا بىلتىر 200 مىڭ شارشى مەتر تۇرعىن ءۇي پايدالانۋعا بەرىلدى. ۇلتتىق قوردىڭ قاراجاتى ەسەبىنەن 400 پاتەر ىسكە قوسىلدى. «نۇرلى جەر», «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلامالارى ارقىلى 19 كوپ قاباتتى تۇرعىن ءۇي قولدانىسقا بەرىلەدى. «7–20–25» باعدارلاماسى ءار وتباسى ءۇشىن باسپانا الۋدىڭ جاڭا اۋقىمىن ايقىنداپ بەردى. وعان قول جەتكىزۋ ماقساتىمەن جەڭىلدىكتى نەسيە تەتىكتەرى ۇسىنىلىپ, تۇرعىن ءۇي ماسەلەسىن جىلدام شەشۋدىڭ قولجەتىمدىلىگى ارتا تۇسەتىن بولادى.
سالىق جۇكتەمەسىن ازايتۋ– جالاقىسى تومەن ساناتتاعىلار ءۇشىن ۇلكەن جەڭىلدىكتەردىڭ ءبىرى. جاسىراتىنى جوق, سالىقتىڭ شامادان تىس كوپتىگىنەن كولەڭكەلى بيزنەسپەن اينالىساتىندار, تابىسىن جاسىراتىندار, مىندەتتى الىم تولەۋدەن جالتاراتىندار از ەمەس. جالدانىپ جۇمىس ىستەيتىن اۋىلدىقتار تومەنگى ەڭبەكاقىنى قاناعات تۇتۋعا ءماجبۇر. سالىق مولشەرىنىڭ كەمىتىلۋى ەسەبىنەن ءوڭىر ءبىر ميلليارد تەڭگەگە جۋىق شىعىن شەگەتىنىنە قاراماستان جۇرتشىلىقتىڭ كىرىسى كوبەيىپ, ساتىپ الۋ مۇمكىندىگى ارتادى دەگەن ءۇمىت زور. ق. اقساقالوۆ ازىق-ت ۇلىك قاۋىپسىزدىگىن قامتاماسىز ەتۋدى, ءبىرىنشى كەزەكتە تۇتىناتىن تاعامدار باعاسىنىڭ قولجەتىمدى بولۋىن ءتيىستى ورىندارعا كۇنبەكۇن قاداعالاپ وتىرۋدى تاپسىردى.
جاپپاي كاسىپكەرلىكتى دامىتۋ اياسىندا ءوزىن-ءوزى جۇمىسپەن قامتىعان جانە جۇمىسسىز جۇرگەن جانداردى قوعامدىق پايدالى ىستەرگە تارتۋدىڭ جولدارى كوپ. سونداي ىنتالاندىرۋ شارالارىنىڭ ءبىرى جەڭىلدەتىلگەن نەسيە بەرۋ تاجىريبەدەن وتكەن, اقتالعان ءادىس بولىپ تابىلادى. وتكەن جىلى بۇل سالاعا 2 ميلليارد تەڭگەنىڭ 437 شاعىن نەسيەسى باعىتتالسا, 425-ءى اۋىلدىقتاردىڭ ەنشىسىندە. بيىل 2,8 ميلليارد تەڭگە قاراستىرىلعان. قوسىمشا ءبىر ميلليارد تەڭگە ءبولىنىپ, جالپى نەسيەلەۋ كولەمى 4 ميلليارد تەڭگەگە دەيىن ۇلعايتىلادى. 800 ادام جاڭا كاسىبىن اشاتىن بولادى. الداعى ۋاقىتتا 5 ميلليارد تەڭگەگە دەيىن ءوسىرىلىپ, 1 مىڭ ادام قامتىلادى.
ەلباسىنىڭ بەسىنشى باستاماسى ەلدى گازبەن قامتاماسىز ەتۋ جايىنا ارنالدى. بۇل ورايدا ورتالىق جانە سولتۇستىك وڭىرلەردىڭ ءالى كوگىلدىر وتىنسىز وتىرعانى ەسكەرىلىپ, ماگيسترالدى گاز قۇبىرىن سالۋ جوباسى جالعاساتىنى مالىمدەلدى. ايماق باسشىسى جەرگىلىكتى ءوندىرىس ورىندارى مەن ءۇي شارۋاشىلىقتارى نەگىزىنەن سۇيىتىلعان گاز قولداناتىنىن, كومىر جاعۋ قورشاعان ورتاعا, ەكولوگياعا ۇلكەن زيان تيگىزەتىنىن اتاپ كورسەتتى. گاز ماگيسترالىنىڭ جالپى ۇزىندىعى 1,5 مىڭ شاقىرىمدى قۇراسا, 141 شاقىرىمى تايىنشا, اققايىڭ, قىزىلجار اۋداندارى ارقىلى وتەتىن بولادى. وسىلايشا ەكولوگيالىق احۋال دا جاقسارادى.
جيىندا ءسوز العان م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ رەكتورى سەرىك ومىرباەۆ بۇدان بىلاي جوعارى ءبىلىمدى دارىگەرلەر دە دايارلاناتىنىن, گرانتتار سانى ارتاتىنىن, كەلەشەكتە 500 ورىنعا لايىقتالعان ەكى جاتاقحانا سالىناتىنىن جەتكىزدى. باسقا دا سويلەۋشىلەر ەلباسى ۇسىنعان بەس الەۋمەتتىك جوبانى جۇزەگە اسىرۋدىڭ الەۋەتى زور ەكەنىن اڭگىمەلەدى.
ءومىر ەسقالي.
«ەگەمەن قازاقستان».
سولتۇستىك قازاقستان وبلىسى.
