بالا كەزدەن سانامنىڭ قالتارىسىندا قالىپ قويعان سول وقيعانى ۇمىتا دا باستاعانداي ەكەنمىن. كەيىنگى جىلدارى رەسپۋبليكالىق مۋزىكالىق كورەي تەاترى دۋلات يسابەكوۆتىڭ دراماتۋرگيالىق شىعارماسىنىڭ جەلىسىمەن «مۇراگەرلەردى» ساحنالاپ ءجۇر.
دراماتۋرگياسى ءتورت اياعىنان تەڭ تۇرعان يسابەكوۆتىڭ قاي پەساسى دا وسال بولىپ كورگەن ەمەس. بىراق وزەگى مىقتى ماتەريالدى ويناتۋعا, قاعازداعى دۇنيەنى قان-سولىمەن تىرىلتۋگە اكتەردىڭ شەبەرلىگى, رەجيسسەر سۇڭعىلالىعى اۋاداي قاجەت. بىرەۋى اقساسا ۇجىمدىق ەڭبەك زايا كەتتى, كورەرمەنىنە جەتپەدى دەپ ەسەپتەي بەرىڭىز. ارينە بۇل بەلگىلى قاعيدات قوي. دەگەنمەن مەن «جەك كورەتىن اكتەرىمدى» تاعى دا تاپقان سياقتىمىن.
وسى «مۇراگەرلەردە» تەاتر سىنشىلارى مەن كورەرمەندەر ءۇشىن قىزۋ پىكىرتالاس تۋدىرعان سىزعانوۆتى سومداعان رومان تسويدىڭ ويىنى بولدى. «ويناعان» دەمەي, سومداعان دەپ وتىرعانىمىز مادەنيەت قايراتكەرى رومان تسوي راسىندا دا وڭباعان, ارسىز جاننىڭ بەينەسىن سونشالىقتى سەندىرىپ سۋرەتتەگەننەن بولار, كەيبىر كورەرمەن سپەكتاكل سوڭىندا اكتەرعا كەلىپ: ء«سىزدى ولەردەي جەك كورىپ وتىردىق» دەگەنىن ەستىدىك. اكتەردى قاراپايىم كورەرمەن عانا ەمەس, ءمۇيىزى قاراعايداي قازاقتىڭ اتاقتى جازۋشىلارى دا سونشالىقتى «جەك كورىپتى». پەسانىڭ پرەمەراسىنان كەيىن ونەرتانۋشىلار باستى رولدەردى ويناعان اكتريسالاردى ەمەس, جالعىزىلىكتى كەمپىردىڭ ءۇيىن ايەلىمەن قوسىلىپ تارتىپ العان جولسەرىكتىڭ ويىنىن كوپكە دەيىن ايتىپ, كوپكە دەيىن تالقىلاۋمەن بولدى. شەبەرلىكتىڭ شىڭى وسى, ادامعا ەمەس قاعازعا سەنەتىن قوعامدا كەيۋانانى زار ەڭىرەتىپ, ءومىر بويى تۇرعان, ءاربىر كىرپىشىن ءوزى قالاعان قارا شاڭىراعىنان ايىرۋعا, وبال مەن ساۋاپتى تارك ەتىپ, قارا باسىن تاپتاۋعا شىنىندا دا وڭباعاننىڭ وڭباعانى بارادى ەمەس پە؟! رومان تسويدىڭ ويىنىن العاش كورگەندە بەلگىلى تەاتر سىنشىسى اشىربەك سىعاي: «رومان, سەن ءالى دە «دوبرىيسىڭ». مۇنان دا قاتىگەز بولۋ كەرەك. ونداي قادامعا باراتىن ادامنىڭ بەتىندە ءبىر ءتۇيىر دە كىسىلىك بولماۋ كەرەك» دەپ كەڭەس بەرگەن ەكەن. اكتەر وسى ەسكەرتپەدەن كەيىن, ەكىنشى ويىنىندا-اق تاماشا قورىتىندى شىعارىپ, جۇرتتىڭ «جاعاسىن ۇستاتقانى» ەستە.
ەندى بۇگىنگىنىڭ كورەرمەنى قازىر قانداي اكتەرلاردى «جەك كورەدى»؟
ايناش ەسالي,
«ەگەمەن قازاقستان»
الماتى
