جۋرناليستەر قاۋىمىنا ماڭعىستاۋ فيليالىنىڭ بۇگىنگى قىزمەتى تانىستىرىلىپ, قۇتقارۋشىلاردىڭ قاۋىپتى دە جاۋاپتى جۇمىستارىنان جاتتىعۋ دابىلدارى نازارعا ۇسىنىلدى, سونداي-اق, وڭىرىمىزدەگى جالعىز اسكەريلەندىرىلگەن كاسىبي مەكەمەنىڭ قۇرال-جابدىقتارى مەن ارنايى تەحنيكاسى تانىستىرىلدى. جۋرناليستەر نازارىنا ونەركاسىپتىك الپينيزم وقۋ-جاتتىعۋى ناقتى تۇردە ۇسىنىلدى. قۇتقارۋشىلار بيىكتىكتە زارداپ شەگۋشىنى الىپ شىعىپ, العاشقى كومەك كورسەتتى.
-زارداپ شەگۋشىنى بۇرعىلاۋ قۇرىلعىسىنان الپينيستىك قۇرال-جابدىق ارقىلى الىپ شىعۋ – وڭاي شارۋا ەمەس. ەرەجە بويىنشا ءىس-قيمىل 15 مينۋتقا سوزىلادى. ەگەر, كومەك ۋاقىتىلى كورسەتىلمەسە, زارداپ شەگۋشى ءولىپ كەتۋى مۇمكىن. ديسپەتچەردەن بولعان وقيعا تۋرالى اقپاراتتى العان سوڭ, بىردەن قاجەتتى قۇرال-سايمانداردى دايىندايمىز. جاڭا عانا بيىكتىكتە زارداپ شەككەن ادامدى قۇتقارىپ الدىق, 20 قۇتقارۋشى ونەركاسىپتىك الپينيزم بويىنشا ارنايى كۋرستان ءوتتى, دەيدى ۆزۆود كومانديرى تۇرالى كوچەرباەۆ.
ودان ءارى جۋرناليستەر فيليال بازاسىنداعى قۇرال-سايماندار مەن ارنايى تەحنيكامەن تانىستى جانە وقۋ زالىندا تاجىريبەلى ينجەنەر ەسەن قاناەۆ ءدارىس وتكىزدى, تىلشىلەر قۇتقارۋشىلاردىڭ قيىن دا جاۋاپتى جۇمىسى جايىنداعى بەينەروليكتى تاماشالادى.
جۋرناليستەر فيليال قىزمەتكەرلەرىنىڭ ءبىر كۇندىك جۇمىسىمەن تانىسىپ, الداعى ۋاقىتتا اقپاراتتىق قولداۋ كورسەتۋگە ءازىر ەكەندىكتەرىن جەتكىزدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
