مەديتسينالىق ءتۋريزمدى دامىتۋ ماقساتىندا, وڭتۇستىك قازاقستان وبلىسى اكىمدىگى مەن دەنساۋلىق ساقتاۋ باسقارماسىنىڭ قولداۋىمەن ءساتتى وتكەن وتا ناتيجەسىندە دونور اۋرۋحانادان شىعارىلىپ, امبۋلاتورلىق ەمدەۋگە جولدانعان. ال, رەتسيپيەنت, ياعني, كۇردەلى وتا جاسالعان شەتەل ازاماتى ستاتسيونارلىق ەم قابىلداۋدا. گەرمانيا ازاماتى مەن ونىڭ دونورى بولعان ۋكراينا ازاماتىنا وتانى شىمكەنتتىك ترانسپلانتولوگ-دارىگەرلەر جاسادى. نەگىزىندە شىمكەنت قالالىق جەدەل مەديتسينالىق كومەك كورسەتۋ اۋرۋحاناسىندا بارلىق جاعدايلار جاسالعان. شەتەلدىك ناۋقاستار ءۇشىن وتا جاساۋدىڭ بارلىق قولايلى جاعدايلارى قارالعان, ونىڭ ىشىندە بىرەگەي پرەپاراتتاردىڭ قورى جاساقتالعان جانە سەرۆيستىك پالاتالار بار, باعالارى دا قولجەتىمدى. دارىگەرلەردىڭ ايتۋىنشا, 50 جاستاعى شەتەل ازاماتىن وتا باعاسىنىڭ تىم ارزاندىعى قىزىقتىرعان. ول 4,5 ملن تەڭگە. ال ەۋروپا مەن اقش-تا بۇيرەك ترانسپلانتاتسياسىنىڭ ورتاشا قۇنى شامامەن 60-70 مىڭ دوللار شاماسىندا ەكەن.
ايتا كەتەلىك, قازىرگى تاڭدا وبلىس بويىنشا بۇيرەك جەتىسپەۋشىلىگىنەن زارداپ شەگەتىن 600-دەن استام ناۋقاس بار, ولاردىڭ بارلىعىنا تولىققاندى ەم-دوم كورسەتىلگەنىمەن, بۇيرەك اۋىستىرۋعا مۇقتاج. 2013 جىلدان بەرى شىمكەنت قالالىق جەدەل مەديتسينالىق كومەك كورسەتۋ اۋرۋحاناسىنىڭ بازاسىندا 100-گە جۋىق بۇيرەك الماستىرۋ وتالارى جاسالعان. وقو دەنساۋلىق ساقتاۋ باسقارماسىنىڭ باسشىسى م.ەگىزباەۆتىڭ ايتۋىنشا, رۋمىنيا جانە بولگاريا ازاماتى شىمكەنتتىك دارىگەرلەردىڭ اعزا الماستىرۋ وتاسىن جاساعانىن قالاپ وتىر. ناۋقاستار وزدەرىمەن بىرگە دونور دا الىپ كەلمەك.
عالىمجان ەلشىباي,
«ەگەمەن قازاقستان»
