«جاسىل جايلاۋ, تۇكتى كىلەم, كوك كىلەم,
كوك كىلەمدە كوپ اۋنايمىن, كوپ كۇلەم.
كۇننىڭ نۇرىن, ايدىڭ اپپاق ساۋلەسىن,
قازاعىمنىڭ ماحابباتى دەپ بىلەم». كوگالدا وكپەسى وشكەنشە اسىر سالىپ, الىسىپ-ج ۇلىسقان بالا كەزىڭنەن باستاپ قازىرگى ەسەيگەن شاعىڭا دەيىنگى ءومىرىڭنىڭ ءبارىن جالقى شۋماققا سىيعىزىپ, كوڭىلدە قالعىپ جاتقان جىپ-جىلى ەستەلىكتىڭ ءبارىن وياتىپ, جان-جۇرەگىڭدى ەلجىرەتىپ جىبەرمەي مە؟! جاسىل جايلاۋ, اسقار تاۋلار, باياۋ ەسكەن سامال جەلى, كۇننىڭ نۇرى, ايدىڭ اپپاق ساۋلەسى – ءبارى قازاعىڭنىڭ ساعان, سەن سياقتى بارشا پەرزەنتىنە دەگەن ماحابباتى. كۇن سايىنعى كۇيبىڭ تىرلىك, تەلەارنالار مەن ينتەرنەت سايتتاردان توگىلىپ جاتقان توپان اقپاراتتىڭ ءبارى ساپ تىيىلادى. كوڭىلىڭ تازارىپ قالادى. كۇن سايىن باسىنا قوقىس توگىلىپ, ەڭسەسى الاسارىپ بارا جاتقان قازاعىڭنىڭ «مارتەبەسى اسپانمەن تالاسقان اسقار تاۋلارمەن» بىرگە قايتا بيىكتەپ كەتكەندەي.
قادىر مىرزا – ءالىنىڭ قالامىنىڭ قۇدىرەتى مەن ەسكەندىر حاسانعاليەۆتىڭ كومپوزيتورلىق تالانتى توعىسقان كەزدە وسىنداي عاجاپ ءان تۋعانىنا قۋاناسىڭ. ەسكەندىر حاسانعاليەۆتەن باسقا بىرەۋ بۇل ءاندى ءدال سولاي ايتا الادى دەگەنگە سول ساتتە ولسەڭ دە سەنبەيسىڭ. «قازاقستانىم» دەگەن ءبىر ءسوزى بولماسا دا, «اتامەكەن» – پاتريوتتىق ءاننىڭ اسقار شىڭى ەكەنىنە ءشۇباسىز سەنەسىڭ. جارتى عاسىرعا جۋىق ۋاقىت بۇرىن شىقسا دا, سودان بەرى شىرقالىپ كەلە جاتسا دا ەسكىرمەگەن, ەسكىرمەيتىن تۋىندى.
بەلگىلى قالامگەر قالي سارسەنباي «شال مەن شىندىق» اتتى كىتابىندا «رەسەي تەلەديدارى «شيروكا رەكانى» نەگە ءجيى بەرەدى؟» دەپ ساۋال قويىپتى. سوسىن:
– شالقار, بايتاق ءان. ءاننىڭ تابيعاتى, بولمىسى كەرەمەت! ءانشىسى, ورىنداۋشىسى قانداي دەسەڭشى! زىكينا, تولكۋنوۆا ۇردىسىندەگى ءانشى. وسى ءان ايتىلعاندا انسامبل مۇشەلەرىنىڭ ءبارى جۇتىنىپ, جۇلقىنىپ كەتەدى. ولار تۇگىل تىڭداپ وتىرعان ءسىزدىڭ ءوزىڭىز شىدامايسىز. ءاننىڭ سونشالىقتى سىرى, كەرەمەتتىگى نەدە؟ وندا ورىس رۋحى تۇنىپ تۇر. ورىس دالاسى, وزەن-كولى, ورمان-توعايى كورىنەدى, وسىنىڭ ءبارى سەنىكى دەيدى. بۇدان كەيىن ورىس قالاي رۋحتانبايدى؟– دەپ ءوزى جاۋاپ بەرەدى. ءبىزدىڭ «اتامەكەن» دە سونداي ءان, رۋحتاندىراتىن ءان.
