ءار ۇيگە 10 ءتۇپ جەمىس اعاشى وتىرعىزىلدى
ادامزاتتىڭ الدىندا تۇرعان باستى پارىزدارىنىڭ ءبىرى – اعاش ەگۋ ەكەنى بەلگىلى. اۋدان اكىمدىگىنىڭ باستاماسىمەن, «نۇر وتان» پارتياسىنىڭ اۋداندىق فيليالى, شولاققورعان اۋىلدىق اكىمدىگى, شولاققورعان اۋىلىنداعى مەكتەپتەر, سوزاق ورمان جانە جانۋارلار الەمىن قورعاۋ جونىندەگى مەملەكەتتىك مەكەمەسى قىزمەتكەرلەرى «مەيىرىمدى تابيعات» اتتى قايىرىمدىلىق اكتسياسىن وتكىزدى. اكتسيا اياسىندا اۋدان بويىنشا از قامتىلعان وتباسىلار مەن مۇگەدەكتىگى سالدارىنان وزىنە-ءوزى كۇتىم جاساي المايتىن ازاماتتاردىڭ جەكە تۇرعىن ۇيلەرىنىڭ اۋلاسىنا 10 تۇپتەن جەمىس اعاشتارى وتىرعىزىلدى. ءار وتباسىعا 4 ءتۇپ الما, 3 ءتۇپ ورىك پەن 3 ءتۇپ المۇرت كوشەتتەرىنەن كەلدى.
اۋدان بويىنشا بارلىعى 73 وتباسىنا 730 جەمىس كوشەتتەرى تارتۋ ەتىلدى. تۇرعىلىقتى جەرىمىزدىڭ تال-تەرەگىن جايقالتىپ, گۇلمەن كومكەرىلگەن باققا اينالدىرىپ, اۋىلىمىزدىڭ اجارلى بولۋىنا ۇلەس قوسۋ كىمنىڭ بولسا دا ازاماتتىق پارىزى. «بابالار ەككەن شىناردى بالالارى سايالايدى» دەمەكشى, وتىرعىزعان جاسىل جەلەكتەرىمىز تەز جەرسىنىپ, بالعىندارىمىز ماقتانىشپەن ايتا ءجۇرىپ, ساياسىندا ەمىن-ەركىن اسىر سالىپ ويناۋى ءبىز ءۇشىن ۇلكەن قۋانىش. اعاشتاردى ەگىپ قانا قويماي, ولاردى ستاندارتتى جاعدايعا جەتكەنگە دەيىن كەمىندە ءۇش جىل بويى تولىقتىرۋ, كۇتىم, قورعاۋ جۇمىستارىن ورىنداپ وتىرۋىمىز قاجەت, دەيدى ورمان شارۋاشىلىعىنىڭ ماماندارى.
ماقسات قارعاباي
وڭتۇستىك قازاقستان وبلىسى
ىسىراپشىلىق استامشىلىققا سوقتىرادى
گازەتتەرىڭىزدەگى سەرىكباي تۇرجاننىڭ «ىسىراپشىل داستۇردەن ارىلايىق!» اتتى ماقالاسىن وقىعاننان كەيىن قولىما قالام الدىم. ويتكەنى بۇل ءبىر ادامدى عانا تولعاندىرىپ جۇرگەن ماسەلە ەمەس. قازاقستاننىڭ قاي تۇكپىرىنە بارساڭ دا ولىكتى جونەلتۋدەگى ىسىراپشىلدىقتى ايتىپ تا, جازىپ تا ءجۇر. بىراق ءالى دە ءبىر ورتاق شەشىمگە كەلگەن جوقپىز. «قازاقستاننىڭ قاي تۇكپىرىنە بارساڭ دا» دەپ وتىرعانىم, اۆتور وڭتۇستىكتەگى جاعدايدى جازىپ وتىر, بىزدە سولتۇستىكتە دە ءدال وسىنداي جاعداي.
الدىمەن ايتارىم, جاناشىرلار جينالىپ كەڭەسكەندە «حالىق كوپ جينالۋعا ءتيىستى, ءۇش جىلقى سويۋ كەرەك» دەگەن شەشىمگە ءجيى كەلەدى. مۇنى قالاي ىسىراپشىلدىق دەمەسسىڭ؟ استانادان باستاپ, ءبىزدىڭ سولتۇستىك وڭىردە تاباقتاعى ەتتى تاراتىپ الۋ بار, اس ۇيگە بىرەر جاپىراق تۋرالعان ەت قانا قايتادى. مۇشەلەپ تاباق تارتساڭ كەم دەگەندە 700-800 ادام جينالعان جەردە ءۇش جىلقىڭ دا از بولۋى مۇمكىن...
