سوڭعى جىلدارى شىعىس جەكپە-جەگىنە جاتاتىن سپورت ءتۇرلەرىمەن اينالىسۋعا دەن قويعان ەل جاستارىنىڭ سانى ارتىپ كەلەدى. ۇزدىكتەر باسەكەسىندە ەلىمىزدىڭ بىرنەشە قالاسى مەن كورشىلەس قىرعىزستاننان كەلگەن 5-17 جاس ارالىعىنداعى سپورتشىلار باق سىنادى.
«باعاناشىل» سپورت كەشەنىندە ءوز ونەرلەرىن كورسەتكەن سپورتشىلار, بوز كىلەمدە ايانىپ قالعان جوق. ءناتيجەسىندە, ءار جاس, سالماق دارەجەلەرىندە جەڭىمپازدار مەن ءجۇلدەگەرلەر انىقتالىپ, ۇزدىك دەپ تانىلعاندار مەدال, ديپلوم جانە ارنايى كۋبوكپەن ماراپاتتالدى. سونىمەن قاتار سپورتتىڭ ءاربىر ءتۇرىنە ارنايى سىيلىقتار بەرىلىپ, «ەڭ ۇزدىك تەحنيكا», «جەڭىسكە دەگەن جىگەرى ءۇشىن» جانە «ەڭ قىسقا جەكپە-جەك» اتالىمدارى بويىنشا ناعىز مىقتىلار سارالاندى.
– بۇل جارىستان العان اسەرىم ەرەكشە. تاەكۆاندودان ءبىرىنشى ورىن الىپ, ەكى ايلىق دايىندىعىمنىڭ زايا كەتپەگەنىن ءدالەلدەدىم. وتە ريزامىن, قارسىلاستارىم دا وسال بولمادى. بۇل سپورت تۇرىمەن اينالىسقانىما ەكى جىل بولدى, وتە ىڭعايلى ءارى تەحنيكالىق سپورت دەپ سانايمىن. ەل چەمپيوناتى مەن حالىقارالىق جارىسقا دا قاتىسىپ ۇلگەردىم, ناتيجە جامان ەمەس, – دەيدى تاەكۆوندادان +65 كگ سالماق دارەجەسىندە توپ جارعان الماتىلىق نۇرجان جۇماباەۆ.
نۇرجاننان بولەك سپورتتىڭ باسقا دا تۇرلەرى بويىنشا جۇزدەن جۇيرىك شىققان جەڭىمپازداردىڭ قۋانىشىندا شەك جوق. جۇلدەلى ورىنعا ىلىكپەگەندەردىڭ دە ءجۇزىنەن وكىنىشتىڭ نىشانى بايقالمايدى. ەڭ باستىسى ءوزارا ءتاجىريبە الماسۋعا مۇمكىندىك تۋعىزاتىن وسىنداي فەستيۆالدەر مەن جارىستار ءجيى ءوتىپ تۇرسا دەيدى جاس سپورتشىلار.
ارمان وكتيابر,
«ەگەمەن قازاقستان»
الماتى
