وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ تاراتقان مالىمەتتەرىنە سۇيەنسەك, قازىرگى ۋاقىتتا ايماقتاعى 6 جەكە ءۇي مەن 25 اۋلانى سۋ باسقان. ناقتىراق ايتساق, وسكەمەندە 4 ءۇي مەن 14 ۋچاسكەنى, اياگوز اۋدانىندا 2 ءۇي مەن 6 ۋچاسكەنى, ۇلان اۋدانىندا 5 اۋلا اۋماعى جاڭبىر مەن ەرىگەن قار سۋىنىڭ استىندا قالعان. قازىرگى ۋاقىتتا توتەنشە جاعدايلار دەپارتامەنتىنىڭ 186 قىزمەتكەرى, 46 تەحنيكاسى مەن 17 سۋ سورۋ قۇرىلعىسى ءتىلسىز جاۋمەن كۇرەس جۇرگىزۋدە. ۇيلەر مەن اۋلالارداعى سۋدى سورۋ, قۇم توگۋ, بەكىتۋ جۇمىستارى قولعا الىنۋدا. زارداپ شەككەن ەشكىم جوق.
ۇلان اۋدانى اۋماعىنان وتەتىن «وسكەمەن-الماتى» باعىتىنداعى رەسپۋبليكالىق ماڭىزداعى جولدىڭ 2 ۋچاسكەسىندە قار سۋى جول ۇستىنە جايىلىپ كەتكەن. قازىرگى ۋاقىتتا «قازاقاۆتوجول» مەكەمەسىنىڭ قىزمەتكەرلەرى جولدى بەكىتۋ جۇمىستارىن جۇرگىزىپ جاتىر.
وبلىس ورتالىعى – وسكەمەندە تۇرعىن ۇيلەردىڭ اۋلالارى مەن جەكە مەنشىك ۇيلەردى سۋ باسۋمەن قاتار قالانىڭ ورتالىق كوشەلەرى دە كولكىگەن قار سۋىنىڭ استىندا قالعان. شاھار شەتىندەگى كراسينا, بابكينا مەلنيتسا, كەمەجاي, ابلاكەتكا كەنتتەرىنىڭ تۇرعىندارى ءتىلسىز جاۋمەن ءتۇنى بويى ارپالىسقاندارىن ايتىپ, شاعىمدانۋدا. «سۋعارالار دۇرىس جۇمىس ىستەمەيدى. اۋا-رايىنىڭ بولجامىنان بارلىعى حاباردار, سونىڭ سالدارىنا دايىن بولۋ كەرەك ەمەس پە؟ جىلدا وسى», - دەيدى اشۋعا مىنگەن كراسينا كەنتىنىڭ تۇرعىندارى.
وسكەمەن قالاسىنىڭ تجب ءباسپاسوز قىزمەتىنىڭ مامانى مارينا ليسكوۆا ءبىر تۇندە 300-گە جۋىق قوڭىراۋ شالىنعانىن, قۇتقارۋ جۇمىستارى تىنىمسىز جۇرگىزىلىپ جاتقانىن حابارلادى. ء«بارىن ءبىلىپ وتىرمىز. ءتۇنى بويى تۇرعىنداردان حابارلامالار ءتۇسىپ جاتىر, قىزمەتكەرلەر جۇمىس ىستەۋدە. كومەك قاجەت بولسا, ەكى جەلى اشىق تۇر. وسكەمەندىكتەر 138 تەلەفونىنا, وبلىس تۇرعىندارى 112 نومىرىنە حابارلاسا الادى», - دەيدى ول.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتەر وبلىستىق توتەنشە جاعدايلار دەپارتامەنتى ءباسپاسوز قىزمەتىنەن الىندى