ال, جانازا داستارحانىنا ەتپەن بىرگە نەشە ءتۇرلى سالاتتار, شايعا جەمىس-جيدەكتىڭ, تاتتىلەردىڭ ءتۇر-ءتۇرى كەلۋى ىسىراپشىلدىق ەمەي نەمەنە؟ باۋىرساق, سارى ماي, قانت سالساق جەتپەي مە؟ دۇعا – توي ەمەس قوي! ىسىراپشىلىق اقىرى استامشىلىققا اپارىپ سوقتىرادى. دۇعاداعى اس ءمازىرىن جالپى قازاق ەلىندە ءبىر ارناعا ءتۇسىرۋ قاجەت.
اۆتور جازعانداي «جاسى 80-90-عا كەلگەن قاريالارعا عانا: «تابارىك بولسىن, جاسىمىز سوعان جەتسىن!» دەپ ىرىمداپ, جىرتىستىڭ بەرىلگەنى دە دۇرىس شىعار, ال بىلاي ايتەۋىر جاپپاي جىرتىس, تەلىم ۇلەستىرە بەرۋدى مەن ءوزىم دۇنيە شاشۋ دەپ بىلەمىن» دەپ, مەن دە بۇل جازعاندارىن قولدايمىن, تەك 70 ەمەس, 80-نەن اسقان قاريالارعا دەسەك دۇرىس بولار ەدى.
سوۆەت حاميت ۇلى,
ەڭبەك ارداگەرى
كوكشەتاۋ
بالۋاننىڭ ەسىمى ۇمىت قالماسا...
تەحنيكا عىلىمدارىنىڭ كانديداتى, دوتسەنت, بەلگىلى بالۋان, كسرو سپورت شەبەرى, ەركىن كۇرەستەن قازاق كسر-ءنىڭ بىرنەشە دۇركىن چەمپيونى, كسرو بىرىنشىلىگىنىڭ ءۇش دۇركىن قولا جۇلدەگەرى اتانعان قۇلجاباي التىنبەكوۆتىڭ ەسىمى ءبىر وڭتۇستىك قازاقستان وبلىسىنا عانا ەمەس, بۇكىل قازاققا بەلگىلى. عىلىم مەن سپورتتى ءومىرىنىڭ باستى ماقساتى ساناعان قۇلجاباي التىنبەكوۆ كەڭەس ءداۋىرى كەزىنىڭ وزىندە فيزيكا پانىنەن جوعارى وقۋ ورىندارى مەن مەكتەپ وقۋشىلارىنا ارناپ قازاق تىلىندە وقۋلىق جازعان بەلگىلى عالىم.
ارقاشان دا ازاماتتىقتىڭ تۋىن جوعارى ۇستاعان ونەگەلى ۇستاز, بىلىكتى جاتتىقتىرۋشى قۇلجاباي التىنبەكوۆ نەبارى 53 جىل عانا عۇمىر كەشىپ, دۇنيەدەن وزدى. وكىنىشكە قاراي, وڭتۇستىك قازاقستان وبلىسىنىڭ عىلىمى مەن سپورتىنىڭ وركەندەۋىنە شەكسىز ۇلەس قوسقان ەسىل ەردىڭ ارداقتى ەسىمى ۇمىتىلىپ بارادى. بۇگىنگە دەيىن تۋعان جەرى – تۇلكىباس اۋدانى مەن ءوزى قىزمەت ىستەگەن شىمكەنت قالاسىندا وسى كۇنگە دەيىن قۇلجاباي التىنبەكوۆتىڭ اتىنداعى ءبىر دە ءبىر سپورت ءتۋرنيرىنىڭ وتكىزىلمەۋى – ايتار ويىمىزدى دالەلدەسە كەرەك.
دەگەنمەن, يگىلىكتىڭ ەرتە-كەشى جوق. ارداقتىلارىمىزدى قادىرلەي بىلەيىك. ەلى باردا كوزىنىڭ تىرىسىندە حالىق قالاۋلىسىنا اينالعان قۇلجاباي التىنبەكوۆتىڭ ەسىمى ۇمىتىلمايدى دەپ سەنەمىز.