قازاقتا تۋعان جەر, وتان تۋرالى اندەر از ەمەس. تاس بۇعاۋدان بوساماي تۇرعان كەزدە بەيرەسمي انۇرانعا اينالعان ءشامشى مەن جۇمەكەننىڭ «مەنىڭ قازاقستانىمى», ش.ساريەۆ پەن ج.تۇياقباەۆتىڭ «اتامەكەنى», اعايىندى ابدۋلليندەر شىرقايتىن «تۋعان جەر»... ايتا بەرسەك, اقىندارىمىز بەن كومپوزيتورلارىمىز پاتريوتتىق اندەردىڭ پلانكاسىن الدەقاشان كوتەرىپ تاستاعان.
وكىنىشكە قاراي, كەيىنگى شىققان اندەردى تىڭداعاندا تەبىرەنۋ قيىن. «جانىم دا قازاق, قانىم دا قازاق» «جاسا, قازاق, سامعا قازاق», «العا قازاق», «بويىمدا قازاقتىڭ قانى بار» دەگەن ءتىل ۇشىنان كۇشتەپ سۋىرىلىپ, تابان استىندا قۇراستىرىلا سالعان جاۋىر تىركەس, جەڭىل-جەلپى ماداق, كەرىسىنشە, جۇرەگىڭىزدى اينىتىپ جىبەرۋى مۇمكىن. قازاقى رەڭك بەرۋ ءۇشىن دومبىرانىڭ ءۇنىن قوسسا دا, ونى باسىپ كەتەتىن سالدىر-گۇلدىر دىبىستار كوڭىل قىلىن شەرتە الماسى حاق. مەرەكەلىك كونتسەرتتەردىڭ سوڭىندا «اتامەكەن» شىرقالعان كەزدە, زال تولى حالىق وتىرعان ورنىنان ەرىكسىز تۇرەگەلىپ, ەسكەندىرمەن بىرگە قوسىلا شىرقايدى. ال ءسىز سوڭعى جىلدارداعى انگە كورەرمەننىڭ سولاي تولقىعانىن, ءبارى ءبىر ادامداي قوسىلا شىرقاعانىن كوردىڭىز بە؟ «العا, سامعا, شاپ...» دەگەن ۇراندارىنا اۋزىن جىبىرلاتىپ, قولىن سەرمەۋدەن اسپايدى-اۋ.
ول قالاي تەبىرەنتسىن؟ جاس انشىلەردىڭ سۇحباتىن وقىپ كورىڭىزدەر, ءبارى ءبىر-بىرىمەن كەلىسىپ العانداي «رەپەرتۋارىندا ماحاببات تۋرالى اندەر كوبەيىپ كەتكەنىن, جاقىن كۇندەرى وتان تۋرالى, تۋعان جەر تۋرالى 2-3 ءان جازعىزۋدى جوسپارلاپ جۇرگەنىن ايتادى. ءبارى جوسپارلى. تويعا بارۋ كەرەك, تەلەارناعا شىعۋ كەرەك, الەۋمەتتىك جەلىنى شۋلاتۋ كەرەك. اراسىندا وتان تۋرالى ءان ايتىپ تۇرۋ دا ارتىقتىق ەتپەيدى, رەسمي كونتسەرتتەرگە قاتىسقاندا نەمەسە ءوزىنىڭ جەكە كونتسەرتىن وتكىزگەندە كەرەك بولىپ قالادى. ال «اتامەكەن» سياقتى قازاقتىڭ مىنەزىندەي, قازاقتىڭ دالاسىنداي بايتاق اندەر ونداي كۇيبىڭ تىرلىكتىڭ قالتارىسىنان تۋمايدى عوي.
ارنۇر اسقار,
«ەگەمەن قازاقستان»
