جاستارعا تىكەلەي قاتىسى بار تۇرعىن ءۇي قولجەتىمدىلىگى, جوعارى ءبىلىم ساپاسىنىڭ ارتۋى مەن شاعىن جانە ورتا كاسىپكەرلىكتى دامىتۋعا ارنالعان ۇسىنىستار مەملەكەتتىك ساياسي شەشىمدەردىڭ ۇلكەن بولىگى جاستارعا باعىتتالعانىن كورسەتەدى. بىزگە بەرىلگەن جەڭىلدىكتەر مەن مۇمكىندىكتەر – جاستارعا ارتىلعان جاۋاپكەرشىلىكتىڭ اسقانىنىڭ دا كورسەتكىشى.
العاشقى جوبا قازاقستاننىڭ كەز كەلگەن تۇرعىنىنىڭ كوكەيىندە جۇرگەن سۇراققا ءدوپ تۇسكەنىنە سەنىمدىمىن. تۇرعىن ءۇي ەلىمىزدەگى, اسىرەسە استانا مەن الماتى قالالارىنىڭ تۇرعىندارى ءۇشىن وتە وزەكتى ماسەلە. 7-20-25 باعدارلاماسى بارشا قازاقستاندىقتارعا, اسىرەسە جاس وتباسىلارعا قىسقا مەرزىمدە تۇرعىن ءۇي باعاسىنىڭ بەستەن ءبىر بولىگىن جيناپ, تومەن پايىزدىق مولشەرلەمەمەن باسپانالى بولۋلارىنا مۇمكىندىك بەرەدى. الەمنىڭ دامىعان ەلدەرىنىڭ, مەگاپوليس قالالاردىڭ تاجىريبەسىنە قاراساق, تۇرعىن ءۇي ماسەلەسى شەشىمىن ءالى كۇنگە دەيىن تاپپاي كەلەدى. يپوتەكاعا باسپانا الۋ – الەمدىك تاجىريبە, ال مەملەكەتتىڭ پارىزى – ازاماتتارىنا ۇتىمدى شارتتا نەسيە ۇسىنۋ.
ال جوعارى وقۋ ساپاسىنىڭ ارتۋى مەن ستۋدەنتتەردىڭ الەۋمەتتىك جاعدايىنىڭ جاقسارۋى ءبىلىمدى جانە باسەكەگە قابىلەتتى مامانداردى دايارلاۋدا ءوز جەمىسىن بەرەرى ءسوزسىز. قوسىمشا بەرىلەتىن 20 مىڭ گرانت سانى ەلىمىزدەگى الداعى جىلى وقۋ بىتىرۋشىلەردىڭ تەگىن وقۋعا قول جەتكىزۋ مۇمكىندىكتەرىن ەسەلەي تۇسپەك. قوسىمشا گرانتتار سانى وقۋشىلاردىڭ وزگە ەلدىڭ جوعارى وقۋ ورىندارىنا باسىمدىق بەرۋىنىڭ شەشىمىنە اينالۋى ءتيىس. اسىرەسە, رەسەيمەن شەكارالاس ورنالاسقان ايماق وقۋشىلارى اراسىندا رەسەيلىك جوعارى وقۋ ورىندارىن تاڭداۋ تەندەنتسياسى بايقالادى. ساپالى مامانداردىڭ ەلىمىزدە دايىندالىپ, وسىندا قالۋىنا سەپتىگىن تيگىزۋى كەرەك.
سونىمەن قاتار, شاعىن جانە ورتا كاسىپكەرلىكتى دامىتۋعا بەرىلەتىن ميكروكرەديتتەر مولشەرى 20 ملرد تەڭگەگە ارتۋى دا جاستارعا ءتيىمدى دەپ ەسەپتەيمىن. بۇل جاستار اراسىنداعى جۇمىسسىزدىق ماسەلەسىن شەشۋگە دە اسەر ەتپەك. جۇمىسسىزدىق سەبەبىنەن ورىن الاتىن ءتۇرلى قۇقىق بۇزۋشىلىق ارەكەتتەردىڭ دە ازايۋىنا الىپ كەلەدى دەگەن ويدامىن.
ەلباسى وسى باستامالاردى قاداعالاۋدى «نۇر وتان» پارتياسىنا تابىستادى, ال پارتيانىڭ جاستار قاناتى رەتىندە «جاس وتان» تىكەلەي قاتىسادى.
دانيار سۇندەتباەۆ,
«نۇر وتان» پارتياسى «جاس وتان» جاستار قاناتى توراعاسى