دوقتىرحان تۇرلىبەك,
حالىقارالىق «الاش» ادەبي سىيلىعىنىڭ لاۋرەاتى
اۋىل جاستارى اسارلاتتى
وتكەندە ماڭعىستاۋ اۋداندىق جاستار رەسۋرستىق ورتالىعىنىڭ ۇيىمداستىرۋىمەن «رۋحاني جاڭعىرۋ» باعىتى اياسىندا جانە رەسپۋبليكالىق جاستار اكتسياسى نەگىزىندە شەتپە اۋىلىندا ەڭبەك جانە تىل ارداگەرى, جالعىزىلىكتى قاريا سپانعالي بايدۋللاەۆتىڭ ۇيىنە قايىرىمدىلىق شاراسى وتكىزىلدى.
باعدارلامانىڭ «اسار» باعىتى بويىنشا وتكەن شارادا اۋىلدىڭ بەلسەندى جاناشىر جاستارى قارت س.بايدۋللاەۆتىڭ ءۇي-جايىنا جانە اۋلاسىنا تازالىق جۇمىستارىن جۇرگىزدى. بۇعان دەيىن دە اۋىل جاستارى بىرنەشە اۋىل تۇرعىندارىندا بارىپ, قايىرىمدىلىق ءىس شاراسىن وتكىزگەن ەدى. اۋىل جاستارى ءۇي جايلارىن تازالاپ قانا قويماي, ءار سەنبى سايىن جالعىزىلىكتى قارتتاردىڭ حال-جاعدايلارىن ءبىلىپ تۇرادى. قاجەت بولسا جەدەل جاردەم شاقىرتىپ, دەنساۋلىقتارىن قاراۋعا جاردەمدەسىپ كەلەدى.
شەتپەدە قازىرگى تاڭدا 5 جالعىزىلىكتى قاريا تۇرىپ جاتىر. بارلىعى دا مەملەكەت قامقورلىعىندا. اتالمىش شاراعا شەتپەدەگى ا.مەڭدالى ۇلى اتىنداعى ورتا مەكتەپتىڭ جوعارى سىنىپ وقۋشىلارى مەن جاسوتاندىقتار اتسالىستى.
اللابەرگەن قونارباەۆ
ماڭعىستاۋ وبلىسى
جاڭا مەكتەپتەرگە ەل ريزا
جامبىلدىق 2 400 وقۋشى جاڭا مەكتەپتەردە ءبىلىم نارىنەن سۋسىنداۋدا. ولاردىڭ ءبىرى «سالتانات» شاعىن اۋدانىنداعى №30 ورتا مەكتەپ بولسا, ەكىنشىسى ء«شولدالا» ەلدى مەكەنىندە ورنالاسقان 1 200 بالاعا ارنالعان ورتا مەكتەپ. سونىمەن قاتار وبلىس ورتالىعىنداعى كونە مەكتەپتەردىڭ ءبىرى – №24 مەكتەپ-گيمنازياسىنا قوسىمشا سالىنعان عيمارات ىسكە قوسىلعان بولاتىن.
اتالعان نىسانداردىڭ بارلىعى 2015-2019 جىلداردى قامتيتىن ينفراقۇرىلىمدى دامىتۋعا باعىتتالعان «نۇرلى جول» باعدارلاماسىنىڭ اياسىندا سالىندى. №30 مەكتەپ-گيمنازياسىندا بۇرىن بالالار اپاتتى جاعدايدا تۇرعان عيماراتتا ءبىلىم الىپ كەلگەن بولسا, ەندى ولار جالپى اۋماعى 9 مىڭ شارشى مەتردى الىپ جاتقان جاڭا دا كەڭ سىنىپتاردا وقىپ جاتىر. ورتا مەكتەپتىڭ 46 وقۋ كابينەتى زاماناۋي قۇرىلعىلارمەن قامتاماسىز ەتىلگەن. اكت زالىنا 350 ادام سىيسا, اسحاناسىندا ءبىر مەزگىلدە 150 بالا تاماقتانا الادى. سپورت زالىندا سپورتپەن اينالىسۋعا ارنالعان جاڭا قۇرىلعىلار بار. بالالاردىڭ ءبىلىم الۋىنا وسىنداي جاعداي جاسالىنىپ وتىرىلعانىنا ەل-جۇرت اركەز العىستارىن بىدىرۋدە.
ايدار وسپاناليەۆ
جامبىل وبلىسى
