كومەكەي اۋليەنىڭ مەرەيتويىن ءوز دەڭگەيىندە اتاپ ءوتۋ شارالارىنا وبلىس اكىمى ەرلان قوشانوۆ ەرەكشە ءمان بەرىپ وتىر. بۇگىنگە دەيىن ءوڭىر باسشىسى وسى شارۋانىڭ جاي-جاپسارىن پىسىقتاعان ەكى جيىن وتكىزدى. قازىرگى ۋاقىتتا ناقتى قولعا الىناتىن جوسپار-جوبالاردىڭ سۇلباسى ايقىندالىپ, رەسمي تۇردە بەكىتىلۋدىڭ از الدىندا تۇر. سونىڭ ءبىرى – ايگىلى جىراۋدىڭ كەسەنەسىن جانىنداعى مۇراجاي ۇيىمەن قوسىپ جوندەۋدەن وتكىزۋ. بۇل ماقساتقا وبلىستىق بيۋدجەتتەن 70 ميلليون تەڭگە بولىنبەكشى.
بۇل باعىتتا بۇقار جىراۋدىڭ ەسىمىن يەمدەنگەن اۋداننىڭ باسشىلىعى دا قاراپ وتىرعان جوق. جالپى حالىققا ورتاق تۇلعانىڭ تويىنا دەگەن ازىرلىك جان-جاقتى جۇرگىزىلۋدە. اۋدان ءۇشىن بۇل ۇلكەن سىن ەكەندىگى تۇسىنىكتى. سونىمەن قاتار مەرەيتويعا دايىندىق شارالارى اياسىندا باسقا دا وتكىر تۇرعان بىرقاتار ماسەلەنىڭ ءتۇيىنىن وڭىنان شەشىپ الۋ بۇقارجىراۋلىقتار ءۇشىن ۇلكەن ولجا بولماق.
بۇقار جىراۋ اۋدانىنىڭ اكىمى شاگۋراشيد ءمامالينوۆتىڭ ايتۋىنشا, تۇرعىنداردى ورتالىقتاندىرىلعان ساپالى سۋمەن قامتاماسىز ەتۋ جۇمىستارى جالعاسىن تابادى. الداعى ەكى جىلدا توعىز ەلدى مەكەننىڭ اۋماعىندا گەولوگيالىق بارلاۋ جۇمىستارىن جۇرگىزۋدىڭ جوبالىق-سمەتالىق قۇجاتتاماسى جاسالماق. جاقىندا قاراجار, بوتاقارا, اسىل, جاڭاتالاپ, شەشەنقارا, ترۋدوۆوە, قىزىلجار, جاڭاقالا, دوسكەي, سامارقان ەلدى مەكەندەرىندە سۋ قۇبىرلارى جەلىسىن ورناتۋ مەن قايتا ىستەۋدىڭ جوبالىق-سمەتالىق قۇجاتتاماسىن جاساۋ قولعا الىندى.
دوسكەي اۋىلىندا كارىز جۇيەلەرىنىڭ 95 پايىزى ابدەن توزعان. ولاردى جاڭارتۋ جانە قايتا قۇراستىرۋ جۇمىستارى جاقىن ايلاردىڭ جوسپارىنا ەنگىزىلىپ وتىر. سونىمەن قاتار ع.مۇستافين كەنتىنىڭ كارىز جۇيەلەرىن قايتا قۇراستىرۋ مەن سارىتوبە, بايقادام, ۇشتوبە اۋىلدارىندا سۋ قۇبىرلارىن تارتۋعا دا اۋداندىق بيۋدجەتتەن قارجى ءبولىندى.
اعىمداعى جىلى اۋداندا ەنەرگيا ۇنەمدەۋ مەن ەنەرگيا تيىمدىلىگىن ارتتىرۋ بويىنشا جۇمىستار دا جالعاسا بەرەدى.
– قازىر ءبىز قالدىقسىز جۇمىس ىستەيتىن العاشقى قوقىس وڭدەۋ زاۋىتىن ىسكە قوسۋعا ازىرلىك ۇستىندەمىز, – دەيدى اۋدان اكىمى. – «جانارۋ» جشس-نە ءتورت گەكتار جەر بەرىلدى. ايىنا سەگىز مىڭ توننا قوقىس وڭدەي الاتىن زاۋىت قاراشا ايىندا ىسكە قوسىلادى. قوقىس پرەستەرى ورناتىلىپ, اۋىلداردان قاتتى تۇرمىس قالدىقتارىن جيناۋ مەن سۇرىپتاۋ پۋنكتتەرىن اشامىز.
بۇقار جىراۋ اۋدانىندا حالىققا مەديتسينالىق كومەك كورسەتۋدىڭ قولجەتىمدىلىگى مەن ساپاسىن ارتتىرۋعا ەرەكشە دەن قويىلعان. ديسپانسەرلىك ەسەپتە تۇرعان جانداردى تەگىن ءدارى-دارمەكپەن قامتاماسىز ەتۋ ماقساتىنا 39 ملن تەڭگە ءبولىندى. اۋداندا ءۇش الەۋمەتتىك ءدارىحانا جۇمىس ىستەيدى.
ءبىلىم بەرۋ جۇيەسىن دامىتۋ مەن جەتىلدىرۋ جۇمىستارىندا دا دامىل جوق. اعىمداعى جىلى «كوكپەكتى» اۋىلىندا جەكەمەنشىك بالاباقشا اشىلدى. ء«بىلىم بەرۋ روبوت تەحنيكالارى» جوباسىنىڭ اياسىندا جۇمىستار اتقارىلۋدا. قىزىلجار اۋىلىنداعى ورتا مەكتەپتە كۇردەلى جوندەۋ جۇمىستارى اياقتالۋعا جاقىن.
اۋداندا الەۋمەتتىك تۇراقتىلىق پەن حالىقتىڭ تۇرمىس دەڭگەيىن كوتەرۋدى قامتاماسىز ەتۋگە ەرەكشە كوڭىل بولىنەدى. ماڭىزدى كورسەتكىشتەردىڭ ءبىرى – جۇمىسسىزدىقتى ازايتۋ. جۇمىسسىز رەتىندە رەسمي تىركەلگەندەر سانى قازىر 110 ادام, ياعني جۇمىسقا قابىلەتتى حالىقتىڭ 4 پايىزى.
اۋدان حالقىنىڭ دەنە شىنىقتىرۋ جانە سپورتپەن شۇعىلداناتىن بولىگىنىڭ ۇلەسىن بيىل 29,9 پايىزعا دەيىن جەتكىزۋ كوزدەلىپ وتىر. وسى ماقساتتا قۋشوقى كەنتىندە بالالار مەن جاسوسپىرىمدەردىڭ سپورت كلۋبى اشىلماق.
بۇقار جىراۋ اۋدانى ۇلى جىراۋدىڭ مەرەيتويىنا لايىقتى ازىرلەنۋدە.
قايرات ءابىلدا,
«ەگەمەن قازاقستان»
قاراعاندى وبلىسى,
بۇقار جىراۋ اۋدانى
