راسىندا دا وسى ۋاقىتقا دەيىن تارازدىقتار جاز مەزگىلىندە سەرۋەندەپ جۇرەتىن, بولماسا قوناق كەلگەندە اپارىپ كورسەتەتىن دەمالىس ورىندارىنىڭ تاپشىلىعى تۋرالى تالاي ماسەلە كوتەرىپ كەلگەن. ماسەلەن باۋىرجان مومىش ۇلى اتىنداعى «جەڭىس» ساياباعىنا حالىق كوپ شوعىرلاناتىندىقتان, بۇل جەردى جاڭعىرتۋ كەرەكتىگى دە ءسوز بولعان. ەندى اتالعان ساياباق قايتا جاڭعىرتىلىپ, جاڭالاناتىن بولادى. جيىندا ساياباقتى جاڭعىرتۋ جوباسىمەن الماتى قالاسىنان ارنايى كەلگەن «ارىستان – سەرۆيس» جاۋاپكەرشىلىگى شەكتەۋلى سەرىكتەستىگى تانىستىردى. جوبا اۆتورلارىنىڭ ايتۋىنشا, مۇندا ۇلى وتان جانە اۋعان سوعىسى ارداگەرلەرىنە, سونداي-اق تىل ەڭبەككەرلەرىنە ارنالعان مۋزەي بوي كوتەرەتىن بولادى. سونداي-اق, ۇلى وتان سوعىسىنا قاتىسقان 68 مىڭ جامبىلدىقتاردىڭ ەسىمى جازىلعان «جاۋىنگەرلىك داڭق اللەياسى» مەموريالدى كومپوزيتسياسى دا سالىنادى. سونىمەن قاتار, ەرلىكپەن قازاق تاپقان جامبىلدىق جاۋىنگەرلەر تۋرالى تىڭ دەرەكتەر ىزدەستىرىلىپ, ولار جەرگىلىكتى ءباسپاسوز بەتتەرىندە جاريالانادى.
ساياباق اۋماعىندا جەڭىس كۇنىنە وراي «ماڭگىلىك پولكتىڭ» جۇرۋىنە دە باسىمدىق بەرىلىپ, قالانىڭ ءار جەرىندە ورنالاسقان «ماڭگىلىك الاۋ» مەن باۋىرجان مومىش ۇلى ەسكەرتكىشى ساياباق اۋماعىنا اكەلىنەدى. بۇل ورايدا ۇلى وتان سوعىسىنىڭ ارداگەرى, جازۋشى باۋىرجان مومىش ۇلىنىڭ ۇرپاق تاربيەسىنە قاتىستى ايتقان ناقىل سوزدەرى جازىلعان تاقتايشالار ورناتىلادى. سونىمەن قاتار, قاۋىپسىزدىكتى ساقتاۋ ماقساتىندا ساياقات اۋماعىنا تولىقتاي بەيناباقىلاۋلار قويىپ, قوسىمشا پوليتسيا پۋنكتتەرىن اشۋ جوسپاردا بار.
كەلەشەكتە تاراز قالاسىنداعى باۋىرجان مومىش ۇلى اتىنداعى «جەڭىس» ساياباعى جاستاردى وتانسۇيگىشتىككە تاربيەلەيتىن, تاريحتى تانۋعا ۇندەيتىن ساياباق بولماق.
حاميت ەسامان,
«ەگەمەن قازاقستان»
جامبىل وبلىسى
