ەراسىل 2016 جىلى استانادا اساۋ ۇيرەتۋدەن وتكەن «استانا جۇلدىزى» رەسپۋبليكالىق تۋرنيرىندە كۇمىس جۇلدە يەلەنسە, بىلتىر كوكشەتاۋدا جالاۋى جەلبىرەگەن «الاشتىڭ التىن شاڭىراعى» ەتنوفەستيۆالىندە اساۋ ۇيرەتۋدەن ەل چەمپيونى اتانعان-دى. جاقىندا ءۇرجار اۋدانىنا جول تۇسكەندە اساۋلاردىڭ ارىنىن باسقىش ازاماتپەن از-كەم اڭگىمەلەسۋدىڭ ءساتى تۇسكەن. «قازاقتىڭ حاس باتىرى قابانباي بابامىزدىڭ 300 جىلدىعى تويلانعان كەزدە دۇنيەگە كەلگەندىكتەن ەسىمىمدى ەراسىل دەپ قويىپتى. ءوزىمنىڭ تۋىپ-وسكەن جەرىم ايدىندى الاكول ءباھادۇر باتىردىڭ دا كىندىك قانى تامعان مەكەنى. سونداي توپىراقتا ءونىپ-وسكەننەن كەيىن اتقۇمار بولماۋ مۇمكىن ەمەس شىعار. اساۋ ۇيرەتۋگە اۋدارىسپاق ارقىلى كەلدىم دەسەم دە بولادى. تۋعان اعام قۇرمانعازى اۋدارىسپاقتان اۋدانعا, وبلىسقا, رەسپۋبليكاعا بەلگىلى ازامات. ۆەنگريادا وتكەن الەم بىرىنشىلىگىندە چەمپيون اتانعان. اكەم دە جىلقىنى جاقسى كورەدى. اتقا دەگەن قۇشتارلىق سول كىسىلەردەن دارىعان بولۋ كەرەك. قازىر رەسپۋبليكالىق جارىستارعا بەلگىلى اتبەگى, ۇستازىم تاتتىمبەت كاپ ۇلىنىڭ قولداۋىمەن, باپتاۋىمەن قاتىسىپ ءجۇرمىن», دەيدى شاباندوز.
ەراسىلدىڭ بىلتىر كوكشەتاۋدا وتكەن چەمپيوناتتاعى اساۋ ۇيرەتكەن ساتتەگى كوز ىلەسپەس جىلدامدىعى, استىنداعى اساۋ اعاش قورشاۋعا بارىپ سوعىلعان كەزدە اسقان شاپشاڭدىقپەن ەكىنشى قاپتالعا ىتقىپ شىعىپ, قايتادان قارعىپ ءمىنىپ العانى سايىستى تاماشالاعان ەلدىڭ دەلەبەسىن قوزدىرا ءتۇستى. الايدا ەراسىل جۇرت كوڭىلىنە جاققان مۇنداي تاماشا كورىنىستەردىڭ ار جاعىندا قانشاما قيىندىق پەن توگىلگەن تەر جاتقانىن ايتادى. «سول ءسات ءالى ەسىمدە. اساۋدىڭ موينىنا شالمانى ءوزىم تاستادىم.
اتتىڭ ءتورت اياعى كوكتەن كەپ وماقاسا قۇلاعاندا ءمىنىپ ۇلگەردىم. تۇردى دا قورشاۋعا تىگىنەن شاۋىپ قابىرعاعا سوعىلدى. سول كەزدە ساقتىق ءۇشىن ەكىنشى قاپتالعا سەكىرۋگە تۋرا كەلدى. قورشاۋدان الىستاعاننان كەيىن قايتا ءمىنىپ الدىم. مەنىڭشە, اساۋعا شالمانى ءوزىمنىڭ سالىپ مىنگەنىم ەرەكشە كورىندى مە دەپ ويلايمىن. تورەشىلەر مەنىڭ ونەرىمدى وسى تۇرعىدان باعالاعان سەكىلدى», دەيدى ەراسىل.
ونىڭ ايتۋىنشا, اساۋ ۇيرەتۋ جارىستارىنىڭ وزىندىك ءتارتىبى بار. شاباندوزدىڭ ونەرى تەك شالما سالىپ, اساۋعا ءمىنىپ, تاس كەنەدەي جابىسىپ ات ۇستىنەن تۇسپەي قويۋمەن عانا باعالانبايدى. اساۋدى ۇيرەتۋ بارىسىنداعى قامشى باسىپ, جىلقىنىڭ قىتىعىنا ءتيىپ, كوككە شاپشىتىپ, تۋلاتۋ سەكىلدى قان قىزدىرار ساتتەرگە تورەشىلەر جوعارى ۇپاي بەرەدى ەكەن. ال وسىنداي ۇلكەن تۋرنيرلەرگە قاتىسار الدىندا شاباندوزدار اساۋعا ءمىنىپ جاتتىعۋدان بولەك, تىنىسىن اشۋ ءۇشىن كانىگى سپورتشىلارداي جۇگىرەتىن كورىنەدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
ءۇرجار اۋدانى,
قارابۇلاق اۋىلى
