«Reforms in Kazakhstan: An analytical View» اتتى كىتاپتىڭ اۆتورى – قازاقستاننىڭ بەلگىلى مەملەكەت جانە قوعام قايراتكەرى, جوعارى مەكتەپ پەن عىلىم ءىسىنىڭ كورنەكتى ۇيىمداستىرۋشىسى, ەكونوميست عالىم كەنجەعالي ابەن ۇلى ساعاديەۆ.
ءىس-شاراعا مەملەكەتتىك ورگانداردىڭ, عىلىمي جانە شىعارماشىلىق قوعامداستىقتىڭ, بيزنەس ورتانىڭ وكىلدەرى, جوعارى وقۋ ورىندارىنىڭ رەكتورلارى, سونىمەن قاتار پروفەسسورلىق-وقىتۋشىلىق قۇرام جانە ەلىمىزدىڭ ستۋدەنتتەر قاۋىمى قاتىستى.
مەملەكەتتىك حاتشى قۇتتىقتاۋ سوزىندە ەلباسى نۇرسۇلتان نازارباەۆتىڭ ستراتەگيالىق باعدارىنىڭ ماڭىزدى باسىمدىعىنىڭ ءبىرى – وتاندىق عىلىمدى دامىتۋ ەكەنىن اتاپ ءوتتى. مەملەكەت باسشىسى بۇكىل تاۋەلسىزدىك ءداۋىرى بويى عىلىمعا جانە عالىمدارعا ءاردايىم قامقورلىق جاساپ, ەلدەگى اكادەميالىق جانە قولدانبالى زەرتتەۋلەرگە جان-جاقتى قولداۋ كورسەتىپ كەلەدى.
تاۋەلسىزدىك جىلدارى عىلىمي قىزمەتتى باسقارۋدىڭ جاڭا مودەلى, عىلىمدى قارجىلاندىرۋدىڭ زاماناۋي تەتىكتەرى ەنگىزىلدى. ماسەلەن, 2016 جىلى 23 مىڭ عالىم جانە 383 مەكەمە عىلىمي زەرتتەۋ جۇمىستارىمەن اينالىستى. جالپى, بۇل سالاعا 38 ميلليارد تەڭگە جۇمسالعان.
گۇلشارا ابدىقالىقوۆا بۇل مونوگرافيا تاۋەلسىزدىك جىلدارىنداعى قازاقستان ەكونوميكاسىنداعى ماڭىزدى ماسەلەلەردى تالداۋعا ارنالعانىن, سونداي-اق وندا قوعامىمىزدى دامىتۋدىڭ ءتۇرلى اسپەكتىلەرىنە قاتىستى اۆتوردىڭ پىكىرى بەرىلگەنىن اتاپ ءوتتى. بۇل ەڭبەك مەملەكەت باسشىسى ۇسىنعان ءارى بۇكىل الەم ءۇشىن حرەستوماتياعا اينالعان قازاقستان جولىن وي ەلەگىنەن وتكىزۋگە ارنالعان.
كىتاپ تەك ءبىزدىڭ ەلدە عانا ەمەس, شەت ەلدەردە دە كەڭىنەن تالقىلانىپ, لايىقتى باعاسىن الدى. ماسەلەن, كەمبريدج ۋنيۆەرسيتەتىنىڭ پروفەسسورى سيدحارت ساكسەن بۇل ەڭبەكتىڭ پوستكەڭەستىك كەڭىستىكتەگى رەفورمالار جونىندە نۇسقاۋلىققا اينالعانىن اتاپ وتكەن. ال ماسكەۋ مەملەكەتتىك ۋنيۆەرسيتەتىنىڭ پروفەسسورى الەكساندر بۋزگاليننىڭ ويىنشا, بۇل باسىلىم – بارلىق مەملەكەتتەر ءوز تاۋەلسىزدىگىنىڭ باستاپقى جىلدارىندا تاپ بولعان جاھاندىق سىن-قاتەرلەردى ەڭسەرۋ ەرەجەلەرىنىڭ وزىندىك ءبىر جيىنتىعى.
ءىس-شارا سوڭىندا مەملەكەتتىك حاتشى گ.ن.ابدىقالىقوۆا اكادەميك ك.ءا.ساعاديەۆكە مىقتى دەنساۋلىق, باق-بەرەكە, جاڭا شىعارماشىلىق تابىستار تىلەدى.
